"Həm Moskva ilə dostluq edib, həm də NATO-ya qucaq açmaq mümkün deyil"
Ermənistanın müdafiə naziri Vigen Sarkisyan "Valday" adlı tədbirdəki çıxışında bildirib ki, ölkəsi NATO ilə Rusiya arasında dialoq kanalı rolunu oynaya bilər.
Nazir bildirib ki, ölkəsi, digər SSRİ respublikaları kimi, köhnə quruluşun dağılmasından sonra Şimali Atlantika Bloku ilə intensiv danışıqlara başlayıb və bu gün də həmin təmasları davam etdirir: "Rusiya da bizim kimi ölkə vasitəsilə NATO ilə şəffaf əlaqələrini tənzimləyə bilər. Ermənistan həm KTMT-nin üzvüdür, həm də NATO ilə sıx əlaqələrə malikdir. Hər iki tərəf bundan istifadə etməklə ciddi naticələr əldə edə bilər".
Ekspert Aqşin Əliyev qəzetimizə açıqlamasında erməni nazirin bu açıqlamasını gülməli adlandırdı: "Artıq vəziyyət o həddə çatıb ki, Ermənistan rəsmiləri illüzianist yanaşmalar ortaya qoyur. Yəni NATO və Rusiya o günə qalıb ki, münasibətlərini Ermənistan vasitəsilə tənzimləməyə üstünlük versin? Ermənistan, faktiki olaraq, NATO ilə əks qütbdə dayanan bir silahlı qurumun tərkibindədir. Əksinə, KTMT-nin üzvü olmaq NATO-nu həmin ölkədən aralayan faktordur. NATO ilə danışıqlar aparmaq heç də həmin qurumun Ermənistana tam güvəndiyi anlamına gələ bilməz. Son vaxtlar Sarkisyan hakimiyyətində belə meyllər nəzərə çarpır. Onlar aprel seçkilərində Qərbin təzyiqindən çox ehtiyat edir. Bu səbəbdən də Rusiyanın icazəsilə belə açıqlamalar verməyə başlayıblar. Qərb və NATO Ermənistanın bu bleflərini tam dərk edir və onların səmimiyyətinə qətiyyən inanmır. İkinci bir tərəfdən isə, Ermənistan hansı şəffaflıqdan danışa bilər ki, onu bu keyfiyyətinə görə böyük güclər vasitəçi etsin? Hesab edirəm ki, son vaxtlar Ermənistan rəsmilərinin Qərbə yönəlik reveransları qarşıdan gələn seçkilərdə həmin dairələrin təzyiqlərini neytrallaşdırmağa hesabalanıb. Ermənistan öz siyasi yönümünü müəyyən edərək, özünü Rusiyanın vassalına çevirən, işğalçı bir ölkə kimi tanınır. Həm Moskva ilə dostluq edib, həm də NATO-ya qucaq açmaq mümkün deyil".
Məhəmmədəli QƏRİBLİ