Son dövrlərdə Ermənistan iqtidarı ilə dünyanın müxtəlif ölkələrinə səpələnmiş erməni diasporu arasında münasibətlərin əhəmiyyətli dərəcədə kəskinləşməsi müşahidə olunur. Artıq bu fonda erməni diasporunun Ermənistana etdiyi yardımların miqdarında da əhəmiyyətli dərəcədə azalmalar var.
Hesab olunur ki, bu durum Ermənistanın indiki prezidenti Serj Sarkisyanın vəziyyətini daha da ağırlaşdıracaq. Digər tərəfdən, Sarkisyana qarşı olan müxaliflərə erməni diasporunun etdiyi yardımların, xüsusən də maliyyə dəstəyinin artması gözlənir. Digər tərəfdən, hökumətdə son kadr dəyişiklikləri nəticəsində Sarkisyanın hakimiyyətdən uzaqlaşdırdığı məmurlar da yeni müxalif cəbhə yaradıblar. Hazırda bu qüvvələr Ermənistanda sabiq prezident Robert Köçəryana yaxın olan keçmiş xarici işlər naziri Vardan Oskanyanın yaratdığı "Çiçəklənən Ermənistan" partiyası ətrafında cəmlənir. Hətta keçmiş müdafiə naziri Seyran Ohanyanın da burada yer aldığına dair iddialar var. Daha bir maraqlı məqam isə "Çiçəklənən Ermənistan" partiyasının lideri Qaqik Tsarukyanın gözlənilmədən siyasətə dönüşüdür. Çarukyan adıçəkilən partiyanın Siyasi Şurasının iclasında onun qayıtmasını xahiş edən bəyanata müsbət cavab verib. Partiyanın bununla bağlı bəyanatında deyilir: "Çiçəklənən Ermənistan" Partiyasının Siyasi Şurası on minlərlə vətəndaşımız adından partiyanın təsisçi sədri Qaqik Tsarukyandan fəal siyasətə qayıdıb, xalqın dəstəyi və birgə səylərimizlə ölkəmiz qarşısında duran vəzifələrin həllinə qatılmaq məsələsini müzakirə etməsini xahiş edir".
Xatırladaq ki, Qaqik Tsarukyan Ermənistan hakimiyyətini sərt tənqid etməyə başlayan kimi Serj Sarkisyan ona qarşı hücuma keçdi. Sarkisyan Tsarukyanın xalq arasında ləqəbinin "Kütbeyin Qaqo" olduğunu xatırladaraq, onun intellektinin siyasətlə məşğul olmağa imkan vermədiyini demiş və oliqarxın biznesini yoxlamağı əmr etmişdi. Sarkisyan o vaxt bildirirdi ki, Tsarukyanla bağlı indiki vəziyyətin yaranmasında onun da günahı var. Çünki illər əvvəl Tsarukyanı öz himayəsinə götürüb: "Məhz mən illərlə sizə onun bütün axmaqlıqlarına publika qarşısında reaksiya verməyi qadağan etmişəm, bu xaosu şəxsən əngəlləmişəm. Və hamıya qadağan etmişəm ki, xalq tərəfindən ona verilmiş "Dodi Qaqo" ("Kütbeyin Qaqo") ləqəbini istifadə etməsinlər. Demişəm ki, səhvlərini düzəldər. Mənim bu zaman hansısa şəxsi marağım olmayıb, mən bəlli problemi ört-basdır edib onun çoxları üçün problemə çevrilməsinin qarşısını almaq istəmişəm". Tsarukyan da həmin vaxt Sarkisyanın onun barəsində sərt və təhqiramiz çıxışına reaksiya verərək, Ermənistan prezidentinə "səviyyəsiz" deyirdi. O bildirirdi ki, Ermənistanda hakimiyyət dəyişikliyinin vaxtı çatıb və bu hədəf uğrunda ölkənin bütün əsas siyasi qüvvələri birləşib. Sarkisyanı devirmək üçün hərəkətə keçən oliqarx prezidentin çıxışının təkcə ona qarşı yox, bütün erməni xalqına qarşı olduğunu bildirirdi: "Biz hamımız bilirik ki, ölkəmiz hansı vəziyyətdədir və bunun üçün kim məsuliyyət daşıyır. Mən böyük siyasətə ancaq bir məqsədlə ayaq basdım - öz ölkəmə və xalqıma yaranmış vəziyyətdən çıxmağa kömək etmək". Tsarukyanın sözlərinə görə, Sarkisyanın hakimiyyəti dövründə Ermənistanda iqtisadiyyat biabırçı səviyyədə geriləyib, investisiyalar kəskin azalıb, yoxsulluq artıb, ancaq əvəzində onun öz biznesi sürətlə inkişaf edib: "Biznesin terror edilməsi dövlət siyasətinə çevrilib. Ölkəni dəhşətli miqrasiya bürüyüb, maliyyə vəziyyəti laxlayıb. Bütöv kəndlər, insanların evləri və əmlakı banklara girov qoyulub". Lakin sonradan erməni diasporu Tsarukyanla Sarkisyanı barışdırdı. Əvəzində Tsarukyan siyasətdən getdi. Amma indi o, siyasətə qayıdır və erməni mediası yazır ki, Tsarukyanın Sarkisyana qarşı çıxmasının arxasında Robert Köçəryan dayanır.
Hazırda "Çiçəklənən Ermənistan" Partiyasına rəhbərlik edən Naira Zohrabyan deyir ki, bu partiya hakimiyyət dəyişikliyi istiqamətində mübarizə edəcək: "Tsarukyan ciddi sistem dəyişiklikləri həyata keçirmək üçün qayıdır. Siyasi proseslərdə nə cür və hansı formatda iştirak edəcəyi isə, ümid edirəm ki, yaxın günlərdə məlum olar. Hər bir siyasi xadim hər hansı siyasi prosesdə iştirakına dair qərarı özü qəbul edir. "Çiçəklənən Ermənistan" Partiyası siyasi kursunu dəyişməyib və dəyişməyə hazırlaşmır". Xatırladaq ki, Ermənistanda ötən ilin sonunda baş tutan referendumdan sonra prezidentin səlahiyyətləri azaldılıb. Əvəzində ölkə parlamentli respublika olub. Bu isə hazırkı prezident Sarkisyana öz partiyasının başında seçkilərdə "qələbə çalaraq" baş nazir postunu tutmaqla yenidən hakimiyyətdə qalmaq imkanı verir. Amma o da var ki, Ermənistanda mövcud olan aclıq, insanların səfalət içində yaşaması, ən adi insan haqlarının rejim tərəfindən tapdanması Sarkisyana qarşı narazılığı artırıb. Belə bir ərəfədə Robert Köçəryanın ətrafında birləşən qüvvələr parlament seçkilərində Sarkisyana qarşı güclü müxalifət yaradır. Erməni diasporu Ermənistanda hakimiyyətin siyasəti nəticəsində baş verənlərdən qəzəblənib və ölkədə fundamental islahatların keçirilməsini tələb edir. Beləliklə, gəlinən qənaət budur ki, gələn ilin aprelində baş tutacaq parlament seçkiləri ərəfəsində hakim rejim üçün vəziyyət o qədər də ürəkaçan olmayacaq. Xüsusən də prosesə erməni diasporunun qatılması vəziyyəti gərginləşdirir. Bu gedişlə diasporun köməyilə Köçəryanın Sarkisyanı devirməsi istisna olunmur.
Nahid SALAYEV