Mehman Muradlı: “Beynəlxalq axtarışa verilmələrinə dair əlaqədar qurumlara müraciət edilməlidir”
ABŞ Konqresinin Nümayəndələr Palatasının üzvləri Frenk Pallone və Tulsi Qebrd işğal altında olan Qarabağa qanunsuz səfər ediblər. Konqresmenlər qondarma qurumun ABŞ-dakı daimi "nümayəndəsi" Robert Avetisyanın, Amerika erməniləri qurultayının həmsədri Entoni Barsamyanın və “Hayastan” fondunun ABŞ bölməsinin rəhbəri Maria Mihranyanın müşayiəti ilə bölgəyə gəliblər.
Frenk Pallone qeyd edib ki, onların fəaliyyəti Amerika cəmiyyətinə Qarabağ haqda həqiqətlərin çatırılmasından ibarətidr: “Arsax beynəlxalq hüquqa uyğun olaraq müstəqillik əldə etmiş hüquqi dövlətdir. Və burada dövlət institutları effektli şəkildə fəaliyyət göstərir”.
Buraya ilk dəfə səfər edən Tulsi Qebrd isə keçmiş hərbçi olaraq bildirib ki, bölgədə yaşayan ermənilərin tələbinin ədalətli həllinə çalışacaq.
Azərbaycan XİN-in mətbuat xidmətinin rəhbəri Hikmət Hacıyev bildirib ki, ABŞ Konqresinin Nümayəndələr Palatasının üzvləri Frenk Pallone və Tulsi Qebrdin Azərbaycanın işğal olunmuş ərazilərinə qanunsuz səfəri məsələsi araşdırılır: “Araşdırma yekunlaşdıqdan sonra onlara münasibətdə müvafiq zəruri addımlar atılacaq. Özünü ABŞ Konqresinin üzvü kimi təqdim edən bu şəxslər artıq uzun illərdir ABŞ erməni lobbisi və Ermənistan tərəfindən maliyyələşdirilirlər və tam şəkildə ABŞ erməni lobbisindən asılı vəziyyətdədirlər".
Konqresmenlərin cəzalandırılması istiqamətində Azərbaycan hansı addımları ata bilər və atmalıdır?
Hüquqşünas Mehman Muradlı hesab edir ki, Azərbaycanın bununla bağlı kifayət qədər təcrübəsi var: “Məsələni fərqli edən cəhət bu dəfə səfər edənlərin rəsmi status daşımasıdır. ABŞ-lı konqresmenlərlə bağlı fəaliyyət həm adi prosedur, həm də dövlət səviyyəsindəki qurumlar vasitəsilə həyata keçirilməlidir. Azərbaycanın tərtib etdiyi “qara siyahı”ya adları mütləq salınmalıdır. Bunun ən başlıca əhəmiyyətli tərəfi budur ki, sabah onlar hansısa nümayəndə heyətinin tərkibində Azərbaycana səfər etmək istəyəndə, arzuolunmaz şəxs kimi geri qaytarılacaqlar. Artıq Xarici İşlər Nazirliyi məsələyə münasibət bildirib. Məhz elə bu qurum vasitəsilə ABŞ-ın bütün dövlət qurumlarına, həmçinin, həmin ölkənin Bakıdakı səfirliyinə etiraz edilməlidir. Sözügedən konqresmenlərin ermənipərəst olmaları aydındır. Vaşinqtonda ermənilərdən pul alıb onları müdafiə etməyi öz həyat kredolarına çeviriblərsə, problem yoxdur. Ancaq qanunverici bir qurumun nümayəndələrinin qanunsuz səfərlə yanaşı, həm də cinayət xarakterli bəyanatlar səsləndirmələri cəzasız qalmamalıdır. Belə adamların toxunulmazlıq kimi immuniteti də olur. Yəqin ona görədir ki, bir az arxayın davranırlar. Rəsmi səviyyədə də qeyd edilib ki, onlarla bağlı müvafiq addımlar atılacaq. Gələcək addımlar isə adlarını “qara siyahı”ya salma, dövlət qurumlarına və onların təmsil olunduğu Konqresə rəsmi etirazın bildirilməsindən ibarət olmalıdır. Beynəlxalq axtarışa verilmələrinə dair də əlaqədar qurumlara müraciət edilməlidir”.
Məhəmmədəli QƏRİBLİ
