Elşən Həsənov: "Şimali Qafqazda fəallaşmaq istəyən terrorçular öz niyyətlərini ölkəmizə də..."
MDB üzvü olan dövlətlərin təhlükəsizlik və xüsusi xidmət orqanları rəhbərlərinin Bakıda keçirilən görüşündə bir sıra maraqlı bəyanatlar səsləndirilib.
Rusiya Federal Təhlükəsizlik Xidmətinin direktoru Aleksandr Bortnikov bildirib ki, son dövrlər əsas diqqət terrorçuluq və ekstremizmə qarşı mübarizədə ümumi yanaşma, terrorçuluq sahəsindəki cinayətlərdə iştirakı olan şəxslərin müəyyənləşdirilməsi, axtarışı və saxlanması üzrə birgə tədbirlərin planlaşdırılması və reallaşdırılması, informasiya sahəsinin qorunmasına yönəlib: "Bu məsələlər son zamanlar xüsusilə aktualdır. Belə ki, hazırkı geosiyasi vəziyyət təəssüf ki, mənfi ssenari üzrə inkişaf edir. MDB ölkələrinin birbaşa sərhədində yerləşən Əfqanıstan və Yaxın Şərq regionunda vəziyyət bizdə xüsusi narahatlıq yaradır. İŞİD, "Cəbhat-əl-Nüsra" kimi terror təşkilatlarının genişlənməsi bu günün reallığıdır. MDB-yə üzv və digər ölkələr üçün ən böyük təhdid mühacir terrorçuların çıxdıqları ölkələrə geri qayıtması və bu ölkələrdə aktivləşməsidir. Son vaxtlar biz Yaxın Şərq ölkələrini zəbt etmiş terror təşkilatları rəhbərlərinin öz fəaliyyətini Şimali Qafqaz regionunda genişləndirmək istəməsi barədə sənədlər əldə etmişik. Bizim ölkələrdən kənarda fəaliyyət göstərən beynəlxalq terror təşkilatlarının funksionerləri öz terror şəbəkələrini uzaqdan idarə edir. Bunun üçün onlar bir çox vasitələrdən, o cümlədən agentlərdən, peyk əlaqə vasitələrindən, internetin imkanlarından yararlanır. Ona görə də hesab edirəm ki, bizim əməkdaşlığımızın effektivliyini və nəticəsini artırmaq üçün daha sıx və çoxsəviyyəli qarşılıqlı fəaliyyət həyata keçirmək, operativ fəaliyyət göstərmək, daimi informasiya mübadiləsi sahəsində yeni imkanlar axtarmaq lazımdır".
A.Bortnikovun terrorçuların bizə yaxın ərazilərdə fəallaşmasına dair konkret faktlara malik olması ilə bağlı səsləndirdiyi bəyanatdan hansı nəticəni çıxarmaq olar?
Təhlükəsizlik orqanlarının sabiq əməkdaşı Elşən Həsənov qəzetimizə açıqlamasında bildirdi ki, Rusiya xüsusi xidmət orqanının rəhbəri tərəfindən səsləndirilən bəyanata ciddi yanaşmaq lazımdır: "Şimali Qafqazda terror ocaqları tam söndürülməyib. Bilirsiniz ki, həmin bölgədə Rusiya terrorizmdən uzun müddət əziyyət çəkib. Hətta bu qəbildən olan narazılıq müharibə həddinə kimi gəlib çıxdı. Terrorizm artıq qlobal xarakter alıb. Onun vətəni və milləti yoxdur. İlham Əliyev nümayəndələri qəbul edəndə bir daha bu mövzuya tam doğru olaraq toxundu və bildirdi ki, heç bir ölkə terrorla təkbaşına mübarizə aparmaq gücündə deyil. Təbii ki, MDB-dən olan bu sahəyə məsul şəxslərin bir yerə toplaşması koordinasiyalı işin olmasından xəbər verir. Belə əməkdaşlıq davam etdirilməlidir. Bilirsiniz ki, Şimali Qafqaz, hətta Azərbaycanın özündən Suriya və başqa qaynar bölgələrə terroristlərin cihad adı ilə getməsi halları müşahidə olunub. Azərbaycanın əlaqədar qurumları bu sahədə çox böyük işlər aparıb. Hətta Suriya və İraqla əlaqələri olan bəzi terrorçular barəsində həbs qərarı seçilib, onlardan bəzilərinin məhkəməsi də yekunlaşıb. Rusiyalı nazirin məlum açıqlaması bizi bir qədər də ayıq-sayıq olmağa vadar etməlidir. Çünki, məlum olduğu kimi, Rusiyanın kəşfiyyat sahəsində çox geniş təcrübəsi var. Onlarda olan informasiya dəqiqləşməsə, nazir bunu yüksək tribunadan səsləndirməz. Hesab edirəm ki, bu istiqamətdə informasiya mübadiləsi gücləndirilməlidir. Şimali Qafqazda fəallaşmaq istəyən terrorçular öz niyyətlərini ölkəmizə də istiqamətləndirə və ya buradan Yaxın Şərqə getmək üçün marşrut kimi istifadə edə bilər".
Məhəmmədəli QƏRİBLİ