Məhəmməd Əsədullazadə: "XİN rəhbərləri səviyyəsində müzakirələr, sadəcə, danışıqlar xatirinədir"
Rusiya və Azərbaycan xarici işlər nazirləri Sergey Lavrov və Elmar Məmmədyarov Moskvada görüşüb. Bu danışıqlarda XİN rəhbərlərinin ikitərəfli gündəlik məsələləri, əsas regional və beynəlxalq problemləri və Dağlıq Qarabağ münaqişəsini müzakirə etməsi barədə məlumat yayılıb.
"Rusiya artıq 20 ildən çoxdur Dağlıq Qarabağ münaqişəsinin nizamlanmasında əsas vasitəçi kimi və ATƏT-in Minsk Qrupunun həmsədri qismində çıxış edir. Xalqlarımızın ümumi tarixi və coğrafi yaxınlığını nəzərə alaraq, bu münaqişənin həlli bizim üçün birinci dərəcəli əhəmiyyətə malikdir", - Rusiya XİN-də deyiblər.
Nazirlikdə qeyd ediblər ki, Rusiya və Azərbaycanı bərabərlik, bir-birinin maraqlarına hörmət və mehriban qonşuluq əsasında qurulmuş strateji tərəfdaşlıq münasibətləri birləşdirir. Hazırda iki ölkə arasında 80-dən çox dövlətlərarası və hökumətlərarası saziş imzalanıb.
"Ticari-iqtisadi əməkdaşlıq uğurla inkişaf edir. Rusiya-Azərbaycan ticarət dövriyyəsi 2016-ci ilin yekunlarına görə 1954,3 mln. dollar təşkil edib", - nazirlikdə qeyd ediblər.
Nazirlikdən qeyd ediblər ki, regionlararası əməkdaşlıq Rusiya-Azərbaycan münasibətlərinin mühüm tərkib hissələrindən biridir.
Məlumdur ki, iki ölkənin baş diplomatları arasında baş tutan görüşdə başlıca müzakirə mövzusu Qarabağ münaqişəsidir. Lavrov bir müddət əvvəl Ermənistan xarici işlər naziri Nalbandyanla Moskvada təkbətək görüşüb. Moskvanın tərəflərlə tək görüş formatına üstünlük verməsi nə ilə əlaqələndirilə bilər?
Politoloq Məhəmməd Əsədullazadənin sözlərinə görə, Moskvanın ikibaşlı Qarabağ siyasəti Cənubi Qafqazda təhlükəsizliyə ciddi maneədir: "Moskvanın regionda hərbi forpostu olan Ermənistan Rusiyanın imperiya ambisiyalarını həyata keçirməkdə bir vasitədir. Ermənistan 25 ildən artıqdır Azərbaycana qarşı işğalçı siyasətini davam etdirir. Rəsmi Kreml bu münaqişədə özünü moderator kimi aparsa da, məhz onun təhriki ilə problem uzun illərdir öz həllini tapmır.
Bir müddət bundan əvvəl Moskvada Ermənistan XİN rəhbəri E.Nalbandyanı qəbul edən Rusiya XİN rəhbəri S.Lavrov Dağlıq Qarabağ münaqişəsinin nizamlanmasını ikili müzakirə etdi. Bunun ardınca azərbaycanlı həmkarını Moskvaya dəvət etdi. Qeyd edim ki, bu görüşlər təmas xəttində atəşkəsin intensiv şəkildə pozulması fonunda baş verməkdədir. Rəsmi Kreml çalışır ki, Moskvada üçtərəfli görüşlər təşkil edərək, tərəflərə yeni həll variantı irəli sürsün. İlk əvvəl erməni həmkarı ilə danışıqlar aparan Lavrov ilk təklifləri erməni tərəfinə irəli sürüb. Bu görüşlərdən əvvəl E.Məmmədyarov Moskva görüşlərindən hər hansı optimist nəticə gözləmədiyini də vurğulamışdı. Sadəcə, Moskvadan gələn təklifi geri çevirməyərək, yenidən görüşə getdi. Çünki Rusiyanın təklif etdiyi yeni həll variantı, şübhəsiz, "Paket həlli" özündə ehtiva edir. Bunda da yeni bir detal yoxdur.
Qeyd etmək lazımdır ki, Rusiya hazırkı situasiyada Qarabağ münaqişəsinin həllində maraqlı deyil. Ermənistanda yaxınlaşan parlament seçkiləri ərəfəsində Rusiyanın Ermənistanı hər hansı kompromisə məcbur etməsi gözlənilmir. Çünki bu kompromislər Ermənistanda siyasi böhrana yol açar və Sarkisyan rejiminin iflası ilə nəticələnə biləcək proseslərə aparar.
E.Məmmədyarova Lavrov öz təkliflərini irəli sürsə də, bunun qəbul ediməsi gözlənilmir. Rusiyanın bu təşəbbüsləri, demək olar ki, uğursuzdur. Çünki Rusiya Azərbaycan və Ermənistan prezidentlərinin görüşünü bir neçə dəfə təşkil edib və heç bir nəticə hasil olmayıb. İndi də XİN rəhbərləri səviyyəsində müzakirələr, sadəcə, danışıqlar xatirinədir. Bununla rəsmi Moskva barışdırıcı missiya görüntüsü yaratmaq niyyətindədir".
Məhəmmədəli QƏRİBLİ