Günel Fərhadqızı: "Həmin layihənin "Cənub Qaz Dəhlizi"nə inteqrasiya olunması üçün heç bir maneə görmürəm"
"Cənub Qaz Dəhlizi" layihəsinin maliyyə dəyəri bu gün 40 milyard dollardır. Bunu Azərbaycanın energetika naziri Natiq Əliyev CQD Məşvərət Şurasının üçüncü iclasından sonra keçirilən mətbuat konfransında bildirib. N.Əliyev layihənin Azərbaycan dövləti və Avropa Komissiyası tərəfindən "yüksək səviyyədə dəstəkləndiyini" deyib.
"Bu, hörmətli Prezidentimizin təşəbbüsü ilə yaradılıb və Avropa Komissiyası tərəfindən yüksək səviyyədə dəstəklənib və bir neçə ildir bu layihə həyata keçirilir", energetika naziri bildirib.
N.Əliyev layihənin əhəmiyyətindən danışaraq bildirib ki, "belə bir layihənin həyata keçirilməsi hər bir dövlətdən böyük səylər tələb edir".
Nazir daha sonra əlavə edib: "Biz artıq ilk qazı "Şahdəniz-2" layihəsi çərçivəsində Türkiyəyə gətirəcəyik. 2020-ci ilin əvvəlində nəzərdə tuturuq ki, təbii qaz İtaliyaya çatacaq.
Biz gələcəyə də baxdıq. Balkan ölkələrinin enerji nazirləri də bizimlə birgə idilər... Bu məqsədlə İonik-Adriatik boru kəməri şirkətlərinin rəhbərləri də bizə layihənin gələcəyini necə gördüklərini dedilər."
Göründüyü kimi, N.Əliyev İon-Adriatik xəttinin də "Cənub Qaz Dəhlizi"nə inteqrasiya oluna biləcəyinə işarə edib. Bu iki layihənin inteqrasiya perspektivi nə dərəcədə real görünə bilər?
Ekspert Günel Fərhadqızının sözlərinə görə, İon-Adriatik qaz boru kəməri layihəsi Monteneqroya Azərbaycanın təbii qazının çatdırılması üçün yeganə mənbədir: "Bilirsiniz ki, Bakıda keçirilən "Cənub Qaz Dəhlizi" Məşvərət Şurası çərçivəsində nazirlərin üçüncü görüşündə Monteneqronun iqtisadiyyat naziri də iştirak edib. İon-Adriatik qaz boru kəməri layihəsinin keçdiyi hər bir ölkədə icra işləri xeyli irəliləyib. Xorvatiyada artıq layihələndirmə prosesinə başlanıb. Monteneqro və Albaniyada isə hazırlıq işləri davam etdirilir.
İon-Adriatik boru kəməri Avropanın və dünyanın bu hissəsi üçün ən yüksək prioritet təşkil edən enerji layihələrindəndir. Avropanın bir sıra ölkələri layihənin mümkün qədər tez icra olunmasında maraqlıdır. Monteneqroda təbii qaz yoxdur. Layihə onların qaz təminatı üçün yeganə mənbədir. Bu layihə Azərbaycan qazının Avropaya və eyni zamanda Avropanın qərbindən şərqinə çatdırılmasında rol oynayacaq. Həmin layihənin "Cənub Qaz Dəhlizi"nə inteqrasiya olunması üçün heç bir maneə görmürəm. Çünki iştirakçı olan tərəflərin hər biri buna razıdır".
Məhəmmədəli QƏRİBLİ
