Təbriz Musayev: “Bu, heç şübhəsiz Kiyev-Paris münasibətlərini pisləşdirəcək”
Rusiyalı oliqarxlar Mixail Fridmanın və Əlişir Usmanovun Avropa İttifaqının sanksiya siyahısından çıxarılması Avropada birmənalı qarşılanmayıb. Latviya hökuməti, Aİ-nin bu qərarından sonra onlara qarşı ölkədə sanksiyalar tətbiq edib. Yəni sanksiyanı qüvvədə saxlayıb. Usmanov və Fridman Latviya yurisdiksiyası daxilində onlara məxsus və nəzarəti və ya idarəçiliyi altında olan bütün maliyyə aktivləri və iqtisadi resurslar barədə altı həftə ərzində Latviya Maliyyə Kəşfiyyat Xidmətinə məlumat verməlidirlər.
Nyu-Yorkda keçirilən BMT Baş Assambleyası çərçivəsində Ukrayna Prezidenti Volodimir Zelenski Avropa Komissiyasının rəhbəri Ursula fon der Lyayen ilə görüşüb. "Bloomberg" agentliyinə danışıqlardan məlumatlı olan mənbə tərəflər arasındakı görüşün olduqca gərgin şəraitdə keçdiyini bildirib. Zülenski iki iş adamına qarşı sanksiyaların ləğvinə kəskin etiraz edib. Nəşrin təhlilinə əsasən, Ukraynadakı münaqişənin başlamasından illər ötəndən sonra Kiyevlə onun əsas müttəfiqləri arasında fikir ayrılıqları güclənməkdədir.
O da məlumdur ki, sanksiyaların götürülməsinin əsas təşəbbüsçüsü Fransadır. Ukraynanın mövqeyi ondan ibarətdir ki, Rusiya təcavüzündə iştirak edən, buna kömək edən iş adamlarına hansısa güzəşt edilməməlidir. Birmənalı olaraq onlar sanksiya altında olmalıdır. Kiməsə hansısa güzəşt olmamalıdır. Fransa isə təkid edərək sözügedən iki iş adamını sanksiyadan azad etdi. Parisin təkidi ilə bu addımın atılması Ukrayna-Fransa münasibətlərinə necə təsir edəcək?
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayevin fikrincə, bu, mütləq Ukrayna-Fransa münasibətlərinə mənfi təsir göstərəcək: “Çünki Fransa ilə bağlı bir sıra nüans var. Məsələ ondadır ki, Fransanın üzdə Rusiyaya qarşı sərt tutumuna rəğmən reallıq fərqlidir. Ukraynaya edilən hərbi və iqtisadi yardımda Fransanın payı çox azdır. Əsas yük Almaniya, Belçika, Niderland, Danimarka, Polşa və Finlandiyanın üzərinə düşür. Bunu statistik rəqəmlər də göstərir. Halbuki, Fransanın Ukraynaya daha çox hərbi yardım etmək imkanı var. Digər tərəfdən, bundan əvvəl Fransa dəfələrlə Ukraynadan xəbərsiz Rusiya ilə gizli danışıqlar aparıb. Bu çərçivədə Paris Moskvaya müəyyən vədlər verib. Sadəcə, Putinin Ukrayna müharibəsində sərgilədiyi maksimalist mövqe səbəbindən gizli danışıqlar nəticə verməyib. Ukrayna rəhbərliyi yaxşı bilir ki, Fransanın Avroittifaqda siyasi təsiri böyükdür. Əgər Paris israr etməsəydi Aİ bu addımı atmazdı. O üzdən, bu, heç şübhəsiz Kiyev-Paris münasibətlərini pisləşdirəcək. Ən azından Ukrayna-Fransa münasibətləri əvvəlki səviyyədə olmayacaq. Çünki zəmanət yoxdur ki, bundan sonra digər Rusiyadan olan iş adamları sanksiya siyahısından çıxarılmayacaq. Bu, həm də onu göstərir ki, Fransa Ukraynanın Rusiyaya güzəştə getməsində maraqlıdır. Müharibə uzandıqca Fransanın bu mövqeyi bütün çılpaqlığı ilə ortaya çıxır”.
Vidadi ORDAHALLI
