Ramil Hüseynov: "Roma Papası açıq şəkildə bəyan etdi ki, Azərbaycanda dini azadlıqlar tam təmin edilib"
Xəbər verildiyi kimi, oktyabrın 3-də Roma Papası Fransisk Azərbaycanda səfərdə olub. Roma Papasını Azərbaycan Prezidenti İlham Əliyev qarşılayıb. Rəsmi qarşılanma mərasimi başa çatdıqdan sonra ölkə başçısı və ailə üzvlərinin Papa ilə görüşü baş tutub. Görüşdən sonra Prezident İlham Əliyev və Papa Heydər Əliyev Mərkəzində ictimaiyyət nümayəndələrinin qarşısında çıxış ediblər.
Daha sonra Bakıdakı katolik kilsəsində Roma Papası Fransiskin iştirakı ilə dua mərasimi (messa) başlayıb. Mərasimdə Azərbaycanda yaşayan xristian icmasının nümayəndələri iştirak edib. Katolik kilsəsində dini ayinlər icra edilib. Dini ayin icra edildikdən sonra Roma Papası nitq söyləyib və müqəddəs "İncil" kitabından sitatlar gətirib.
Roma Papası Fransisk, həmçinin, Bakıda Heydər Məscidini ziyarət edib. Qonağı Qafqaz Müsəlmanları İdarəsinin sədri Hacı Allahşükür Paşazadə qarşılayıb. Daha sonra Papa Fransisk məscidlə tanış olub. Burada müxtəlif dinlərin nümayəndələri ilə görüşüb. Qonağa müqəddəs Qurani-Kərim hədiyyə olunub. Roma Papası və QMİ sədri dindarlar qarşısında çıxış edib.
Roma Papasının Azərbaycana səfərinin bir çox maraqlı detalları var. Bu səfər "Biz hamımız qardaşıq" şüarı altında baş tutub. Papa Fransisk jurnalistlərə açıqlamasında Azərbaycan səfərindən razı qaldığını söyləyib. O, səfərinin maraqlı keçdiyini sözlərinə əlavə edib.
Diqqətçəkən məqamlardan biri odur ki, Ermənistan mediası Papanın Tiflis səfərinə geniş yer ayırsa da, Azərbaycan səfərinə ötəri yanaşıb. Sözügedən səfər çox səthi işıqlandırılıb. Maraqlıdır, ekspertlər erməni mediasının bu cür yanaşma sərgiləməsini nə ilə əlaqələndirir?
Məsələyə münasibət bildirən Vətəndaş və İnkişaf Partiyasının sədr müavini Ramil Hüseynovun fikrincə, erməni mediasının bu cür mövqe sərgiləməsi təsadüfi deyil: "Papanın Bakı səfəri zamanı ermənilərin gözləntiləri özünü doğrultmadı. Məsələ ondadır ki, Papanın Bakıda sərgilədiyi mövqe ermənilərin ürəyincə olmadı. Roma Papası İrəvandakı çıxışı zamanı bildirmişdi ki, Azərbaycana gedərkən orada Ermənistanda gördüyü həqiqətlər barədə danışacaq. Ancaq Papa səfəri zamanı bu barədə bir kəlmə də işlətmədi. Əskinə, Roma Papası Bakıdakı çıxışlarında ümumi danışdı. Açıq şəkildə bəyan etdi ki, Azərbaycanda dini azadlıqlar tam təmin edilib. Şübhəsiz ki, bu ifadə heç cürə ermənilərin ürəyincə deyil. Çünki ermənilər zaman-zaman Dağlıq Qarabağ münaqişəsinə həm də dini don geyindirməyə çalışıb. Guya ki, ermənilər xristian olduğu üçün sıxışdırılır. Ancaq, göründüyü kimi, ermənilərin bütün bu niyyətləri baş tutmadı. Ona görə də erməni mediası Papanın səfərini görməzdən gəldi".
Vidadi ORDAHALLI