Ağa Seyidli: "Katolik kilsənin rəhbərləri çox nadir hallarda müsəlman ölkələrinə səfər edir"
Heydər Əliyev Mərkəzində Roma Papası Fransiskin Azərbaycana səfəri ilə əlaqədar keçirilən mərasimdə çıxışı zamanı Prezident İlham Əliyev bildirib ki, Roma Papası Fransiskin Azərbaycana səfəri bütün bəşəriyyət üçün önəmlidir:
"Keçən il Vatikanda görüşərkən mən sizi Azərbaycana dəvət etdim və çox şadam ki, siz dəvəti qəbul edib bu gün ölkəmizə səfər edirsiniz. Bu səfərin çox böyük mənası var. Bu, tarixi bir səfərdir. Bu səfər Vatikan-Azərbaycan əlaqələrinin inkişafına böyük töhfə verəcək. Bu səfər bütün bəşəriyyət üçün önəmlidir. Çünki bu səfər bir daha onu göstərir ki, sivilizasiyalararası dialoq yaşayır, davam edir, güclənir və biz çalışırıq ki, bu dialoqa yeni təkan verək".
Prezident Vatikan-Azərbaycan əlaqələrinin artıq 24 ildir uğurla inkişaf etdiyini vurğulayıb: "Qeyd etdiyim kimi, qarşılıqlı yüksək səviyyəli rəsmi səfərlər həyata keçirilib. 2012-ci ildə Vatikan muzeylərində diplomatik əlaqələrimizin 20 illiyinə həsr edilmiş Azərbaycan sərgisi keçirilib. İlk müsəlman ölkəsinin sərgisi məhz Azərbaycan sərgisi idi. Bizim əlaqələrimiz, eyni zamanda, ictimai təşkilatlar tərəfindən dəstəklənir. Keçən ilin fevralında Cənubi Qafqazın ən böyük qeyri-hökumət təşkilatı olan Heydər Əliyev Fondunun dəstəyi ilə Vatikanın San Marçellinio və Pietro katakombalarının əsaslı təmir və bərpa işlərindən sonra açılışı olub. Bu gözəl hadisə bir daha onu göstərir ki, həm bizim ikitərəfli əlaqələrimiz uğurla inkişaf edir, eyni zamanda, dinlərarası, mədəniyyətlərarası dialoqun güclənməsi reallıqdır".
Bu səfər hansı səbəblərə görə bəşəriyyət üçün önəmli sayılır?
Dinşünas Ağa Seyidli qəzetimizə açıqlamasında bildirdi ki, bu səfərin önəmi çox böyükdür: "Papa həm də Vatikan adlanan bir ölkənin başçısıdır. Bu bir qədər rəmzi məna daşıyır. Çünki Vatikan çox kiçik bir dövlətdir. Papaya bəslənən böyük ehtiram onun dünya katoliklərinin lideri sayılmasıdır. Bu, milyardlarla insanın inandığı yer deməkdir. Dünyada baş verən ən ciddi problemlərlə bağlı Katolik Kilsə vasitəçilik missiyasını ortaya qoyur. Səfərin bəşəriyyət üçün önəmini səciyyələndirən digər faktorlardan biri dinlərarası dialoqun inkişafıdır. Bilirsiniz ki, Azərbaycanda çox az sayda katolik yaşayır. Papanın bura səfər etməsi heç də buradakı katoliklər üçün nəzərdə tutulmayıb. Bu, açıq-aydın özünü büruzə verir. Həm də, görünür ki, bir müsəlman ölkəsi kimi, Azərbaycan dinlərarası münasibətlərin normal olmasına yüksək səviyyədə önəm verir. Bir daha xatırladıram ki, bu səfər Vatikan-Azərbaycan münasibətlərindən daha çox sivilizasiyalararası münasibətlərin tənzimlənməsi baxımından yadda qalacaq. Katolik kilsənin rəhbərləri çox nadir hallarda müsəlman ölkələrinə səfər edir. Belə bir səfər baş tutubsa, demək, doğrudan da böyük tarixi əhəmiyyətə malikdir".
Məhəmmədəli QƏRİBLİ