Məhərrəm Zülfüqarlı: "Hesab edirəm ki, bu, Azərbaycanın, aparılan siyasətin uğurudur"
Avropa Şurası Parlament Assambleyasında (AŞPA) Azərbaycanda keçirilən referendum ayrılıqda müzakirə olunmayacaq. Bunu mətbuata açıqlamasında Azərbaycanın AŞPA-dakı nümayəndə heyətinin rəhbəri Səməd Seyidov bildirib.
O deyib ki, AŞPA-nın hər bir sessiyası başlayanda Avropa Şurasının yarım il ərzində gördüyü işlər haqqında ümumi məlumat verilir: "Ola bilər ki, bu kontekstdə Azərbaycanda keçirilən referenduma toxunulsun. Ancaq ayrılıqda Avropa Şurası Parlament Assambleyasında Azərbaycanda keçirilən referendumla bağlı müzakirə nəzərdə tutulmayıb".
Avropa Şurası Venesiya Komissiyasının Azərbaycan Konstitusiyasına təklif olunan dəyişiklik və əlavələrlə bağlı rəyinə də toxunan S.Seyidov qeyd edib ki, Venesiya Komissiyası Avropa Şurası nəzdində konsultativ bir orqandır: "Venesiya Komissiyasına Avropa Şurası ilə bərabər 70-dən çox ölkə üzvdür. Venesiya Komissiyası hansısa ölkədə nə isə baş verəndə öz fikrini bildirir. Ancaq Venesiya Komissiyasının fikri, o cümlədən Azərbaycan Konstitusiyasına dəyişikliklər və əlavələrlə bağlı fikri Avropa Şurasının, yaxud hansısa qurumun mütləq, həqiqət olan bir fikri deyil. Bu münasibətdir. Referenduma münasibəti Venesiya Komissiyası da, Azərbaycana referendumu müşahidə etməyə gələn müşahidəçilər də, digər beynəlxalq təşkilatlar da bildirə bilər. Bu rəylərdən biri də Venesiya Komissiyasının rəyidir. Ona görə də Venesiya Komissiyasının rəyini əsas bir rəy kimi təqdim etmək qətiyyən düzgün deyil".
Bu arada müəyyən müxalif partiyalar ümid edirdilər ki, referendumla bağlı məsələ AŞPA-da müzakirə olunacaq. Guya ki, bu keçirilən referendumun nəticələrini şübhə altında qoyacaq. Sözügedən məsələ ilə bağlı fikirlərini "Bakı-Xəbər"lə bölüşən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, prinsipcə, bununla bağlı AŞPA-da ayrıca müzakirələrin olmayacağı gözlənilən idi: "Çünki bunu bir sıra faktorlar şərtləndirir. Məsələ ondadır ki referendumdan dərhal sonra bir sıra qurumlar - istər Avropa təsisatları, istərsə də digər təşkilatlar onun nəticələrini tanıdığını bəyan etdi. Baxın, referendumdan sonra Birləşmiş Ştatlar nəticələri tanıdığını bəyan etdi. O cümlədən, referendumu müşahidə edənlər buna müsbət prizmadan yanaşdı. Bütün bunlar, istər-istəməz, o qənaətə gəlməyə əsas verir ki, referenduma münasibət müsbətdir. AŞPA və digər qurumlar görür ki, referendumu cəmiyyətin böyük hissəsi dəstəklədi. Belə olan halda, ayrıca müzakirələrin keçirilməsinə ehtiyac qalmır. Hesab edirəm ki, bu, Azərbaycanın, aparılan siyasətin uğurudur". Vidadi ORDAHALLI