Samir Hümbətov: “Düşünürəm ki, bu ittifaqın qurulması sadəcə olaraq bir görüntü xarakteri daşıya bilər...”
Üç ölkə-Kipr, Yunanıstan və İsrail Türkiyəyə qarşı "Axilles Qalxanı"nı yaradır. Bununla Türkiyəyə qarşı ittifaqı gücləndirirlər. Yunanıstan 10 il təxirə salınan və milyardlarla avro xərcləyən silahlanma proqramına başlayır. Ona iki ölkənin kömək edəcəyi qeyd olunur.
Xarici medianın yazığına görə, Yunanıstan 4,2 milyard avroya başa gələn nəhəng yenidən silahlanma proqramına başlayır və bunun əsas hissəsi "Axilles Qalxanı" adlı müasir hava, raket və pilotsuz təyyarələrdən müdafiə sisteminin yaradılması olacaq.
Tech-in məlumatına görə, layihə Türkiyə ilə gərgin münasibətlər fonunda İsrail və Kiprlə əməkdaşlıq çərçivəsində həyata keçirilir. Yunanıstanın müdafiə naziri Nikos Dendiasın sözlərinə görə, ölkə "yeni bir dövrə qədəm qoyur". Maliyyələşdirmənin böyük hissəsi - təxminən 3 milyard avro - yeni müdafiə sistemi üçün İsrail komponentlərinin alınmasına sərf olunacaq.
“Axilles Qalxanı”ndan əlavə, Afina silahlı qüvvələrini əhəmiyyətli dərəcədə gücləndirəcək. Xüsusilə, satınalma proqramına aşağıdakılar daxildir:
İsrail Heron dronları; Braziliyanın Embraer C-390 Millennium hərbi nəqliyyat təyyarələri; Amerika Apache hücum helikopterləri üçün raketlər; və digər müasir silah sistemləri.
Qeyd olunur ki, yeni proqram Baş nazir Kiriakos Mitsotakisin hökumətinin 2025-ci ildə elan etdiyi genişmiqyaslı hərbi islahatın bir hissəsidir. Afina bunu Yunanıstan silahlı qüvvələrinin ölkənin müasir tarixində ən əhəmiyyətli modernləşdirilməsi adlandırıb.
Türkiyəyə qarşı Kipr-Yunanıstan-İsrail ittifaqı qurulur?
Beynəlxalq Münasibətlər və Diplomatiya Araşdırmaları Mərkəzinin sədri, politoloq Samir Hümbətov baki-xeber.com-a “Hesab edirəm ki, bu cür ittifaqların qurulması Türkiyəyə çox da ciddi təsir edəcək məsələ deyil. Zatən Türkiyə Kipr adasında Şimali Kiprin təhlükəsizliyi üçün bütün lazımi imkanları həyata keçirdir. Üstəlik, Aralıq dənizində Türkiyənin ciddi bir nüfuz dairəsi var və Liviya ilə bağladığı dəniz anlaşmasından sonra da Türkiyəni bu sahədə əlavə gücləndi”-deyə bildirdi.
S.Hümbətovun fikrincə, nə İsrail, nə Yunanıstan, nə də Yunan Kipri birlikdə qurduqları bu ittifaqla Türkiyəyə qarşı addım atmağa çalışsalar belə, onun müsbət nəticəsi o verəcəyi gözlənilmir.
“Hətta bu ittifaq qurulsa belə, ən azından İsrailin buna gedəcəyini düşünmürəm. Bu sadəcə olaraq bir basqı, təzyiq aləti olaraq istifadə ediləsə də, amma son nəticədə nə Yunanıstan, nə Yunan Kipri, nə də İsrailin Türkiyənin qarşısında ciddi bir təsirə malik ittifaq formalaşacağını düşünmək o qədər də real görsənmir. O baxımdan düşünürəm ki, bu ittifaqın qurulması sadəcə olaraq bir görüntü xarakteri daşıya bilər. Bu da hesab edirəm ki, “ölü doğulmuş uşaq”' anlaşını ifadə edə bilər”-deyə S.Hümbətov əlavə etdi.
İradə SARIYEVA
