"Sarkisyanın Rusiyanın maraq dairəsindən çıxdığını demək olmaz"
Ermənistanda keçirələcək parlament seçkilərinə az vaxt qalır. Sarkisyan iqtidarına müxalif olan qüvvələr birgə mübarizəyə başlayıb. Keçmiş müdafiə naziri Seyran Ohanyan, sabiq xarici işlər naziri Vardan Oskanyan və "İrs" partiyasının sədri Raffi Ovanisyanın iştirakı ilə "Ohanyan-Raffi-Oskanyan" bloku yaranıb. Seçkilər yaxınlaşdıqca, hakimiyyətə qarşı etirazlar artır.
İşğalçı Ermənistanın prezidenti Serj Sarkisyanın apardığı uğursuz dövlət siyasətinin nəticəsidir ki, ölkədə getdikcə həm siyasi, həm də iqtisadi vəziyyət iflic halına düşüb. Ermənistanda yaranmış gərginliyin iqtisadi aspektlərinə gəldikdə isə, qeyd etmək lazımdır ki, son vaxtlar iqtisadi təlatüm nəticəsində, ölkədə istehlak və ərzaq məhsullarının qiymətlərinin artması ilə yanaşı, erməni dramının dollara nisbətdə dəyərinin düşməsi iqtisadiyyatda inflyasiyanın artmasına gətirib çıxarıb.
Xüsusilə Serj Sarkisyanın son açıqlamaları ictimai-siyasi kəsimi sakitləşdirmək əvəzinə, ictimai qəzəbi daha da artırıb. Yerli media ölkə başçısını riyakarlıqda suçlayır, müxalifət isə hakim rejimi növbəti silahlı üsyanla hədələyir. Bu arada ölkə müxalifətinin tələblərindən biri Ermənistanın Avrasiya İqtisadi Birliyindən çıxması ilə bağlıdır. Müxalifət hesab edir ki, sözügedən birlik ölkə üçün sərfəli deyil. Maraqlıdır, siyasi ekspertlər seçkiqabağı Ermənistanda baş verən bu prosesləri necə dəyərləndirir?
Sözügedən məsələni dəyərləndirən politoloq Elşən Manafovun fikrincə, müxalifətə Qərb dəstək versə, onların seçkilərdə qələbə qazanmaq şansı var: "Onsuz da Ermənistanda Sarkisyanın həyata keçirdiyi siyasətdən narazılar kifayət qədər çoxdur. Bu narazılığın səbəbi də bəllidir. Ölkədə sosial durum, siyasi vəziyyət, miqrant axını və digər amillər erməni cəmiyyətini mövcud hakimiyyətdən narazı salır. Digər tərəfdən, Sarkisyan hakimiyyətinin Qarabağla bağlı tutduğu mövqe və son zamanlar Ermənistan ordusunun cəbhədə ağır məğlubiyyətlərə düçar olması mövcud siyasi elitanın reytinqinə mənfi təsir göstərdi. Amma unutmaq lazım deyil ki, bu iqtidar legitim olmasa da, Rusiyanın maraqları və dəstəyi şəraitində öz hakimiyyətini qoruya bilib. Hesab edirəm ki, bundan əlavə, Sarkisyana qarşı müxalif mövqedə duran bütün qüvvələrin birləşməsinə ciddi ehtiyac yaranacaq. Birləşmiş müxalifətə Qərb ciddi dəstək verməsə, Sarkisyanın devrilməsi mümkün görünmür. Son dəyişiklərə görə artıq Ermənistan parlamentli dövlət olacaq və hökumət artıq parlament qarşısında məsuliyyət daşıyacaq. Sarkisyan da bu mənada manevr etməyə çalışacaq. Hərçənd ki, Sarkisyanın rəhbərlik etdiyi partiyanın da elə bir gücü və nüfuzu yoxdur. Ancaq, hər bir halda, Sarkisyanın Rusiyanın nəzarətində olan müxalif qüvvələrə təsir imkanları yetərli qədərdir. Hesab edirəm ki, Sarkisyan bu imkanlardan istifadə edərək, Qərbin dəstək verə biləcəyi müxalifəti parçalamağa cəhd göstərəcək. Sarkisyanın Rusiyanın maraq dairəsindən çıxdığını demək olmaz. Sarkisyan iqtidarı Rusiyanın maraq dairəsindən və məsləhət gördüyü "qırmızı xətdən" kənar çıxmayıb. Bu iqtidar Rusiyanın dediklərindən kənara çıxmırsa, güman etmirəm ki, Rusiya Sarkisyan hakimiyyətini dəyişməkdə maraqlı olsun".
Vidadi ORDAHALLI