Arzuxan Əlizadə: “Yalnız sülh sazişi imzalanandan sonra yüksək səviyyəli qarşılıqlı səfərlər ola bilər”
Ermənistan parlamentinin spikeri Alen Simonyan istənilən vaxt Azərbaycana səfər etməyə hazır olduğunu deyib.
Simonyan müəyyən formatlar çərçivəsində azərbaycanlı həmkarını da Ermənistana dəvət etməyi planlaşdırır. O, Azərbaycandan səfər üçün rəsmi dəvət alıb-almadığı barədə suala isə “xeyr” cavabını verib. Bununla belə, əgər belə bir dəvət olarsa, onu nəzərdən keçirəcəyini bildirib. Simonyan həmçinin qeyd edib ki, Azərbaycanın 2026-cı ilin mayında İrəvanda keçiriləcək Avropa Siyasi Birliyi sammitində iştirakdan imtinası Ermənistanla bağlı deyil: “Xanım Qafarova görüş zamanı xahiş etdi ki, prezidentlərinin adından çatdırım – bu qərarın Ermənistan tərəfi ilə heç bir əlaqəsi yoxdur”, – deyə erməni spiker vurğulayıb.
“Dünyada geosiyasi proseslər çox sürətlə getdiyindən, hər an nəsə baş verə bilər”
Sözügedən məsələni “Bakı-Xəbər”ə şərh edən AMİP sədri, millət vəkili Arzuxan Əlizadə hesab edir ki, iki ölkə arasında münasibətlər hələ o səviyyədə deyil: “Bəli, iki il əvvəlki dövrlə müqayisədə çox şey dəyişib. Sərhəddə atəşkəs pozulmur, tərəflər arasında rəsmi səviyyədə qarşılıqlı ittihamlar səslənmir, sərhədin müəyyən hissəsi delimitasiya olunub və s. Lakin bütün bunlar o demək deyil ki, Azərbaycanla Ermənistan arasında hər şey yoluna düşüb, həll ediləsi məsələ qalmayıb və rəsmi qarşılıqlı səfərlərə start verilməlidir. Bu gün ən vacib məsələ iki ölkə arasında sülh sazişinin imzalanmasıdır. Sülh sazişinin imzalanmasına yeganə maneə Ermənistan Konstitusiyasında Azərbaycana qarşı ərazi iddialarının mövcudluğudur. Nə qədər ki bu çıxarılmayıb və yaxud da yeni Konstitusiya qəbul olunmayıb, iki ölkə arasında sülh sazişinin imzalanması mümkün deyil. Nəzərə almaq lazımdır ki, Ermənistanda gələn ilin iyununda parlament seçkiləri keçiriləcək. Biz hələ bilmirik seçkilərdə kim qalib gələcək. Bəli, Paşinyanın reytinqi aşağı düşsə də, revanşist müxalifətdən öndədir. Ancaq dünyada geosiyasi proseslər çox sürətlə getdiyindən, hər an nəsə baş verə bilər. O baxımdan istənilən ssenariyə, potensial təhdidlərə hazır olmalıyıq. Biz də maraqlıyıq ki, indiki dövrdə Paşinyan yenidən seçkilərdə qalib gəlsin. Çünki hələ ki, Paşinyana alternativ mötədil siyasi qüvvələri görmürük. Ortada olanlar revanşist qüvvələrdir, onlar da Rusiyaya bağlıdır. Azərbaycan-Ermənistan münasibətlərinin normallaşmasında Paşinyanın atdığı addımları revanşistlər onsuz da süngü ilə qarsalayırlar. Paşinyanı Azərbaycanın maraqlarına işləməkdə ittiham edirlər. Halbuki, Azərbaycan ordusunun döyüş meydanında qazandığı qələbə və Prezident İlham Əliyevin qətiyyəti sayəsində Ermənistan ram olub. Bu, həmin Paşinyandır ki, 2019-cu ildə “Qarabağ Ermənistandır” deyirdi. Fikrimcə, yalnız sülh sazişi imzalanandan sonra yüksək səviyyəli qarşılıqlı səfərlər ola bilər. Hələ görüləsi işlər çoxdur”.
Vidadi ORDAHALLI
