Qabil Hüseynli: "Bu baxımdan da məsuliyyət Ermənistanın və onu bu danışıqlara məcbur edə biləcək həmsədrlərin üzərinə düşür"
ATƏT-in Minsk Qrupunun həmsədrləri Azərbaycan və Ermənistan prezidentləri - İlham Əliyev və Serj Sarkisyanın Dağlıq Qarabağ münaqişəsinin nizamlanması üzrə növbəti görüşün keçirilməsinə razılıq verəcəyinə ümid edir. Bunu ATƏT-in Minsk Qrupunun ABŞ-dan olan həmsədri Ceyms Uorlik deyib.
Qeyd edək ki, bundan əvvəl Azərbaycan və Ermənistanın dövlət başçılarının görüşü RF prezidenti Vladimir Putinin iştirakı ilə iyunun 20-də Sankt-Peterburqda baş tutub.
"Növbəti görüş üçün prezidentlərin razılığına ümid edirik. Hazırda növbəti görüşün vaxtı və yeri müəyyən edilməyib", - deyə Uorlik əlavə edib. Onun sözlərinə görə, həmsədrlər bu razılıq üçün tərəflərlə iş aparır.
"Həmsədrlər Nyu-Yorkda BMT Baş Assambleyasında Ermənistan və Azərbaycanın xarici işlər nazirləri ilə ayrılıqda görüşlər keçirib. Görüşlərdə Vyana və Sankt-Peterburqda əldə olunmuş razılıqlar, eləcə də gələcək addımlar müzakirə olunub. Ayın sonunda regiona səfərimiz zamanı tərəflərlə görüş keçirməyi və məsələləri müzakirə etməyi planlaşdırırıq", - deyə Uorlik əlavə edib.
Həmsədrin prezidentlərin görüşünün baş tutması ilə bağlı məsələni sırf ölkə başçılarının üzərinə qoyması hansı mənanı daşıyır?
Politoloq Qabil Hüseynlinin sözlərinə görə, əvvəl Ermənistan guya ölkədə qiyam olacağına və Sarkisyanın devriləcəyinə dair mülahizələr irəli sürdü: "Ancaq bu çox qısa çəkdi, elə ki, yay başladı, hər şey yenidən qaydasına düşdü. İndi isə nəzərdə tutulan prezidentlərin görüşündən yayınırlar.
Sonra bəhanə kimi Ermənistanda hökumət dəyişikliklərini əsas gətirdilər. Nəticə etibarilə, Dağlıq Qarabağa dair danışıqlar uzandı. Hazırkı ərəfədə Moskva bu məsələdə kifayət qədər könülsüz görünür. Rusiya Qarabağ məsələsinin həllində hərəkətə keçmir. Azərbaycan tərəfi konkret təkliflər gözləyir. Dəfələrlə bəyan olunub ki, biz görüş xatirinə görüş istəmirik. Bu baxımdan da məsuliyyət Ermənistanın və onu bu danışıqlara məcbur edə biləcək həmsədrlərin üzərinə düşür.
Hər halda, prezidentlərin növbəti görüş yeri olaraq Amerikanın adının çəkilməsi bəzi mətləblərdən xəbər verir. Cərəyan edən siyasi proseslər hələ ki, gedişata bir aydınlıq gətirməyib. Ancaq hesab edirəm ki, Rusiyanın passivləşməsi fonunda Qərb və ABŞ səylərini artıra bilər".
Məhəmmədəli QƏRİBLİ