Bəhruz Quliyev: “Artıq proses yalnız müxalifət daxilində deyil, hakimiyyət komandasının daxilində də müəyyən təmizlənmə dalğasına səbəb ola...”
Dövlət Təhlükəsizliyi Xidməti tərəfindən saxlanılan AXCP sədri Əli Kərimli barəsində Səbail rayon Məhkəməsi 2 ay 15 gün müddətinə həbs qətimkan tədbiri seçib. Əli Kərimliyə Cinayət Məcəlləsinin 278.1 (hakimiyyəti zorla ələ keçirmə və ya onu zorla saxlama, dövlətin konstitusiya quruluşunu zorla dəyişdirmə) maddəsi üzrə ittiham irəli sürülüb.
Əli Kərimli Prezident Administrasiyasının sabiq rəhbəri Ramiz Mehdiyevin cinayət işi üzrə istintaqa cəlb olunub.
Hələ məhkəmənin R.Mehdiyev barədə həbs qərarı qəbul etdiyi ilk vaxtlarda onun AXCP sədri Ə.Kərimli ilə əlaqəsinin olduğu barədə məsələlər ortaya çıxmışdı. Təbii ki, o əlaqələr özbaşına yaranmayıb, buna vasitəçilik edənlər olub. Bu məntiqlə hakimiyyət komandası daxilində də həbslər ola bilərmi? Əli Kərimli ilə Ramiz Mehdiyevin arasında vasitəçiliyi kim edib və ya kim edə bilərdi?
“Əli Kərimli-Ramiz Mehdiyev xəttində vasitəçilik edən şəxslərin olması siyasi məntiqə tam uyğundur”
“SƏS” qəzetinin baş redaktoru, siyasi ekspert Bəhruz Quliyev “Bakı-Xəbər”ə bildirdi ki, son günlər Ramiz Mehdiyevin işi üzrə Əli Kərimli ətrafında gedən proseslər və xüsusilə də ağır maddələrlə açılan cinayət işi siyasi gündəmin əsas mövzularından birinə çevrilib: “Ortaya çıxan məlumatlar göstərir ki, AXCP sədrinin Ramiz Mehdiyevlə illərdir davam edən gizli əlaqələri təkcə siyasi fiqurlar arasında təsadüfi təmaslar deyil, sistemli şəkildə qurulmuş əlaqələr şəbəkəsinin məhsuludur. Bu cür rabitələr heç vaxt özbaşına yaranmır, arada vasitəçilər, informasiya daşıyanlar, əlaqə qurucuları mütləq olmalıdır. Açıq şəkildə kimlərin vasitəçilik etdiyini rəsmi qurumlar desə daha doğru olar. Ancaq siyasi texnologiyalar baxımından bu cür əlaqələr adətən keçmiş sistem adamları, köhnə siyasi elitada yer almış, həm müxalifət, həm də iqtidar dairələrinə bir vaxtlar yaxın olmuş şəxslər vasitəsilə təmin olunur”.
B.Quliyev qeyd etdi ki, Azərbaycanda da illərlə müxtəlif siyasi komandalarda yer almış və özünü “iki tərəfi də tanıyan” kimi təqdim edənlər az olmayıb: “Ona görə də Əli Kərimli-Ramiz Mehdiyev xəttində vasitəçilik edən şəxslərin olması siyasi məntiqə tam uyğundur.
Maraqlı məqam budur ki, bu əlaqələr ortaya çıxdıqca artıq proses yalnız müxalifət daxilində deyil, hakimiyyət komandasının daxilində də müəyyən təmizlənmə dalğasına səbəb ola bilərmi sualı aktuallaşır. Çünki hər bir siyasi əlaqə, xüsusilə də köhnə sistemdən miras qalan əlaqələr zənciri bəzən gözlənilməz istiqamətlərə çıxır. Hakimiyyətin son illər apardığı islahat xətti, köhnə strukturların sıradan çıxarılması və idarəetmədə yeni modelə keçid göstərir ki, belə hallarda ciddi araşdırmalar qaçılmazdır.
Bu baxımdan, “hakimiyyət daxilində həbslər ola bilərmi” sualı tamamilə əsassız görünmür. Əgər araşdırmalar nəticəsində dövlətə qarşı yönəlmiş gizli əlaqələr, informasiyanın ötürülməsi, siyasi manipulyasiya və ya kölgə şəbəkələrinin fəaliyyəti üzə çıxarsa, hüquqi mexanizmlərin işləməsi labüddür. Dövlət marağı hər şeydən üstündür və sistemə zərər gətirən istənilən şəxs, istər müxalifətdən, istərsə də keçmiş və ya hazırkı hakimiyyət çevrələrindən olsun, məsuliyyət daşımalıdır” - deyə ekspert əlavə etdi.
Siyasi şərhçinin fikrincə, bu gün baş verən proseslər göstərir ki, Azərbaycan dövləti köhnə intriqalara, siyasi şəbəkələrə, kabinet sövdələşmələrinə artıq yol vermək niyyətində deyil. Hər kəs üçün eyni hüquqi məsuliyyət standartı tətbiq olunur:"Gedişat onu deməyə əsas verir ki, bu iş yalnız bir şəxsin məsuliyyəti ilə yekunlaşmayacaq. Hesab edirəm, əlaqələr zənciri haraya uzanırsa, araşdırma da ora qədər gedəcək”.
İradə SARIYEVA
