Elman Nəsirov: “Bugünkü Ermənistan rəhbərliyi bəşəriyyətə qarşı hərbi cinayət törədib”
Məlum olduğu kimi, Prezident İlham Əliyev BMT tribunasında olduqca sanballı çıxış edərək Ermənistanın Azərbaycana qarşı apardığı işğalçılıq siyasətini ifşa etdi. Bununla, bir növ, dünyanın diqqətini Azərbaycana yönəltdi.
BMT-nin Baş Assambleyasının 72-ci sessiyasındə iştirak edən siyasətçilərin və diplomatların əksəriyyəti Azərbaycan barədə geniş məlumata malik olsalar da, Prezident İlham Əliyevin sessiyanın açılışında etdiyi çıxışdan sonra cəmi 25 illik müstəqilliyə malik Azərbaycanın bu qısa müddət ərzində keçdiyi uzun yol barədə tam məlumat aldıqlarını əminliklə söyləmək olar. İlham Əliyevin çıxışı çoxşaxəli və dolğun olması ilə diqqəti çəkdi. Eyni zamanda, ölkə başçısı çıxışının ilk cümləsindən Ermənistanın Azərbaycanın 20 faiz ərazisini - Dağlıq Qarabağı və ölkəmizin digər 7 rayonunu 25 ildən çox işğal altında saxladığını bildirdi. Bununla yanaşı, İrəvanın özünü işgalçı statusunda niyə bu qədər rahat hiss etdiyini aydın formada izah etdi: “Ermənistan 24 ildir ki, BMT-nin Təhlükəsizlik Şurasının qətnamələrinə məhəl qoymur və əfsuslar ki, o, buna görə cəzalandırılmır. Bəzi hallarda BMT-nin Təhlükəsizlik Şurasının qətnamələri bir neçə gün ərzində icra olunur. Bizə gəldikdə isə 24 ildir ki, qətnamələr icra olunmur. Bu, ikili standarta əsaslanan yanaşmadır. Bu yanaşma qəbuledilməzdir. Ermənistana qarşı beynəlxalq sanksiyalar qəbul edilməlidir”.
İkili standartlar olmasaydı, o zaman Ermənistanın işğalçılıq siyasəti bu həddə gəlib çatmazdı. Ermənistana qarşı konkret sanksiyalar qəbul olunarsa, işğalçı dövlət konstruktiv addımlar atmağa məcbur olacaq.
Bu baxımdan, ölkə başçısının toxunduğu sözügedən məqamları ekspertlər necə dəyərləndirir?
Sözügedən məsələni dəyərləndirən millət vəkili Elman Nəsirovun fikrincə, İlham Əliyev bu çıxışı ilə dünya güclərinə mühüm mesajlar verdi: “Birinci yerdə, həmişəki kimi, Ermənistan-Azərbaycan, Dağlıq Qarabağ münaqişəsi, Ermənistanın təcavüzkar siyasəti və onun ağır nəticələri ilə bağlı məsələlər əksini tapdı. Prezident həmin tədbirdə çıxış edən Ermənistan prezidentini birmənalı şəkildə hərbi cani kimi bütün dünyaya təqdim etdi. Qeyd etdi ki, bugünkü Ermənistan rəhbərliyi bəşəriyyətə qarşı hərbi cinayət törədib, xüsusilə də Xocalı soyqırımını həyata keçirib. Ermənistanın işğalçı siyasəti nəticəsində bir milyondan çox qaçqınımız var və bu gün də ərazimizin 20 %-i işğal altındadır. Prezident qeyd etdi ki, BMT Təhlükəsizlik Şurasının münaqişə ilə bağlı 4 qətnaməsi var. Həmin qətnamələrdə işğalçı qüvvələrin tamamilə, qeyri-şərtsiz Azərbaycan torpaqlarından çıxarılması, sərhədlərin pozulması öz əksini tapıb. Amma bunların heç biri yerinə yetirilmir. Ermənistan bütün bunlara məhəl qoymur. Eyni zamanda, İslam Əməkdaşlıq Təşkilatı, ATƏT, Avropa Şurası Parlament Assambleyası, Avropa İttifaqı və digər beynəlxalq təşkilatlar da münaqişə ilə bağlı analoji sənədlər qəbul edib. Lakin onların da heç biri icra olunmur. Prezident bu yerdə qeyd etdi ki, buna səbəb nədir? Nədən onlara Ermənistan məhəl qoymur? Və cavabını da verərək əsaslandırdı ki, bu ikili standartlarla bağlıdır. Bir halda BMT-nin Təhlükəsizlik Şurasının qərarları iki gün keçməmiş icra olunur, amma bizim münaqişənin üstündən 25 il keçsə də, heç bir icra mexanizmi yoxdur. İkincisi, Prezident bunu ədalətsizlik hesab etdi. Üçüncüsü, belə bir illüziya yaranır ki, Ermənistan cinayət edə bilər, amma cəzasız qalacaq”.
Vidadi ORDAHALLI
