İraqdakı Kürdüstan Demokrat Partiyasının (KDP) sədri Məsud Bərzaninin Türkiyənin Şırnak bölgəsində təşkil edilən 4-cü Beynəlxalq Melaye Ciziri Simpoziumuna avtomatla silahlanmış kamuflyajlı cangüdənlərlə qatılmasına Milliyyətçi Hərəkat Partiyasının (MHP) lideri Dövlət Baxçalının sərt reaksiyası ciddi qalmaqala səbəb olub.
Qeyd edək ki, Baxçalı “Türkgün” qəzetinə açıqlamasında silahlı mühafizəçilərin görüntülərini “rüsvayçılıq” kimi qiymətləndirərək sərt tənqidlər səsləndirib.
MHP sədri İraq Kürdüstan Regional Rəhbərliyinin keçmiş sədri və Kürdüstan Demokratik Partiyasının lideri olan Məsud Bərzaninin Şırnakda qatıldığı simpoziumun şouya çevrildiyini bildirərək, qeyd edib: “Xarici geyimli əsgərlərin vətənimizdə uzun müddət silahla dolaşması sadəcə biabırçılıqdır. Türkiyə Respublikasının qanunları pozulmuşdur, bu, Türkiyə Respublikasının nüfuzuna qəsdən edilən zərbədir”. Türkiyə Cümhuriyyətinin suveren hüquqları və qanunlarının pozulduğunu bəyan edən Baxçalı bildirb: “İstər protokol qaydaları, istərsə də adət-ənənələr desəniz, hər şey pozulub. Bu, Türkiyə Respublikasının ləyaqətinə, hörmətinə, tarixi nüfuzuna və suverenliyinə hücumdur”. Məsud Bərzaninin ofisindən Baxçalıya cavab olaraq yayılan açıqlamada MHP liderinin açıqlamaları “şovinist zehniyyətin məhsulu” olaraq qiymətləndirilir və qeyd olunur: “Allahın Dövlət Baxçalıya hidayət verdiyini, onun irqçilik və şovinizmdən əl çəkdiyini düşündük, lakin görünən odur ki, o, hələ də öz köhnə təfəkküründə qalıb”. Ərbildə yerləşən “Rudaw” nəşrinin məlumatına görə, səfər zamanı təhlükəsizlik tədbirlərinin Ankara ilə Ərbil arasında əldə olunan razılaşmaya əsaslandığı ifadə edilən bəyanatda daha sonra qeyd olunur: “Təəssüf ki, Dövlət Baxçalı Bərzaninin Cizrə səfəri və Melaye Ciziri simpoziumunda iştirakı ilə bağlı bir daha şovinist təfəkkürlə danışdı; Bərzani heç bir ənənəyə uyğun olmayan açıqlamalar vermədi. Bərzaninin səfəri ilə bağlı bütün təhlükəsizlik təfərrüatları və görülən tədbirlər Kürdüstan bölgəsinin müvafiq qurumları ilə Türkiyə arasında imzalanan protokol razılaşmasına uyğun olaraq həyata keçirilib”. Açıqlamada Türkiyə rəsmilərinin Şimali İraqa səfərlərinə də toxunulub: “Üstəlik, yüksək səviyyəli türk rəsmiləri Kürdüstan bölgəsinə nə zaman səfər edərsə, Türkiyə xüsusi təyinatlıları da onlarla birlikdə gəlir və heç bir problem yoxdur”. Bərzaninin səfərinin Baxçalının da dəstəklədiyini iddia etdiyi sülh prosesinə töhfə vermək məqsədi daşıdığı bildirilən açıqlamada təhqirlərə də yol verilib: “Allahın Dövlət Baxçalıya hidayət verdiyini, onun irqçilik və şovinizmdən əl çəkdiyini düşündük. Ancaq görünür, o, hələ də eyni qoca Boz Qurddur, ancaq indi qoyun paltarı geyinib”. Türkiyədə hakim AKP-nin sözçüsü Ömər Çelik bildirib ki, Daxili İşlər Nazirliyi Bərzaninin ölkəyə avtomat silahlı şəxslərlə gəlməsi faktını araşdırır. O, bu faktla etiraz edən MHP sədri Baxçalının bəyanatına cavab olaraq Bərzaninin ofisinindən MHP liderinə qarşı irqçi məzmunlu bəyanatı da qəbuledilməz sayıb: “Qeyd edilən görüntü, əlbəttə ki, xoşagəlməz və ikrah yaradan şərhlər üçün əsas yaradıb. Daxili İşlər Nazirliyi bu məsələ ilə bağlı araşdırma aparır. Nəticə etibarilə, cənab Bərzani aktiv xidmətdə olan biri olmasa da, Türkiyə dövləti onun təhlükəsizliyini təmin etməyə qadir gücə sahib ölkədir. Cənab Baxçalı haqqında Bərzaninin ofisi adından hörmətsiz bir mesaj yayımlandı. Bu, təbii ki, hörmətsizlikdir. Qarşı tərəf irqçi və faşist kimi ifadələrdən istifadə edib. Cənab Baxçalı isə o açıqlamanı verərkən Bərzanini qoruyan cangüdənlərə toxunub, onun şəxsinə yox... Onun ofisinin açıqlaması birbaşa cənab Baxçalıya hörmətsizlikdir. Bu, qəbuledilməzdir və dərhal düzəldilməlidir". Çelik daha sonra bildirib ki, Daxili İşlər Nazirliyi peşmərgələrin avtomat silahla Şirnaka girməsi faktı ilə bağlı bölgəyə iki müfəttiş göndərib: "Məsələ dərindən araşdırılacaq". Türkiyə prezidenti Rəcəb Tayyip Ərdoğanın baş müşaviri Mustafa Akış isə qeyd edib: “Keçmiş dövlət məmuru bir yana, bir dövlət başçısı ölkəmizə gəlsə belə, mərasim zabiti istisna olmaqla, onların mühafizəçiləri heç vaxt hərbi forma geyə bilməzlər və tapançadan başqa uzun lüləli silah gəzdirə bilməzlər. Türkiyə Cümhuriyyəti istər Şırnakda, istər Bağdadda, istərsə də Ərbildə öz qonaqlarını qoruyacaq qədər güclü və güclüdür”. Türkiyənin Xarici İşlər Nazirliyi də Bərzani ofisinin adından yayılan bəyanatı pisləyib və bu sözləri həm ton, həm də mahiyyət etibarilə qəbuledilməz adlandırıb. Nazirlikdən verilən yazılı açıqlamada Bərzani ofisinin dediklərində əsassız iddiaların yer aldığı və hörmətsiz, təxribatçı ifadələrdən istifadə edildiyi bildirilib. Ankara bu fonda Kürdüstan Demokratik Partiyasının rəhbərliyindən rəsmi şəkildə izahat tələb etdiyini və məsuliyyət daşıyanlara qarşı dərhal tədbir görülməsini tələb etdiyini bildirib. Xarici İşlər Nazirliyi Kürdüstan Demokratik Partiyasının rəhbərliyindən mübahisəli bəyanatın mənşəyini dərhal aydınlaşdırmasını və məsul şəxslərin məsuliyyətə cəlb edilməsini gözlədiyini bildirib və bu cür ritorikanın dostluq münasibətləri və qarşılıqlı hörmətlə bir araya sığmadığını vurğulayıb.
Nahid SALAYEV
