Ukraynada məlum Maydan hərəkatından sonra bu ölkədə yaşayan azərbaycanlıların da durumu xeyli ağırlaşıb. Bu səbəbdəndir ki, Ukraynanın separatçı bölgələrində yaşayan soydaşlarımızın böyük əksəriyyəti oranı tərk edib. Amma digər bölgələrdə, o cümlədən paytaxt Kiyevdə yaşayanlar üçün də vəziyyət heç də qənaətbəxş sayıla bilməz.
Real vəziyyətin təhlili göstərir ki, bunun ümdə səbəblərindən biri Ukrayna hüquq-mühafizə orqanlarının, o cümlədən ölkənin daxili işlər naziri, erməni əsilli Arsen Avakovun qeyri-səmərəli fəaliyyətidir.
Yeri gəlmişkən qeyd edək ki, Ukraynanın baş prokuroru Yuri Lutsenko ölkədə Arsen Avakova qarşı cinayət işinin başlandığını bildirib. Baş prokurorun sözlərinə görə, Arsen Avakov Donbasda separatçılarla mübarizə aparan təhlükəsizlik qüvvələrinin döyüşçüləri üçün alınmış geyim və digər ləvazimatların qiymətlərini şişirdərək dövlət vəsaitini mənimsəyib və qanunsuz qazanc əldə edib. Avakov isə, öz növbəsində, baş prokurorun ittihamlarını rədd edərək tender prosedurunun şəffaf keçdiyini bildirib. Lakin tədqiqatçılar Ukraynanın xüsusi təyinatlı bölmələri üçün əsasən çantaların alınması ilə bağlı yaranan qalmaqalı cinayət işi üçün ən əhəmiyyətli səbəb sayır. Gizli kamera ilə çəkilmiş videoya görə, nazirin oğlu Aleksandr daxili işlər nazirinin keçmiş müavini Sergey Çebotaremlə çanta və geyimlərin Milli Qvardiyanın bölmələrinə çatdırılması barədə razılaşıb. Araşdırmalar göstərir ki, çantalar bazar qiymətlərindən altı dəfə baha alınıb, tender qalibləri isə DİN başçısının sabiq müavininin müdaxiləsi ilə seçilib. Bu azmış kimi, alınan mallar anbarlara tam həcmdə daxil olmayıb. Bundan başqa, Avakova yaxın ticarət strukturları Xarkovun yaxınlığında onlarla hektar ərazinin mənimsənilməsində şübhəli bilinir. Ali Radanın deputatı Sergey Leşenko iddia edirdi ki, nazirin yaxın ətrafında olan insanlar Ukraynadan Panamadakı ofşor şirkətlərin hesabına 40 milyon dollar köçürüblər. Bundan başqa, statistikaya görə, Ukraynada son illərdə cinayətlərin sayı əhəmiyyətli dərəcədə artıb. Bu durumdan soydaşlarımız da əziyyət çəkir. Elə bu günlərdə Ukraynada yaşayan azərbaycanlılar Kiyevdə Daxili İşlər Nazirliyinin binası qarşısında etiraz aksiyası keçiriblər. Onlar son vaxtlar Ukraynada azərbaycanlılara qarşı cinayətlərin artmasına, xüsusilə adam oğurluğu hallarına DİN tərəfindən lazımi reaksiya verilməməsinə, tədbirlər görülməməsinə etirazlarını bildiriblər. Qeyd olunur ki, Arsen Avakovun daxili işlər naziri təyin olunmasından ötən 2 il müddətində 20-dən çox azərbaycanlı iş adamı və iş adamlarının övladları oğurlanıb, tanınmış azərbaycanlılara qarşı sui-qəsd halları artıb, bu cinayətlərin üstünün açılması təmin edilməyib. Bildirilib ki, bununla bağlı Ukraynadakı Azərbaycan diasporu ölkə prezidentinə və Daxili İşlər Nazirliyinə 30-dan çox müraciət etsə də, nəticə olmayıb: "Bu hal davam edərsə və azərbaycanlılara qarşı baş verən bu halların qarşısı alınmazsa, bütün ölkə üzrə azərbaycanlıların oturaq aksiyası təşkil olunacaq".
Kriminogen durumun pisləşməsi ölkə prezidentini də ciddi şəkildə narahat edir. "RBK-Ukrayna"nın məlumatına görə, ölkə prezidenti Pyotr Poroşenko hadisələrin inkişafının bir mümkün variantına baxır. O da budur ki, dövlət başçısı Milli Təhlükəsizlik və Müdafiə Şurasının katibi Aleksandr Turçinovla Avakovu əvəz etməyi düşünür:"Şəxsi heç nə yoxdur. Sadəcə prezident əmindir ki, bütün təhlükəsizlik əməkdaşlarına nəzarət etməlidir. Prezident Avakovu "öz adamı" hesab etmir". Ekspertlərin fikrincə, Avakov hazırda yeganə insandır ki, Pyotr Poroşenkoya Ukraynanın bütün güc strukturlarını öz nəzarətində toplamağa mane olur. Avakov isə daha çox Daxili İşlər Nazirliyinə tabe olan "Azov" vətəndaş korpusuna güvənir. Fraksiyasız deputat Vladimir Tarasyuk qeyd edib ki, "Azov" batalyonu zorakı hakimiyyət dəyişikliyini təşkil etməyə qadirdir. Parlament üzvünün sözlərinə görə, digər könüllü batalyonlar qəsdən zəiflədilib. Bütün bunlar Avakovun hazırda bütün Ukrayna üçün ciddi təhdid mənbəyi olduğunu göstərir. "Novorossiya parlamenti"nin spikeri, Ukrayna parlamentinin keçmiş deputatı Oleq Tsarev deyir ki, Avakov artıq Ukrayna paytaxtının mərkəzində - "Kiyev" mehmanxanasında dövlət çevrilişi qərargahını hazırlayıb. Xatırladaq ki, Avakov 1964-cü il yanvarın 2-də Bakının Binəqədi rayonunda hərbçi ailəsində anadan olub. 1966-cı ildən Ukraynada yaşayır.
Nahid SALAYEV