Sankt-Peterburq Beynəlxalq İqtisadi Forumunda (SPIEF) keçirilən "Rusiyanın 21-ci əsrin ikinci rübündə əsas təhdidləri" adlı xüsusi sessiyada "Tsargrad TV"-nin təsisçisi (millətçi-mühafizəkar mövqeyi və Kremlə yaxınlığı ilə tanınan) Konstantin Malofeyev, filosof Aleksandr Duqin (Kremlin ideoloqu da adlandırılır) və Voloqda vilayətinin qubernatoru Georgi Filimonov tərəfindən hazırlanan "Rusiya 2050" hesabatının xülasəsi ictimaiyyətlə paylaşılıb.
Hələlik təşərrüatları açıqlanmayan hesabatda Rusiya üçün pis, orta və yaxşı olmaqla üç fərqli gələcək ssenari təsvir olunur.
“Ən pis ssenari” – Rusiya müstəmləkəyə çevriləcək...
Malofeyevin sözlərinə görə, “ən pis ssenari”də Rusiyanı 2036-cı ildə xüsusi hərbi əməliyyatda məğlubiyyət və Qərblə münaqişədə uğursuzluq gözləyir. Bu ssenariyə görə, 2050-ci ildə ölkənin iqtisadi və siyasi cəhətdən xarici güclərin təsiri altına düşərək, faktiki olaraq müstəmləkəyə çevriləcəyi proqnozlaşdırılır.
“Orta ssenari” - Rusiya ikinci dərəcəli güc mövqeyinə düşəcək...
Hesabatda yer alan “orta ssenari”də Ukrayna münaqişəsinin dondurulması, qlobal müharibə riskinin davam etməsi və nüvə silahından istifadə risqinin aşağı düşməsi yer alır. Malofeyev iddia edirdi ki, bu ssenaridə Rusiya ABŞ və Çinin dominantlıq etdiyi yeni dünya nizamında ikinci dərəcəli güc mövqeyinə düşə bilər.
"Ən yaxşı ssenari" - Avropa Birliyi dağılacaq...
Hesabatın ən diqqət çəkən hissəsi "ən yaxşı ssenari"dir. Bu ssenariyə görə, Rusiya 2036-cı ilə qədər ideoloji mübarizədə qalib gələcək, Kiyev, Odessa və Xarkovu da əhatə edən yeni bir geosiyasi nizam formalaşacaq və Avropa Birliyi dağılacaq.
Eyni ssenaridə 2050-ci ildə Rusiyanın qlobal təhlükəsizlik və ədalət sistemində aparıcı ölkəyə çevriləcəyi, Avrasiyada öz makroregionunu yaradacağı və Qərbin geosiyasi planlarının uğursuz olacağını proqnozlaşdırılır.
Malofeyev bildirib ki, bu məqsədlərə çatmaq üçün ideologiyanın, rəqəmsal suverenliyin, hərbi-texnoloji üstünlüyün, ailə institutunun gücləndirilməsinin, yeni konstitusiyanın və dövlət planlaşdırmasının eyni vaxtda tətbiqi tələb olunur.
Dugin: "...Rusiyanın sonu olacaq"
Sessiyanın bağlanışında çıxış edən Aleksandr Duqin isə Rusiyanın bu hədəflərdən bəzilərini həyata keçirməyə başladığını, lakin prosesin lənğ irəlilədiyini iddia edib.
"İdeologiya lazımdır, əks halda Rusiya məhv olacaq. Avropalaşmaqdan uzaqlaşmaq lazımdır, əks halda Rusiya məhv olacaq. Elitlərin milliləşdirilməsi davam edir, amma proses ləğg gedir. Bizdə avtokratiya var, amma rəsmi olaraq tanınmır" – deyə Duqin bildirib.
"Biz uzunmüddətli qlobal münaqişə dövrünə qədəm qoymuşuq"
Dünyanın uzun müddət davam edən qlobal münaqişə dövrünə qədəm qoyduğunu deyən MDBMİ-nin professoru Andrey Bezrukov isə bildirib ki, Rusiya cəmiyyəti qarşıdakı illərdə, hətta onilliklərlə davam edə biləcək mübarizəyə hazır olmalıdır.
Tahir TAĞIYEV
