Ramil Məmmədli: “Rusiya Ukraynada addım-addım irəliləyir, Rubio suverenlik nağılı danışır”
ABŞ-da Ukrayna nümayəndə heyəti ilə sülh planı üzrə məsləhətləşmələr zamanı dövlət katibi Marko Rubio mətbuata açıqlamasında bunları bildirib:
“Söhbət təkcə müharibənin bitməsindən getmir, həm də bu müharibədən müstəqil və suveren dövlət kimi çıxmaqdan gedir – elə bir dövlətdən ki, artıq yeni müharibə təhlükəsi ilə üzləşməsin və xalqı firavan yaşasın. Ukraynanın böyük iqtisadi potensialı var, lakin onu müharibə şəraitində açmaq mümkün deyil”.
Rubio deyir ki, söhbət müharibənin bitməsindən yox, Ukraynanı suveren dövlət kimi saxlamaqdan gedir. Əgər Ukrayna ərazi problemini ləyaqətlə həll edə bilməyəcəksə, bu ölkənin suverenliyinin hansı qorunmasından söhbət gedə bilər? Əgər Ukrayna ərazilərinin hansısa bir hissəsini faktiki olaraq Rusiyaya güzəştə getməkdən söhbət gedirsə və buna əsaslanan sülh sazişi hazırlanıbsa, o zaman Ukraynanın hansı suverenliyinin qorunmasından söhbət gedir? Suverenlik ərazi bütövlüyü ilə eyni statusa malik deyilmi? Ərazisinin bir hissəsini Rusiyaya verəcəksə, Ukrayna haradan suveren dövlət olacaq?
“Birləşmiş Ştatlar sanki bu ölkəni qumar masasına qoyub”
Sözügedən məsələni “Bakı-Xəbər”ə şərh edən hərbi ekspert Ramil Məmmədlinin fikrincə, Rubionun fikirləri həm ziddiyyətli, həm də qeyri-ciddi təsir bağışlayır: “Əvvəla, deyilən formada Rusiya Birləşmiş Ştatların yanaşmasını qəbul edəcəkmi? Qəbul edəcəksə, o zaman 4 ilə yaxındır müharibə aparmağın, böyük itki verməyin anlamı nədir? Bu baxımdan Rubio kimi inandırır? Putin bəyan edir müharibə o zaman dayanacaq ki, Ukrayna Donbasın digər ərazilərini də tərk edəcək. Halbuki, Donbasın çox kiçik hissəsi Ukraynanın nəzarəti altında qalıb. Birləşmiş Ştatlar sanki Ukrayna ərazilərini qumar masasına qoyub. Rusiyanın bu dərəcədə irəli getməsində, beynəlxalq hüquqa tüpürməsində ABŞ-ın da günahı az deyil. Tramp deyəndə ki, Kanada, Qrenlandiya ABŞ-ın bir hissəsi olmalıdır, o zaman Rusiyadan nə gözləməliydik? ABŞ 1975-ci ildə ölkələrin sərhədlərinin toxunulmazlığı ilə bağlı imzaladığı Helsinki Yekun Aktına faktiki olaraq sahib çıxmır. Dəfələrlə Rusiyaya qarşı sərt sanksiyaların tətbiq ediləcəyini bəyan ediblər, amma son anda bundan imtina ediblər. Tramp prezident vəzifəsini icra etməyə başladığı gündən Zelenskini güzəştə getməyə təhrik edir, bununla bağlı təzyiqlər göstərir. Rusiya Ukraynada addım-addım irəliləyir, Rubio suverenlik nağılı danışır. O baxımdan hesab edirəm ki, ABŞ dövlət katibinin səsləndirdiyi fikirləri ciddi qəbul etmək olmur”.
Vidadi ORDAHALLI
