İsmayıl Ağayev: “Elə etmək lazımdır ki, növbəti dəfə britaniyalı rəsmilər İrəvanda olarkən protokola kortəbii qaydada əməl etməsinlər”
Böyük Britaniyanın dövlət naziri Alan Dukan Ermənistanda səfərdədir. Səfər çərçivəsində britaniyalı nazir İrəvan şəhərində ucaldılan qondarma “soyqırım” abidəsini də ziyarət edib. Ziyarətdə sonra isə A.Dukan keçirdiyi mətbuat konfransında bildirib ki, qondarma “soyqırım” abidəsinin ziyarəti ona məyusluq və gərgin anlar yaşadıb.
Elə həmin mətbuat konfransında Ermənistanın xarici işlər naziri Nalbandyan Britaniyanın qondarma “soyqırım”ın tanınması istiqamətində göstərdiyi tarixi səylərdən danışıb. Məlumdur ki, Böyük Britaniya ilə Azərbaycan arasında normal münasibətlər mövcuddur. Onlara məxsus olan şirkətlər uzun illərdir Azərbaycanda neft və başqa sahələrdə fəaliyyət göstərir və bununla pul qazanırlar. Rəsmi Londonu təmsil edən bir nazirin Ermənistandakı davranışları iki ölkənin münasibətlərinə hansı formada təsir edə bilər?
Beynəlxalq Diaspor Mərkəzinin sədri İsmayıl Ağayev qəzetimizə açıqlamasında bildirdi ki, hər il 24 aprel erməni millətçiləri tərəfindən qondarma “erməni soyqırımı”nın ildönümü kimi qeyd olunur: “Bu tədbirlər yalnız İrəvanda ucaldılan abidənin ziyarət olunması ilə yekunlaşmır. Ermənilər I Dünya müharibəsi zamanı Anadoluda yaşayan ermənilərin kütləvi şəkildə türklər tərəfindən məhv edildiyini iddia edirlər. Erməni millətçiləri uydurma “soyqırım”ın təbliğini dünya ölkələrində apararaq, bu günə kimi qondarma “soyqırım”ın həyata keçirildiyinə inandırmışlar. Təəssüflər olsun ki, dünya ölkələri arasında uydurma “soyqırım”ı tanıyan ölkələr də var.
Erməni diasporunun apardığı təbliğat nəticəsində hətta dünya ölkələrinin bir neçə prezidenti, vitse-prezidenti, baş nazirləri, spikerləri və digər rəsmiləri İrəvanda “erməni soyqırımı”na həsr olunan “Sisernakaberd” memorial kompleksi abidəsini ziyarət ediblər. Təbii ki, bu bizi narahat edir. Hər dəfə də belə məlumatlar yayılanda ciddi etiraz edirik. Xüsusilə də Azərbaycanla münasibətləri normal olan ölkələrin rəsmilərinin belə addımlar atması çox üzücüdür. Ancaq bu məsələnin başqa bir tərəfi də var. Ermənistana səfər edən rəsmilər həmin abidəni öz xoşları ilə ziyarət edirmi? Bizim araşdırmalarımız göstərir ki, belə deyil. Rəsmi səfərdə olan nümayəndələr protokol qaydalarına ciddi əməl edirlər. Ermənistan isə həyasızlıq edərək, həmin saxta abidənin ziyarət olunmasını protokol qaydalarına salıb. Bəzi rəsmilər də etiket xatirinə həmin qaydaya əməl edir. Düzdür, Azərbaycanın apardığı təbliğat və etirazlardan sonra bəzi rəsmilər həmin abidəni ziyarət etməkdən imtina edib. Buna istənilən səfərdə olan şəxsin haqqı da çatır. Çünki protokol qaydaları başqa ölkələrə qarşı yönəlməməlidir. Biz belə hadisələrə etirazdan əlavə də işlər görməliyik. Çalışmalıyıq ki, Xocalı soyqırımı abidəsinin ziyarət olunmasını səfərlərin rəsmi protokol qaydasına salaq. Bax, bu onlar üçün ciddi cavab olar. Britaniyalı nazirə gəldikdə isə, onun bu addımı ölkəsinin tutduğu mövqeyə uyğun gəlmir. Çünki Britaniya ilə Azərbaycan arasında normal siyasi əlaqələr mövcuddur. Bütün kanallarla nazirin hərəkətinə etiraz etməliyik. Elə etmək lazımdır ki, növbəti dəfə britaniyalı rəsmilər İrəvanda olarkən protokola kortəbii qaydada əməl etməsinlər”.
Məhəmmədəli QƏRİBLİ
