Qulu İsmayılov: "Bununla da Azərbaycan hakimiyyəti deyilən sahədə şəffaflığın təmin olunmasındakı marağını ortaya qoyur"
Prezident İlham Əliyev hasilat sənayesində şəffaflığın və hesabatlılığın təmin edilməsi məqsədilə Hasilat Sənayesində Şəffaflıq üzrə Komissiyanın yaradılması barədə göstəriş verib. Ölkə Prezidentinin imzaladığı fərmanın məqsədi hasilat sənayesində beynəlxalq şəffaflıq və hesabatlılıq prinsiplərinə Azərbaycanın sadiqliyini bir daha vurğulamaq, təbii ehtiyatlardan əldə edilən maddi sərvətlərin vətəndaşlarının rifahı üçün idarə edilməsinin davam etdirilməsi olaraq göstərilir.
Yaradılacaq bu komissiyaya Dövlət Neft Fondunun icraçı direktoru Şahmar Mövsümov sədrlik edəcək. Komissiyanın üzvləri energetika nazirinin müavini Natiq Abbasov, vergilər nazirinin müavini Sahib Ələkbərov, maliyyə nazirinin müavini Emin Hüseynov, iqtisadiyyat nazirinin müavini Sahil Babayev, ekologiya və təbii sərvətlər nazirinin müavini Rauf Hacıyev, Dövlət Statistika Komitəsi sədrinin müavini Yusif Yusifovdur.
Komissiyaya tapşırılıb ki, Azərbaycanda hasilat sənayesi ilə bağlı beynəlxalq prinsiplərə riayət olunmasına nəzarət edilsin. Həmçinin, Azərbaycan Respublikasının hasilat sənayesində şəffaflığın təmin edilməsi məqsədilə dövlət siyasətinin formalaşdırılmasında iştirak etməklə, bu sahədə dövlət orqanlarının və digər qurumların fəaliyyətini əlaqələndirsin.
Qeyd edək ki, bu ilin mart ayında Mədən Sənayesində Şəffaflıq Təşəbbüsünün Kolumbiyanın Boqota şəhərində keçirilən kollegiya iclasında Azərbaycanla bağlı qəbul edilən qərardan sonra ölkəmiz qurumdan çıxmaq barədə bəyanat verib.
Belə komissiyanın yaradılmasının ölkəmizin beynəlxalq imici üçün nə kimi təsiri olacaq?
İqtisadçı Qulu İsmayılovun sözlərinə görə, Azərbaycan EİTİ-ni tərk etdikdən sonra bir boşluq yaranıb: "Ümumən Prezidentin imzaladığı fərmanı müsbət adlandıra bilərik. Təbii ki, bunun ölkəmizin imicinə müsbət təsiri olacaq. Fərmandan irəli gələn nəticənin necə olacağını isə zaman göstərəcək.
EİTİ kimi təşkilata üzvlüyün məqsədi şirkətlərin gəlirlərində şəffaflığı təmin etmək və etimadsızlıq olmaması üçün cəmiyyətlə hökumət arasında körpü yaratmaq olub. Çünki inkişaf etmiş ölkələrdə vətəndaş cəmiyyəti institutları hökumətin işinə ciddi nəzarət edir. Buna ictimai nəzarət də deyirlər. EİTİ də məhz buna görə yaranmışdı. Ancaq Azərbaycana bəslənən qərəzli münasibət bizim oranı tərk etməyimizlə nəticələndi. EİTİ-yə üzv olmaq əsas məsələ sayılmır. Vacib məsələ iqtisadiyyatı necə idarə etməkdir.
EİTİ-yə qayıdıb-qayıtmamağın bizim üçün prinsipial əhəmiyyəti ona görə olmayacaq ki, artıq daxildə belə bir komissiya yaradılıb. Bununla da Azərbaycan hakimiyyəti deyilən sahədə şəffaflığın təmin olunmasındakı marağını ortaya qoyur. EİTİ-dən çıxmaqla bağlı verilən bəzi qeyri-obyektiv şərhlərə ən tutarlı arqument oldu. Təbii ki, bunun ölkəmizin nüfuzuna yalnız müsbət təsiri ola bilər".
Məhəmmədəli QƏRİBLİ
