Əhəd Məmmədli: “Ermənistanın danışıqları boykot etmək cəhdinə yalnız bir cavab ola bilər…”
Məlum olduğu kimi, Ermənistan Silahlı Qüvvələrinin Baş Qərargah rəisi Movses Akopyan xarici işlər naziri Edvard Nalbandyanın işğal olunmuş torpaqların bir hissəsinin Azərbaycana qaytarılması ilə bağlı açıqlamasına etiraz edib. Belə ki, M.Akopyan bildirib ki, işğal olunmuş ərazilərin heç bir hissəsi Azərbaycana qaytarıla bilməz.
Onun sözlərinə görə, təhlükəsizliyin təmin olunması üçün işğal edilmiş bütün rayonların əldə saxlanması vacibdir: “Dağlıq Qarabağ boyunca təhlükəsizlik sistemi yaradılıb. Bu sistemin pozulması acınacaqlı nəticələrə gətirib çıxara bilər”.
Bununla yanaşı, qondarma “DQR”in “xarici işlər naziri” Karen Mirzoyan da bəyan edib ki, Xankəndi Ermənistan xarici işlər naziri Eduard Nalbandyanın bəyanatını ciddi qəbul etmir.
Xatırladaq ki, bir neçə gün əvvəl Ermənistanın xarici işlər naziri E.Nalbandyan İrəvanda “Ermənistan-Diaspora” VI Ümumerməni Forumunda iştirakçıların suallarını cavablandırarkən bildirmişdi ki, “Ermənistan Azərbaycanla Dağlıq Qarabağ münaqişəsinin nizamlanması çərçivəsində Qarabağ zonası üçün təhlükə yaratmayacaq ərazilərin qaytarılmasını müzakirə edir”.
2011-ci ildə isə “Blomberq” nəşrinə müsahibə verən Ermənistan prezidenti Serj Sarkisyan bildirmişdi ki, Kazanda keçirilən danışıqlar zamanı Madrid prinsipləri əsasında Ermənistan işğal etdiyi 7 rayondan 5-ni Azərbaycana qaytarmağa razı olub. Lakin sonrakı mərhələdə Ermənistan danışıqlardan yayınmağa üstünlük verdi.
Hazırda isə Ermənistan ordusunun Baş Qərargah rəisi M.Akopyanın və “DQR”in “xarici işlər naziri” Karen Mirzoyanın bu bəyanatlarla çıxış etməsi onu göstərir ki, Ermənistan yenidən faktiki olaraq danışıqları boykot edir.
Bütün hallarda, Ermənistan rəsmilərinin fərqli-fərqli fikirlər səsləndirməsinə ekspertlər necə yanaşır? Sözügedən məsələni dəyərləndirən politoloq Əhəd Məmmədlinin fikrincə, Rusiyanın Qafqazda forpostu olan Ermənistan Kremlin icazəsi olmadan Qarabağ məsələsində nə geri, nə irəli heç bir addım ata bilməz: “Nalbandyan erməni hakimiyyətində Qərbyönümlü qoluna aiddir. Ermənistanda da realist düşüncəli siyasətçilər çox gözəl anlayır ki, Azərbaycanla bu konfrontasiya siyasətinin sonu yoxdur. Lakin Ermənistanda hakimiyyətdə Qarabağ klanıdır. Həmçinin, bu Qarabağ klanı Rusiya ilə sıx əlaqədardir. Sarkisyanın BMT tribunasından elə özündən razı çıxışının arxasında yalnız bir ölkə dayanır - Rusiya. Ermənistan Qafqazda Rusiyanın forpostudur. Ona görə də forpost sahibinin icazəsi olmadan Qarabağ məsələsində nə geri, nə irəli heç bir addım ata bilməz. Bu səbəbdən də Ermənistan ordusunda Rusiyanın bir nömrəli adamı olan Akopyandan, “DQR”dən kompromisdən uzaq açıqlamalar gəlir. Ermənistanın danışıqları boykot etmək cəhdinə yalnız bir cavab ola bilər. Azərbaycan tərəfindən aprel döyüşlərinə oxşar daha miqyaslı hərbi əməliyyat keçirilməsi və real nəticə ilə başa çatması. Ermənilərə reallığı hiss etdirmək üçün Azərbaycanın bir yolu var, qısa müddətdə hərbi əməliyyatlar keçirib heç olmasa Aran Qarabağı azad etmək. Bundan sonra görün necə həmin ermənilər masa arxasına qayıdıb bizimlə sövdələşmək istəyəcəklər”.
Vidadi ORDAHALLI
