"NATO təcili olaraq bu məsələyə reaksiya verməlidir"
Ermənistanın müdafiə naziri Vigen Sarkisyan İrəvanda keçirilən mətbuat konfranslarından birində ölkəsinin Kosovoda sülhməralı kontingent tərkibində təmsil olunmasından danışıb. Nə qədər qəribə olsa da, nazir NATO-nun bayrağı altında aparılan prosesi özünəməxsus tərzdə qiymətləndirib. O bildirib ki, Ermənistan sülhməramlıları həmin ölkədə xristian dəyərlərini, abidələrini və əhalisini mühafizə edir.
Bu gün NATO-nun həmin ərazidə sülhü təmin etmək missiyasını yalnız bir dinin dəyərlərinin mühafizə olunması prizmasından təqdim etmək necə qiymətləndirilə bilər? NATO-nun missiyasını əslində aşağılayan bu cür təxribatlara NATO niyə reaksiya vermir?
Ekspert Elşən Mustafayev qəzetimizə bildirdi ki, Ermənistan bu açıqlaması ilə NATO-nun adına xələl gətirmiş olur:
"Həmin qurumla əməkdaşlıq etmək istəyənlər sülh naminə tərəfdaşlığın prinsiplərinə əsaslanmaqla, NATO ilə ortaq maraq kəsb edən geniş spektrli məsələlər üzrə siyasi dialoq aparır. Müxtəlif formatlarda və səviyyələrdə aparılan dialoq çərçivəsində tərəfdaşlıq, regional təhlükəsizlik, əməliyyatlarda iştirak və s. aktual məsələlər müzakirə olunur, eləcə də praktiki əməkdaşlığın vəziyyətinə qiymət verilir. NATO bu gün qlobal təhlükəsizliyin qarantlarından biri kimi çıxış edir. Bu gün baş verən hadisələr və NATO-nun bir qədər səssizliyi, əslində, onun məsələyə biganəliyindən xəbər vermir. NATO beynəlxalq norma və qəbul olunan qaydalara görə öz siyasətini formalaşdırır. NATO iyirmi səkkiz ölkənin hərbi və siyasi birliyidir, burada qəbul olunan qərarlara gərək bütün üzv ölkələr izn versin, əks təqdirdə istənilən qərar ləğv oluna bilər. Bu baxımdan da onun hansısa siyasətinə Ermənistan adlanan kiçik bir ölkənin naziri səviyyəsində aydınlıq gətirilməsi ciddi səhvdir. Kosovoda NATO-nun funksiyası sülhü, təhlükəsizliyi təmin etməkdir. Orada yalnız xristian maraqları qoruna bilməz. Bu, təşkilatın məqsəd və məramlarına yaddır. Ermənistan bu yanaşması ilə dini ədavəti qızışdırmaq mövqeyini tutur. Çünki həmin gərginlik nöqtəsində yalnız xristianlar deyil, eyni zamanda müsəlmanlar da təmsil olunur. NATO təcili olaraq bu məsələyə reaksiya verməlidir. Əks halda, Ermənistan kimi həyasız xislətli bir ölkə bundan sonra nüfuzlu alyansın adından bəyanatlar verməklə məşğul olacaq".
Məhəmmədəli QƏRİBLİ