Sahil Kərimli: “Qazaxıstan tərəfin obyektiv, ədalətli, reallığı əks etdirən bir hesabat təqdim edəcəyinə ümid edirik”
Qazaxıstan tezliklə Azərbaycanın Rusiya səmasında vurulan sərnişin təyyarəsi ilə bağlı məlumat dərc edəcəyini açıqlayıb.
Tengrinews.kz xəbər verir ki, dekabrın 25-də Aktau yaxınlığında qəzaya uğrayan "Azərbaycan Hava Yolları"na (AZAL) məxsus təyyarənin qəzası ilə bağlı istintaq hesabatı bu ilin sonuna qədər təqdim olunacaq. Bu barədə Qazaxıstanın nəqliyyat nazirinin müavini Maksat Kaliakparov hökumət brifinqində bildirib.
Kaliakparov xatırladıb ki, üç ayın ilkin nəticələri artıq müvafiq komissiya tərəfindən tam şəkildə təqdim edilib. Hazırda mürəkkəb ekspert qiymətləndirmələrini əhatə edən daha dərin araşdırma aparılır. Kaliakparovun sözlərinə görə, bu, çox əmək tələb edən bir işdir və başa çatdıqdan sonra yekun hesabat mediaya açıqlanacaq.
“Hazırda dəqiq bir müddət deyə bilmərik. Bu, kifayət qədər ciddi bir məsələdir, ona görə də tarixə zəmanət verə bilmərəm. Amma ilin sonunda mətbuat açıqlaması verəcəyik", - deyə o bildirib.
İlin sonlarına az qalır və bu ilin dekabr ayının 25-də təyyarəmizin vurulmasının bir ili tamam olacaq.
Ekspertlərin gözləntisi nədən ibarətdir, qazaxıstanlı nazir Azərbaycan ictimaiyyətini tam qane edən hesabat ortaya qoya biləcəkmi?
Politoloq Sahil Kərimli “Bakı-Xəbər”ə bildirdi ki, Azərbaycanın mülki təyyarəsinin Rusiya tərəfindən vurulmasından artıq bir ilə yaxın vaxt keçir. “Bu dövr ərzində bu hadisə, onun ardınca isə bu ölkədə azərbaycanlılara, Azərbaycan diasporuna qarşı həyata keçirilən radikal tədbirlər, rus polisinin Azərbaycan əsilli Rusiya vətəndaşları ilə bağlı qanunsuz əməlləri, soydaşlarımızın qətlə yetirilməsi və sair Azərbaycanla Rusiya arasında münasibətlərin gərginləşməsinə səbəb oldu. Düzdür, təyyarəmiz vurulandan sonra Rusiya prezidenti Azərbaycan Prezidentinə zəng vurub üzrxahlıq etdi. Amma Rusiyanın siyasi dairələrində, ictimai-siyasi paltformalarında Azərbaycana qarşı uzun müddət qərəzli mövqe göstərildiyinin şahidi olduq. Münasibətlərin gərginləşdirilməsi üçün Rusiyanın həmin platformalarından bir sıra addımlar atıldı. Bu da Azərbaycanla Rusiya arasında münasibətlərin həddən artıq gərginləşməsinə gətirib çıxardı. Biz ilk gündən Azərbaycan dövlətinin, Prezident İlham Əliyevin sərt, qətiyyətli, barışmaz mövqeyini gördük. Rusiya dövlətindən günahkarların cəzalandırılması, qəzada həlak olanların ailələrinə təzminatın ödənilməsi, Azərbaycandan üzr istənilməsi və sair məsələlər tələb olunurdu. Amma təəssüf ki, ötən müddət ərzində biz Rusiya tərəfindən bu addımların atıldığını görmədik. Doğrudur, bir neçə ay əvvəl Azərbaycan Prezidenti İlham Əliyevlə Rusiya Prezidenti Vladimir Putin arasında çox önəmli bir görüş oldu və bu görüş əsnasında Putin təyyarəmizin Rusiya tərəfindən vurulduğunu etiraf etdi, üzrxahlığını bildirdi və təzminatın ödəniləcəyini dedi. Bundan sonra münasibətlərimizdəki gərginliklər müəyyən qədər aradan qalxdı və istiləşmə başladı”.
Son dövrlər Azərbaycanla Rusiya arasında iqtisadi sahədə çox ciddi razılaşmaların əldə olunduğunu, müəyyən müqavilələrin imzalandığını deyən ekspertin sözlərinə görə, amma bu o demək deyil ki, Azərbaycan təyyarəmizin vurulması faktını unudub, tələblərindən imtina edib. “Xeyr, Azərbaycan öz tələblərinin üstündə sərt və qətiyyətli şəkildə dayanıb.
Təyyarə qəzasının baş verməsinin bir illiyi ərəfəsində nəticələrin açıqlanacağı gözlənilir. Qazaxıstan tərəfi bu məsələ ilə bağlı hesabat ortaya qoyacağını bildirib. Biz yaxın vaxtlarda bunun şahidi olacağıq. Qazaxıstan tərəfi Azərbaycan təyyarəsinin vurulması ilə bağlı elan edəcəyi nəticələrdə, hesabatda, çox böyük ehtimalla, tam reallığı ortaya qoyacaq, ədalətli olacaq. Heç kimə sirr olmayan faktlar bir daha rəsmi şəkildə açıqlanacaq. Yəni Qazaxıstan tərəfin obyektiv, ədalətli, reallığı əks etdirən bir hesabat təqdim edəcəyinə ümid edirik”.
S.Kərimli hesab edir ki, bu hesabatdan sonra Rusiya tərəfi Azərbaycandan rəsmi şəkildə üzr istəyəcək. O qeyd etdi ki, bir neçə ay əvvəl Əliyevlə Putin arasında bu barədə ilkin müzakirələr aparılıb. “Yaxın vaxtlarda Rusiya tərəfin bu istiqamətdə ciddi addımlar atması, Azərbaycanın haqlı tələblərini yerinə yetirməsi də reallaşacaq”-deyə S.Kərimli bildirdi.
İradə SARIYEVA
