Akif Nağı: “Metsolanın rəhbərlik etdiyi quruma bəraət qazandırmağa çalışması onun saxtakar mahiyyətini ortaya qoyur”
Azərbaycan Prezidenti İlham Əliyev İrəvanda keçirilən Avropa Siyasi Birliyinin sammitindəki çıxışında AŞPA-ya qarşı bir sıra tənqidlər səsləndirib. Prezident Əliyev bildirib: “İndi isə Avropa Parlamentini götürək. Bu qurum sülh prosesinə dəstək vermək əvəzinə ona qarşı sabotajla məşğul olur. İkinci Qarabağ müharibəsi bitdikdən cəmi altı ay sonra - 2021-ci ilin mayından 2026-cı ilin aprelin 30-na qədər Avropa Parlamenti Azərbaycanla bağlı təhqir və yalanlarla dolu 14 qətnamə qəbul edib. Sadəcə, təsəvvür edin: beş il ərzində 14 qətnamə aludəçilikdir. Ən sonuncusu cəmi dörd gün əvvəl - bilərəkdən Zirvə görüşü ərəfəsində qəbul edildi".
Prezident İlham Əliyevin bu bəyanatına Avropa Parlamentinin prezidenti Roberta Metsola olduqca uğursuz bir cavab verib.
Prezident Əliyevin çıxışından sonra söz alan AP sədri deyib ki, Avropa Parlamenti “seçilmiş nümayəndələrdən ibarət demokratik” bir qurumdur və onlar qətnamələri səs çoxluğu ilə qəbul edirlər. "Bu qətnamələr çoxları üçün əlverişsiz ola bilər, amma biz heç vaxt iş metodlarımızı və ya qərarlarımızı dəyişdirmirik", - Metsola vurğulayıb.
Azad Vətən Partiyasının sədri Akif Nağı baki-xeber.com-a bildirdi ki, Avropa Parlamenti özünü demokratik qurum adlandırsa da, daim Azərbaycana qarşı qərəzli münasibət sərgiləyib. “Metsolanın rəhbərlik etdiyi quruma bəraət qazandırmağa çalışması onun saxtakar mahiyyətini ortaya qoyur. Çünki özləri də yaxşı bilirlər ki, yanlış yoldadılar, saxtakarlıqla məşğuldurlar. Demokratiya pərdəsi altında özlərinin gerçək simalarını gizlətməyə çalışırlar. Biz onlardan demokratik prinsiplərə riayət olunmasını görmədik. Ola bilər, hansısa formada seçkilər keçirilir, hər ölkədən nümayəndələr Avropa Parlamentinə daxil olur. Amma bütövlükdə Avropa Parlamenti qərəzli, riyakar, saxta bir quruma çevrilib. Biz bunu özümüzlə bağlı deyirik, ortaya sübut qoyuruq. Siz də etdiklərinizi əsaslandırın. Metsola Avropa Parlamentinin rəhbəridirsə Azərbaycana qarşı qəbul olunan qərəzli qətnamələri səsvermənin üstünə atmasın. Orada da insanların səsindən monipulyasiya edirlərlər, deputatları hansı qətnamələrə səs vermək lazımdır ora yönəldirlər. Orada görünməz əllər işləyir, Metsolanın “demokratiyası” bunlardan ibarətdir. Siz biz sübut edin ki, bizə qarşı qəbul etdiyiniz qətnamələr doğrudur, yoxsa yox? Parlamentin rəhbəri kimi o necə sübut edə bilər ki, biz Qarabağdan erməniləro zorla çıxarmışıq? Bunu nəyə əsasən söyləyirsiz? Ermənistan rəhbərliyi açıq şəkildə bəyan edir ki, Qarabağdan köçən ermənilərə heç bir təzyiq olmayıb, onlar könüllü şəkildə Azərbaycan ərazisini tərk ediblər. Onların Azərbaycan ərazisini könüllü şəkildə tərk etmçələrinin səbəblərini də deyə bilərik. Onların əksəriyyəti Azərbaycan dövlətinə, xalqına qarşı cinayətlərdə iştirak etmişdilər, məsuliyyətdən qaçmaq məqsədilə Ermənistana, oradan da üçüncü ölkələrə getdilər”.
A.Nağı Metsolaya xatırlatdı ki, erməniləri Qarabağdan köçüb getməyə həvəsləndirənlər sırasında Avropadakı və Ermənistandakı bəzi qurumlar xüsusi yer tutub. Onlardan Azərbaycana qarşı alət kimi istifadə edildiyini deyən A.Nağı vurğuladı ki, Avropa Parlamentinin sədrinin səsləndirdiyi fikirlərin heç bir əsası yoxdur. “Bu cür əsassız fikirlərlə özlərinin hərtərəfli eybəcər sifətlərini nümayiş etdiriblər. Bunun başqa adı yoxdur. Avropa Parlamenti reytinqini, nüfuzunu qoruyub saxlamaq istəyirsə ədalətli qərarlar qəbul etməlidir. Bizə qarşı qəbul etdikləri qərar və qətnamələr tamamilə qərəzlidir. Özlərini nüfuzdan salırlar”-deyə A.Nağı əlavə etdi.
İradə SARIYEVA
