Elşad Həsənov: “Bu heç bir əxlaqi, etik normalara sığmır”
Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham edilən Prezident Adminstrasiyasının sabiq rəhbəri Ramiz Mehdiyevin işi ilə bağlı maraqlı bir yanaşma var.
Yəni məsələnin siyasi, geosiyasi, hüquqi və kriminal tərəfini bir kənara qoyub ona sırf etik-əxlaqi, mental kontekstdən yanaşılarsa, Ramiz Mehdiyev milli mentalitet və əxlaq normaları baxımından düz hərəkət etdi?
Nəzərə alsaq ki, Heydər Əliyev ona bütün ömrü boyu çörək verib, Mərkəzi Komitənin birinci katibi olanda onu gənc yaşda irəli çəkib, müxtəlif vəzifələrə qoyub, etimad göstərib. Heydər Əliyev Moskvaya gedəndən sonra R.Mehdiyev vəzifələrdən kənarda qaldı, necə deyərlər, onu alıb-satan olmadı. Lakin Heydər Əliyev Azərbaycanda ikinci dəfə hakimiyyətə qayıdışından sonra yenə də R.Mehdiyevi yanına gətirdi, ona yüksək vəzifə verdi. 30 ilə yaxın bir müddət ərzində R. Mehdiyev ölkədə ikinci adam oldu. Ona bu qədər hörmət edən, etimad göstərən, karyera yüksəlişi verən hakimiyyətə qarşı onun bu davranışlarının etik, əxlaq qaydalarına zidd olduğu ortadadır. Onun davranışlarını mənəvi, etik baxımdan qiymətləndirsəniz haqqında nə demək olar?
“Ramiz Mehdiyevin hakimiyyətə qarşı bu hərəkətinin adı nankorluq və riyakarlıqdır”
Siyasi ekspert Elşad Həsənov “Bakı-Xəbər”ə bildirdi ki, R.Mehdiyevin dövlət çevrilişi etmək istəməsi, onunla bağlı üzə çıxan faktlar cəmiyyətdə şok effekt yaratdı: “Uzun illər hakimiyyətin ən yuxarı eşelonunda olan, ulu öndər Heydər Əliyev tərəfindən işə götürülən, onun dəstəyi ilə vəzifələrdə yüksələn, Mərkəzi Komitənin katibi vəzifəsinə qədər gedib çıxan, Heydər Əliyev Moskvaya gedəndən sonra vəzifədən çıxarılan, necə deyərlər, küçəyə atılan bir insan Heydər Əliyev ikinci dəfə hakimiyyətə gələndən sonra yenə də vəzifəyə gətirilib uzun illər hakimiyyətdə ən yüksək vəzifə tutduqdan sonra bu gün hakimiyyətə qarşı çıxıb. Dövlət çevrilişi etmək istəyib. Bu rəzillikdir. İnanın ki, onun bu hərəkətləri ilə bağlı insan deməyə söz tapmır.
Ramiz Mehdiyevin hakimiyyətə qarşı bu hərəkətləri azərbaycanlı mentalitetinə, Azərbaycan kişisinə xas olan xüsusiyyət deyil, bu heç bir əxlaqi, etik normalara sığmır. Ramiz Mehdiyevin hakimiyyətə qarşı bu hərəkətinin adı nankorluq və riyakarlıqdır. Xalqımızın gözəl bir adət-ənənəsi var: sənə çörək verənə həmişə borclusan. Sənə arxa durana arxadan zərbə vuranda sən kim olduğunu açıq şəkildə göstərirsən. Bu nanəciblikdir, naxələflikdir. Görkəmli dövlət xadimi Həsən Həsənovun təbirincə desək, bu böyük nankorluq və riyakarlıqdır. Ramiz Mehdiyev indiyə qədər keçdiyi həyat yoluna özü böyük bir ləkə vurdu. Bu əməlləri etməsəydi və dünyasını dəyişsəydi Ramiz Mehdiyev dövlət xadimi kimi Azərbaycan dövlətçiliyi tarixində bəlkə də qala bilərdi. Amma bu xəyanətkar əməlləri onun bütün karyerasının, fəaliyyətinin üstündən xətt çəkdi, o, Azərbaycan xalqının yaddaşında dövlətçiliyə qarşı çıxan, ona çörək verənə xəyanət edən nankor bir şəxs kimi qalacaq”.
E.Həsənovun fikrincə, radikal müxalifətin hakimiyyətə qarşı davranışlarının arxasında onların hakimiyyətə gəlmək marağı dayanıb: “Bu çevrilişi etməyə çalışan Əli Kərimli, Cəmil Həsənli və digərlərinin əməlləri hardasa başadüşüləndir. Çünki onlar müxalifətdir, hakimiyyətə gəlmək istəyirlər. Bununla da bağlı onların özlərinin ifadəsi ilə desək, hətta şeytanla da əməkdaşlıq etmək istəyirlər ki, təki hakimiyyəti devirib özləri hakimiyyətə gəlsinlər. Çünki hakimiyyətin dadı damaqlarından getməyib. Ancaq 2019-cu ilə qədər Prezident Administrasiyasının rəhbəri olan və demək olar ki, bütün təyinatlara, hətta deputat seçkilərinə də müdaxilə edən bir şəxs olan Ramiz Mehdiyev vəzifədən gedəndən sonra dövlətə xəyanət yolunu tutub və çevriliş planı hazırlayıb, yaxın ətrafını bir yerə toplamağa çalışıb. Bunun üçün də Rusiya ilə əlaqələr saxlayıb. Ümumiyyətlə, Sovet dönəmində də, sonrakı mütəqillik illərində də Ramiz Mehdiyevin Moskvanın adamı olmasını hamı bilirdi”.
E.Həsənovun sözlərinə görə, bu fakt hamıya məlum idi, gizlin məsələ deyil. O vurğuladı ki, onun Moskva ilə əlaqədə olduğunu, orada təhsil aldığını, elmi iş müdafiə etdiyini hər kəs bilir. Moskvanın R.Mehdiyevi gəncliyindən ələ aldığını deyən E.Həsənovun fikrincə, o da onlara sədaqət göstərirdi və Azərbaycanı da Moskvasız təsəvvür edə bilmirdi. “Sən necə akademik olasan və Azərbaycanı rəzil günə qoymaq istəyəsən? Azərbaycan müstəqil dövlətdir, biz dövlət müstəqilliyimizlə fəxr edirik. Müstqəillik illərində, son 34 ildə Azərbaycan doğrudan da xarüqələr yaradıb. Bütün şəhərlərimiz, kəndlərimiz abadlaşıb, ölkəmiz inkişaf edir. Azərbaycan müzəffər Ali Baş Komandanın rəhbərliyi ilə 2020-ci ildə 44 günlük müharibədə böyük qələbə çaldı, torpaqlarımız işğaldan azad edildi, ərazi bütövlüyümüz təmin olundu. Bu sevincli, gözəl günləri görən xalq da Prezidentin ətrafında daha da sıx birləşdi. Belə bir dövrdə dövlət çevirilişi etmək sözün həqiqi mənasında nadanlıqdır, burnunun ucundan o yananı görməməkdir. Rusiyaya güvənmək işin axırını gətirib belə şeylərə çıxarır”-deyə E.Həsənov bildirdi.
İradə SARIYEVA
