Sahil Kərimli: “Minsk Qrupu Azərbaycan xalqına və beynəlxalq ictimaiyyətə hesabat verməli və öz fəaliyyətsizliyinə, yarıtmazlığına izah gətirməlidir”
Qarabağ probleminin həllinə məsul olan və bu yöndə üzərinə öhdəliklər götürən, lakin münaqişənin aradan qaldırılmasına heç bir töhfə verməyən ATƏT-in Minsk Qrupu Azərbaycanın tələbi ilə özünü buraxdı. Təbii ki, təsisatın özünə qalsaydı bunu etməzdi.
Minsk Qrupu özünün 30 illik fəaliyyətinin hansı səbəbdən uğursuz olduğu, Qarabağ problemini niyə həll edə bilmədiyi və yaxud da niyə həll etmək istəmədiyi barədə sualları özündə əks etdirən bir rəsmi hesabat yaymalıdırmı? Yaxud ATƏT rəhbərliyi bununla bağlı bir hesabat təqdim etməlidirmi? Bütün Azərbaycan gözləyir ki, 30 il biz bu təsisata xərc çəkdik, ATƏT-in Minsk Qrupunun həmsədrləri Azərbaycana gəlib-getdilər, yeyib-içdilər, ölkəmizə ziyan vurdular, buradan pullar, hədiyyələr apardılar, onlar nəhayət bir izah, hesabat verməli deyillərmi ki, onların 30-35 illik fəaliyyəti niyə uğursuz oldu? Problemi həll etmək istəmədilər, yoxsa bacarmadılar? Azərbaycan xalqı onlardan bu hesabatı, bu izahı gözləyir.
“ATƏT-in rəhbərliyi də belə bir hesabat yaymalı və Azərbaycandan üzr istəməlidir”
Siyasi ekspert Sahil Kərimli “Bakı-Xəbər”ə bildirdi ki, ATƏT-in Minsk Qrupu özünün 30 illik uğursuz fəaliyyətinin səbəbləri barədə hesabat yaymalıdır: “Əlbəttə, Minsk Qrupu Azərbaycanla Ermənistan arasında yaranmış Qarabağ probleminin və Azərbaycanın ərazi bütövlüyünün və suverenliyinin təmin olunması istiqamətində bütün məsələlərin həll edilməsi üçün yaradılmışdı. 30 il heç bir səmərəli fəaliyyəti olmayan Minsk Qrupu Azərbaycan xalqına və beynəlxalq ictimaiyyətə hesabat verməli və öz fəaliyyətsizliyinə, yarıtmazlığına izah gətirməlidir. Öz fəaliyyətsizliyini etiraf etməlidir. Onun bu barədə hesabat yaymasını gözləyirik. Çünki 30 il az müddət deyil və bu illər ərzində Minsk Qrupu öz üzərinə çox ciddi öhdəlik götürmüşdü, bu təsisata çox ciddi bir missiya həvalə olunmuşdu. Amma təəssüf ki, bu qurumun heç bir səmərəli fəaliyyəti olmadı, Ermənistana təzyiq göstərmədi, BMT-nin qətnamələrinin həyata keçirilməsi üçün heç bir əməli addım atmadı. Minsk Qrupu həmsədrləri yalnız bölgəyə, İrəvana və Bakıya səfərlər etməklə, o dövrdə işğalda olan ərazilərimizi turist kimi gəzməklə gözə kül üfürməyə çalışdılar. Həmsədrlər münaqişəni dondurmaqdan, münaqişənin həllini uzatmaqdan başqa heç bir əməli iş ortaya qoymadılar. Əlbəttə ki, burada təkcə Minsk Qrupunun yox, bir çox beynəlxalq qurumların, BMT-nin və başqa qurumların da üzərinə məsuliyyət düşür. Çünki həmin təşkilatlar da Ermənistana heç bir təzyiq göstərmədilər. Əlbəttə ki, ATƏT-in rəhbərliyi də belə bir hesabat yaymalı və Azərbaycandan üzr istəməlidir”.
S.Kərimlinin fikrincə, ATƏT və Minsk Qrupu ona görə Azərbaycandan üzr istəməlidirlər ki, Azərbaycan öz problemini təkbaşına özü həll etdi, halbuki, bunu ATƏT, onun Minsk Qrupu həll etməli, başqa qurumlar da buna dəstək göstərməli idi. “Amma onlar bunu etmədilər. Azərbaycan beynəlxalq qurumların edəcəyi işi öz gücü və qüdrəti hesabına həll etdi. ATƏT-in Minsk Qrupunun ölkəmizə səfərləri, onların bu istiqamətdə külli miqdarda pullar qazanması, müxtəlif çirkin oyunlar oynaması heç də gizli bir proses deyil. Bu bütün dünyaya məlum olan məsələdir. Əlbəttə ki, Minsk Qrupu həmsədrləri uzun illər bu məsələyə görə böyük vəsaitlər də mənimsəyiblər. Bu qrupun saxlanılması üçün ATƏT-dən külli miqdarda vəsaitlər ayrılıb. Amma təəssüf ki, bu problem hüquqi və qanuni baxımdan Minsk Qrupu tərəfindən həll olunmadı. Nəhayət Azərbaycan bu problemin həllinə özü nail oldu. Minsk Qrupunun rəsmi ləğv olunması da Azərbaycanın uğurudur. İlk növbədə Azərbaycan öz ərazi bütövlüyünü və suverenliyini heç bir dəstək olmadan özü bərpa etdi. Bundan sonra bölgədə yeni reallıqlar yarandı və Azərbaycanın yaratdığı bu reallıqlarla nəhayət bütün dünya barışmalı oldu, xüsusilə də ATƏT və Minsk Qrupu. Minsk Qrupunun ləğvi ilə bağlı Azərbaycan dövlətinin apardığı siyasət, irəli sürdüyü tələblər öz həllini tapmış oldu”-deyə S.Kərimli qeyd etdi.
İradə SARIYEVA
