Vüqar Qədirov: "Hesab edirəm ki, bu mövzu daim diqqətdə saxlanmalıdır"
"Ermənistanın işğal etdiyi Azərbaycan ərazilərində qanunsuz iqtisadi və digər fəaliyyəti təşkilatın öz prinsipləri ilə ziddir. Azərbaycan bununla bağlı öz narazılığını bildirir və xüsusən ATƏT çərçivəsində qəbul olunmuş beynəlxalq öhdəliklərinə uyğun olaraq bu fəaliyyətə son qoymaq üçün müvafiq tədbirlər görməyə çağırır".
Bu barədə Azərbaycanın ATƏT-dəki nümayəndəliyinin təşkilatın daimi şurasının iclasında yayılan bəyanatında deyilir. Bəyanatda bildirilir ki, Azərbaycan əhalisinə qarşı hüquq və azadlıqların bu cür fundamental pozulması ATƏT öhdəliklərinin kobud şəkildə pozulması deməkdir: "Azərbaycan dəfələrlə üçüncü ölkənin işğal olunmuş Azərbaycan ərazisində iqtisadi və digər fəaliyyəti barədə çoxsaylı faktlar təqdim edib".
Nümayəndəliyin bəyanatında qeyd edilir ki, bu qanunsuz fəaliyyət Azərbaycanın işğal olunmuş ərazilərində birbaşa və ya dolayı yolla demoqrafik tərkibi dəyişir, ermənilərin sayı çoxaldılmaqla didərgin düşmüş azərbaycanlıların öz evlərinə qayıtmasının qarşısı alınır.
"Biz yenidən ATƏT üzvlərini Azərbaycanın işğal olumuş ərazilərində istənilən fiziki və hüquqi şəxslərin fəaliyyətinin qarşısını almaq üçün təcili və effektiv tədbirlər görməyə çağırırıq".
Bu bəyanatda səsləndirilən faktlar hansı nəticəyə səbəb ola bilər?
Qaçqın və Məcburi Köçkün Gəncləri İctimai Birliyinin sədri Vüqar Qədirov qəzetimizə açıqlamasında bildirdi ki, ATƏT-dəki daimi nümayəndəliyimizin bu bəyanatı tamamilə real faktları özündə əks etdirir: "İş burasındadır ki, həmin qurum üzərinə düşən vasitəçilik missiyasını yerinə yetirə bilmədiyi səbəbindən, konfliktin həlli onilliklərlə uzanır. Bunun da nəticəsində Ermənistan işğal etdiyi torpaqlardan geri çəkilmir. Ancaq Ermənistanın birbaşa təşkilatçılığı ilə ora xarici investisiya cəlb edilir. İşğal altındakı bölgənin turizm potensialı geniş reklam olunur. İş adamlarını ora sərmayə qoymağa çağırırlar. Təəssüflər olsun ki, ATƏT təşkilatın prinsiplərilə uzlaşmayan həmin fəaliyyətlərə etiraz etmir. Nümayəndəlik bəyan edir ki, bununla bağlı konkret faktları onlara təqdim ediblər. Bundan əvvəl də işğal olunmuş ərazilərdəki qanunsuz fəaliyyət haqda məlumatlar tərəfimizdən beynəlxalq qurumlara dəfələrlə təqdim olunub. Həmin ərazilərdən ermənilərin narkotranzit və plantasiya kimi istifadə etməsinə dair məlumatlar mövcuddur. Bunlar kifayətdir ki, ATƏT və digər qurumlar Ermənistanın Dağlıq Qarabağ ərazisindəki qanunsuz iqtisadi və kriminal fəaliyyətinin qarşısını alsın. Bu edilmədiyi səbəbindən nümayəndəlik haqlı bəyanatla çıxış edib. Hesab edirəm ki, bu mövzu daim diqqətdə saxlanmalıdır. Qondarma rejimin nəzarət etdiyi işğal olunmuş ərazilərdəki demoqrafik göstəricinin də dəyişilməsinə imkan vermək olmaz. Bunu ermənilər gələcəyə hesablayaraq edirlər".
Məhəmmədəli QƏRİBLİ