"Görünür, Ermənistan kosmetik təmir adı ilə həmin ittihamlardan yayınmağa çalışır"
Ermənistandakı "Metsamor" atom elektrik stansiyasının (AES) bölgədə ciddi təhlükə mənbəyi olması barədə dəfələrlə xəbərdarlıq edilsə də, onun fəaliyyəti hələ də dayandırılmayıb. Bu arada bəlli olub ki, AES-də yeni təmir işləri aparılacaq.
Stansiyanın direktoru Movses Vardanyanın sözlərinə görə, AES-də təmir işləri sentyabrın 20-də başlayacaq: "Təmir işləri 61 gün - noyabrın 20-dək davam edəcək. Bu tarixdən sonra yenidən istismara veriləcək".
Xatırladaq ki, Azərbaycan və Türkiyə rəsmiləri, ictimai təşkilatları Ermənistan AES-in bölgəni radioaktiv tullantılarla çirkləndirdiyini dəfələrlə bildirib və stansiyanın bağlanmasını beynəlxalq təşkilatlardan tələb edib. Amma hələ də bu istiqamətdə əməli addımlar atılmayıb. Rabitə və Yüksək Texnologiyalar Nazirliyinin tabeliyində fəaliyyət göstərən Milli Nüvə Tədqiqatları Mərkəzinin sədri Adil Qəribov isə diqqəti ona yönəldir ki, "Metsamor" atom elektrik stansiyasında sentyabrın 20-dən iki ay müddətində aparılacaq təmir işləri onun təhlükəliliyinin azalmasına, bölgənin radioaktiv tullantılarla çirkləndirilməsi səviyyəsinin enməsinə təsir göstərməyəcək. Onun sözlərinə görə, AES-də aparılan təmir işləri cari təmir işləridir. Bu təmir işləri zamanı AES-in gücünün sabit qalması üçün yanacağın hissə-hissə dəyişilməsi işləri aparılır, sistemlərin yoxlanışı həyata keçirilir.
A.Qəribov əlavə edib ki, "Metsamor"un istismar müddətinin uzadılmasına hazırlıq məqsədilə 2014-cü ildən 2016-cı ilədək cari təmir işləri aparılıb: "Bu iki ay müddətində isə son sınaq və təmir işləri görülür. İki ay müddətində "Metsamor"da son yoxlama işləri də aparılacaq və sonda Nazirlər Kabinetinin qərarı ilə onun istismar müddəti 10 il müddətinə uzadılacaq, müvafiq olaraq, lisenziya müddəti də uzadılacaq. Bütün bu təmir işlərinə baxmayaraq, "Metsamor" AES yenə də bölgə üçün təhlükəli obyekt olaraq qalır".
Ermənistanın stansiyanı təmirlə əlaqədar müvəqqəti bağlaması Azərbaycanın apardığı "Stop Metsamor" kampaniyası ilə əlaqəli ola bilərmi?
QHT rəhbəri Vüqar Qədirov qəzetimizə açıqlamasında bildirdi ki, Azərbaycan bu sahədə böyük iş gördü: "Azərbaycanda "Metsamor" AES-in bağlanmasını tələb edən petisiyaya imzatoplama kampaniyası keçirildi. Tələb bu idi ki, Ermənistanda yerləşən Atom Elektrik Stansiyası bağlansın. Kampaniyanın da adı "Stop Metsamor" idi.
Bu kampaniya çərçivəsində bildirilirdi ki, istismar müddəti bitmiş "Metsamor" AES-də qəza baş verəcəyi təqdirdə, Ermənistanın özü də daxil olmaqla, geniş coğrafiyada yerləşən bir çox ölkə nüvə qəzasının yaratdığı fəsadlarla üz-üzə qalacaq.
Artıq uzun illərdir region ölkələri, Avropa İttifaqı və bir çox beynəlxalq təşkilat "Metsamor" AES-in yaratdığı təhlükə ilə bağlı həyəcan təbili çalır, milyonlarla insanın həyatını təhdid edən bu halın aradan qaldırılması üçün tədbir görülməsini tələb edirlər.
Bundan başqa, Ermənistanda AES-in mövcudluğu nüvə materialları qaçaqmalçılığı ilə məşğul olan transmilli cinayətkar qrupların regiona diqqətini artırır, onların işğal altındakı Azərbaycan ərazilərində sərbəst fəaliyyəti üçün əlverişli şərait yaradır. Ermənilərin nüvə qaçaqmalçılığı ilə məşğul olması, radioaktiv materialları ölkədən çıxararaq satmaq cəhdlərinə dair çoxsaylı faktlar mövcuddur. Belə materialların İŞİD və "Əl-Qaidə" kimi terror qruplaşmalarının əlinə düşəcəyi təqdirdə isə nəyin baş verəcəyini təsəvvür etmək heç də çətin deyil. "Stop Metsamor"dan sonra Ermənistana böyük beynəlxalq təzyiqlər başladı. Görünür, Ermənistan kosmetik təmir adı ilə həmin ittihamlardan yayınmağa çalışır. Ancaq bu, problemin tam həlli sayıla bilməz. Bizim apardığımız kampaniya təsirsiz ötüşməyib"
Məhəmmədəli QƏRİBLİ