Məhərrəm Zülfüqarlı: "Onlar hər zaman tarixi tərsinə yozmağa çalışır"
Sentyabrın 30-da Roma Papası Fransisin Qafqaza 3 günlük səfəri başlayıb. O əvvəlcə Gürcüstanda, sonra Azərbaycanda siyasi və dini liderlərlə görüşəcək. Oktyabrın 1-də Papa Tiflisin "Mikheil Meskhi" stadionunda kütləvi dua mərasimində iştirak etməyi planlayır.
Oktyabrın 2-də isə Papa Fransis Bakıda olacaq. Kilsədə dini mərasimdən sonra onun Şəhidlər Xiyabanını ziyarət edəcəyi, rəsmilərlə, eləcə də Qafqaz Müsəlmanları İdarəsinin rəhbəri Allahşükür Paşazadə ilə görüşü gözlənir.
Bu arada, həmişə olduğu kimi, yenə də ermənilər öz hiyləgər əməllərindən geri qalmır. Azərbaycandan qaçqın düşən ermənilər qondarma qurum adı altında Roma Papasına müraciət edib. Edilən müraciət təxribat xarakterli olmaqla yanaşı, başdan-ayağa qərəzli məlumatlara əsaslanır. Həmişə olduğu kimi, sözügedən müraciətdə də ermənilər barələrində yazıq obrazı yaradıb. Sanki 1 milyondan çox qaçqın Azərbaycanın deyil, Ermənistanındır. Baş verənləri o dərəcədə təhrif edirlər. Sözügedən məsələ ilə bağlı fikirlərini "Bakı-Xəbər"lə bölüşən tarix elimləri üzrə fəlsəfə doktoru Məhərrəm Zülfüqarlının sözlərinə görə, bu cür qərəzli yanaşma, təxribat xarakterli müraciətlər ermənilərin xislətinə uyğundur: "Onlar hər zaman tarixi tərsinə yozmağa çalışır. Etiraf etməliyik ki, bəzi hallarda dünyanı öz yalanlarına inandıra bilirlər. Roma Papası bundan əvvəl Ermənistana səfər etdi, bir sıra görüşlər keçirdi və həmçinin, qondarma "soyqırım" abidəsini ziyarət etdi. Ancaq, təəssüflər olsun ki, Azərbaycanın üzləşdiyi işğal, çoxsaylı qaçqınların üzləşdiyi çətinliklər barədə heç nə demədi. Sanki ermənilərin bu etdiklərini görməzdən gəldi. İndi də Bakıya səfərə gəlir. Yaxşı olardı ki, Bakı səfəri zamanı bu məsələlərə toxunsun. Bilsin ki, işğala məruz qalan, qaçqın düşən tərəf kimdir. Hesab edirəm ki, istənilən bu kimi erməni təxribatına qarşı biz hazır olmalıyıq. O cümlədən buna adekvat cavab verib dünyanı düzgün məlumatlandırmalıyıq. Həmçinin, Roma Papası Bakıda səfərdə olarkən ətraflı məlumatlandırılmalıdır". Vidadi ORDAHALLI