"Bağışlanan silahın da miqdarı milyardlarla ölçüldüyü üçün, məbləği deyilən kontingentin sayına böləndə nəzərəçarpan rəqəm alınır"
Günel Fərhadqızı: "Bu məsələdə Rusiya hakimiyyəti öz əhalisinin rifahını daha çox düşünməli idi"
Rusiyanın Ermənistana əvəzsiz silah bağışlaması Dağlıq Qarabağ münaqişəsinin yenidən qızışdırılması anlamına gəlir. Bu addım birmənalı qarşılanmayıb. Azərbaycan rəhbərliyi Rusiya ilə həm ATƏT-in həmsədr ölkələrindən biri kimi, həm də qonşu dövlət kimi münasibətləri daim yaxşı saxlamağa çalışıb. Buna baxmayaraq, Rusiya belə addımları ilə dünyanı təəccübləndirməkdə davam edir.
Təbiidir ki, Azərbaycanda buna haqlı etiraz reaksiyaları verildi. Ancaq Rusiya dəfələrlə belə "sürprizləri" ilə ölkələrimiz arasında normal münasibətlərə kölgə salmağa cəhd edir. Çünki bu məsələyə başqa cür reaksiya vermək də olmaz. Məsələnin siyasi tərəfilə yanaşı, iqtisadi aspekti də maraqlıdır. Rusiya təmənnasız bəxş etdiyi silahın pulu ilə öz müəllim və həkimlərinin maaşını, pensiya və təqaüdləri nə qədər qaldıra bilərdi?
İqtisadçı Günel Fərhadqızı qəzetimizə açıqlamasında bildirdi ki, Rusiyanın Ermənistana təmənnasız silah verməsi bir çox aspektlərdən şərh oluna bilər: "Bununla bağlı son günlər həm ölkə, həm də dünya mətbuatında maraqlı məqalələrə rast gəlmək mümkündür. Biz öz profilimizə uyğun olaraq, məsələnin iqtisadi aspektinə toxunacayıq. Silah ticarəti dünyada ən gəlirli biznes növü sayılır. Aydındır ki, bu biznes ayrı-ayrı adamların deyil, dövlətlərin əlindədir. Özü də inkşaf etmiş, super qüdrətə malik olan ölkələrin. Çünki başqa göstəricilərə malik olan ölkələr həmin istehsalı edə bilməz. Silahın hansısa ölkəyə təmənnasız bağışlanması nadir hallarda baş verir. Ermənistanla bağlı məsələ daha maraqlıdır. Çünki həmin ölkə faktiki olaraq müharibə şəraitində yaşayır. Yəni silahlanmaya meyli var. Bu amil silahı ixrac edən ölkə üçün optimal sayılır. Xüsusilə də nəzərə alsaq ki, silahı satan ölkə ilə almaq perspektivi olan dövlət bir-birinə yaxın məsafədə yerləşir. Bundan əlavə, Rusiya münaqişə tərəflərindən birinə silah satmaqla digərini yeni silahlar almağa vadar edir. Nəticədə qazanan Rusiya olur. Ancaq, göründüyü kimi, Rusiya Ermənistanla bağlı məsələdə qazancından imtina edir. Həmin ölkənin özündəki iqtisadi vəziyyət o qədər də ürəkaçan deyil. Həmin pulu Rusiyanın daxilində müəllim və həkimlərin əməkhaqqına yönəltməyin hansı dəyişikliyə səbəb olacağını konkret demək çətindir. Bunun üçün dəqiq hesablama aparılmalıdır. Təqribi demək olar ki, bu, az miqdarda olsa da, rifahın yaxşılaşdırılmasına kömək olar. Rusiyanın böyük ölkə olduğunu nəzərə alsaq, onda müəllim və həkimlərin sayının da əhəmiyyətli dərəcədə çox olması şübhə doğurmur. Bağışlanan silahın da miqdarı milyardlarla ölçüldüyü üçün, məbləği deyilən kontingentin sayına böləndə nəzərəçarpan rəqəm alınır. Hər halda, bu məsələdə Rusiya hakimiyyəti öz əhalisinin rifahını daha çox düşünməli idi".
Məhəmmədəli QƏRİBLİ