İlyas Hüseynov: “İki dövlət arasında diplomatik münasibətlərin qurulması həm də Cənubi Qafqazda sülhə, təhlükəsizliyə və sabitliyə töhfə verə bilər”
Pakistanın Ermənistanda səfirliyi açılacaq. NEWS.am-ın məlumatına görə, Ermənistan və Pakistanın diplomatik nümayəndələri Ermənistanda Pakistan səfirliyinin açılması üzərində fəal şəkildə işləyirlər. Diplomatik mənbənin məlumatına görə, səfirliyin gələn il açılması planlaşdırılır.
Ermənistan Xarici İşlər Nazirliyindən bu barədə bildirilib: “Ermənistan və Pakistan arasında diplomatik münasibətlərin qurulması ilə bağlı birgə kommünike imzalamaqla, Ermənistan və Pakistan hökumətləri nümayəndə mübadiləsi aparmaq və 1961-ci il Diplomatik Münasibətlər haqqında Vyana Konvensiyasına və ümumi qəbul edilmiş beynəlxalq təcrübəyə uyğun olaraq qarşılıqlılıq əsasında diplomatik münasibətlərin qurulması üçün bir-birinə lazımi yardım göstərmək barədə razılığa gəliblər”.
Xatırladaq ki, Ermənistan və Pakistan arasında diplomatik münasibətlər 31 avqust 2025-ci ildə qurulub. Həmin gün də Çində iki ölkə arasında diplomatik münasibətlərin qurulması ilə bağlı birgə kommünike imzalanıb.
Bu səfirlik Ermənistanın sülh yolunda davranışlarına necə təsir edəcək?
“Pakistan hər zaman Azərbaycanın haqq işini müdafiə edib...”
Politoloq İlyas Hüseynov “Bakı-Xəbər”ə bildirdi ki, Pakistan və Ermənistan arasında uzun illər ərzində diplomatik münasibətlər olmayıb: “Bir-birinin ərazisində diplomatik nümayəndəliklərinin olmamasının əsas səbəbi Ermənistanın Azərbaycan torpaqlarını işğal etməsi və azərbaycanlılara qarşı etnik təmizləmə siyasəti həyata keçirməsi olub. Məhz bu faktı əsas götürərək qardaş Pakistan Ermənistanla siyasi-diplomatik münasibətlər qurmaqdan çəkinib. Lakin Azərbaycanın ərazi bütövlüyünün və suverenliyinin təmin olunması yeni bir mənzərəni formalaşdırdı və Çində Pakistanla Ermənistan arasında diplomatik münasibətlərin qurulmasına dair kommünike imzalandı. Hesab edirəm ki, iki dövlət arasında diplomatik münasibətlərin qurulması həm də Cənubi Qafqazda sülhə, təhlükəsizliyə və sabitliyə töhfə verə bilər. Lakin Pakistan hər zaman Azərbaycanın haqq işini müdafiə edib, qələbəmizin beş illiyi münasibətilə keçirilən hərbi paradda da qardaş Pakistanın baş naziri Şahbaz Şərif iştirak etdi, Azərbaycan Pakistandan aldığı qırıcıları geniş ictimaiyyətə təqdim etdi. Bütün bunlar bizim ölkələrimiz arasında sıx bağları, möhkəm dostluq əlaqələrini nümayiş etdirir. Hətta Azərbaycanın Şanxay Əməkdaşlıq Təşkilatına üzvlüyünə qarşı çıxan Hindistanın məkrli niyyətinə cavab olaraq Pakistan da Ermənistana qarşı səs verdi”-deyə İ.Hüseynov bildirdi.
İ.Hüseynovun sözlərinə görə, Pakistanın Ermənistana qarşı səs verməsi faktı bizim möhkəm dostluq telləri və tarixi köklərlə bağlı olduğumuzu nümayiş etdirən amildir. “Ona görə də düşünürəm ki, Ermənistan Azərbaycanla münasibətlərdə revanşizm, Azərbaycan torpaqlarının işğalı və eləcə də Azərbaycan ərazilərinə qəsb həyata keçirmək xəyalına düşərsə, bu xüsusda Pakistan da Ermənistanla olan münasibətlərinə yenidən baxa bilər”-deyə İ.Hüseynov qeyd etdi.
İradə SARIYEVA
