Aydın Mirzəzadə: "Ancaq təhsilsizlik insanların sivil yaşayış barəsində qüsurlu baxışlarının formalaşmasına gətirib çıxarır"
"Beyinlərin "yuyulması", radikal ideologiya o yerdə özünə zəmin tapır ki, orada təhsilə lazımınca əhəmiyyət verilmir". Məlum olduğu kimi, bunu Azərbaycan Prezidenti İlham Əliyev MDB ölkələrinin təhlükəsizlik və xüsusi xidmət orqanları rəhbərləri Şurasının Bakıda keçirilən iclasının iştirakçıları ilə görüşündə bildirib:
"Təhsilin səviyyəsi ilə bağlı məsələlər təhlükəsizliklə birbaşa bağlıdır. Bizə sovet keçmişindən miras qalmış üstünlüklərdən biri məhz təhsil və savaddır. Bizim ölkələrimizdə savadlılıq mütləq həddədir. Biz bu nailiyyəti qoruyub saxlayırıq və saxlamalıyıq. Ölkələrimizin vətəndaşları arasında, xüsusən gənclər arasında müxtəlif səviyyələrdə mövcud olan əlaqələr də təhlükəsizliyin möhkəmləndirilməsi işində mühüm amildir. Ona görə ki, gənclər bir-birini tanıyacaq, bir-birinə qonaq gedəcək, ünsiyyət saxlayacaq, dostluq edəcək. Əlbəttə ki, bir-birini dost və tərəfdaş kimi qəbul edəcəklər. Odur ki, təhlükəsizlik orqanlarının fəaliyyəti dövlətin siyasətindən ayrı mümkün deyil. Biz Azərbaycanda məhz əməkdaşlığın, qarşılıqlı anlaşmanın möhkəmlənməsinə, qarşılıqlı həmrəyliyə, çoxkonfessiyalı dünyaya yönəlmiş ardıcıl siyasət yürüdürük və çoxmillətli dövlət olaraq öz ölkəmizin bütün vətəndaşları ilə fəxr edirik".
Həqiqətən də təhsilli cəmiyyət olduqdan sonra potensial zərərli ideologiyalar özünə yer tapa bilmir. Bu baxımdan ekspertlər məsələni necə dəyərləndirir? Sözügedən məsələ ilə bağlı fikirlərini "Bakı-Xəbər"lə bölüşən millət vəkili Aydın Mirzəzadənin sözlərinə görə, cənab Prezident çox vacib bir məsələyə toxunub: "Məsələ ondadır ki, hərtərəfli və müasir təhsilli insan artıq cəmiyyətdə təhlükəsizliyin qorunmasına birbaşa öz töhfəsini vermiş olur. Ancaq təhsilsizlik, məlumatsızlıq, ən əsası isə düzgün olmayan təhsil insanların sivil yaşayış barəsində qüsurlu baxışlarının formalaşmasına gətirib çıxarır. Bəzi hallarda isə müəyyən təhlükə mənbəyinin yaranmasına gətirib çıxarır. Biz bunu bu gün terror təşkilatlarına qoşulan bir sıra gənclərin simasında görürük. Araşdıranda məlum olur ki, bunun kökündə ilk növbədə təhsilin qüsurlu olması dayanır. O baxımdan hesab edirəm ki, cənab Prezident bir çox məsələlərlə yanaşı, o cümlədən təhsilin səviyyəsinin qaldırılması, cəmiyyətin bütün təbəqələrinin istisnasız olaraq təhsilə cəlb olunmasının vacibliyini bir daha ortaya qoymuş oldu". Vidadi ORDAHALLI