Ermənistandan gələn idman komandaları İrana ciddi nəzarət altında buraxılacaq
İranın Azərbaycandakı səfiri sentyabrın 22-də Azərbaycanı tərk edəcək. Trend-in məlumatına görə, bunu İranın Azərbaycandakı səlahiyyət müddəti başa çatan səfiri Möhsün Pakayin bu gün keçirdiyi mətbuat konfransında deyib.
M.Pakayın səfir olduğu müddətdə İran və Azərbaycan əlaqələrinin inkişafından danışıb: “Mənim səfir olduğum müddətdə iki ölkə arasında qarşılıqlı etimadın artırılması istiqamətində xeyli işlər görülüb və qarşılıqlı əlaqələr inkişaf edib. Bu gün İranla Azərbaycan arasında ikitərəfli münasibətlər yüksək səviyyədədir. Bu müddətdə İran prezidentləri 3 dəfə Azərbaycana və Azərbaycan Prezidenti İlham Əliyev iki dəfə İrana səfər edib”.
M.Pakayin bildirib ki, onun səfir olduğu müddətdə iki ölkə arasında 50-yə yaxın sənəd imzalanıb. Səfir bu müddət ərzində iki ölkə arasında iqtisadi əlaqələrin də inkişaf etdiyini bildirib. O bildirib ki, İranla Azərbaycan arasında aviareyslərin sayı artıb. Naxçıvan-Məşəd qatarının yaxın vaxtlarda işə düşəcəyini bildirən diplomat bunun iki ölkə arasında əlaqələrin daha da inkişaf etməsinə səbəb olacağını deyib.
Səfir medianın da rolunu yüksək qiymətləndirib. O bildirib ki, media ilə sıx əlaqələr sayəsində Azərbaycanla İran arasında münasibətləri korlamağa çalışan xarici qüvvələrin təbliğatı zəiflədilib.
M.Pakayin Azərbaycan və Azərbaycan xalqı üçün darıxacağını diqqətə çatdırıb: "Mən Azərbaycanda qəriblik hiss etmədim, özümü öz ölkəmin xalqı arasında hiss etdim. Din, mədəniyyət və digər sahələrdə bir-birimizə çox yaxınıq".
Səfir deyib ki, İran hər zaman Azərbaycanın ərazi bütövlüyünü dəstəkləyib. O qeyd edib: “Bizim Dağlıq Qarabağ münaqişəsi ilə bağlı mövqeyimiz aydındır. Biz həmişə Azərbaycanın ərazi bütövlüyünü dəstəkləmişik. Rəsmi coğrafi sərhədlərin dəyişməsinin əleyhinəyik. Biz Dağlıq Qarabağ münaqişəsinin həll edilməsini istəyirik və bu yolda əlimizdən gələn köməyi etməyə hazırıq”.
Səfir Möhsün Pakayin onu da deyib ki, İranda keçirilən idman yarışlarında bəzi idmançıların paltarlarında qondarma “Dağlıq Qarabağ Respublikası”nın “bayrağı”nın olmasının məqsədi İran ilə Azərbaycan arasında mövcud olan yüksək səviyyəli əlaqələrə zərər gətirmək və kölgə salmaq idi.
Səfir deyib ki, İran dövləti dərhal məsələyə reaksiya verib: “Biz buna dərhal reaksiya verdik və tədbir gördük. Mən bəyanatımda qeyd etdim ki, İran idman yarışlarının siyasi məqsədlər üçün istifadə edilməsiniN əleyhinədir. Biz həmin idman yarışlarının təşkilat komitəsinə ciddi xəbərdalıq etdik və gələcəkdə Ermənistandan gələn idman komandaları İrana ciddi nəzarət altında buraxılacaq. Biz qondarma “Dağlıq Qarabağ respublikası”nı tanımırıq. Biz prinsipal olaraq işğalın, separatizmin əleyhinəyik. Düşünürük ki, münaqişələr sülh yolu ilə həllini tapmalıdır”.