Bəhruz Quliyev: “Belə dezinformasiyalar nə reallığı dəyişə bilər, nə də Azərbaycan dövlətinin Qarabağda apardığı böyük quruculuq işlərinə kölgə sala bilər”.
Erməni mediasının yaydığı məlumata görə, guya Azərbaycan hakimiyyəti “işğal olunmuş Dağlıq Qarabağın paytaxtını” köçürməyə başlayıb:
“Xankəndi şəhərinə "ilk köçürmə üçün püşkatma" keçirilib. Püşkatma zamanı ailələrin hansı evlərdə və mənzillərdə yaşayacağı müəyyən edilib. Beləliklə, Azərbaycan hakimiyyəti bu köçürmə edənlərin kim olduğu və ya Dağlıq Qarabağla hansı əlaqələrinin olduğu barədə heç bir məlumat vermədən işğal olunmuş Ermənistanın Stepanakert şəhərinə köçürmə edir. Görünür, köçürmə edənlər deportasiya olunmuş ermənilərə məxsus mənzillərdə və ya sökülmüş erməni evlərinin yerində tikilmiş evlərdə yerləşdiriləcəklər”.
Ancaq hər kəs bilir ki, bu gün işğaldan azad edilmiş hər bir bölgədə, o cümlədən Xankəndidə yenidənqurma işləri həyata keçirilir, yeni evlər tikilir. Üstəlik, Xankəndidə əvvəllər də azərbaycanlılar yaşayıb.
“Köçürülən vətəndaşlar isə qanuni şəkildə öz yurdlarında dövlət tərəfindən tikilən yeni mənzillərə yerləşdirilir”
“Səs” qəzetinin baş redaktoru, siyasi ekspert Bəhruz Quliyev “Bakı-Xəbər”ə şərhində bildirdi ki, erməni mediasının növbəti dəfə manipulyativ və əsassız məlumatlar yayması artıq təəccüblü deyil. Guya Azərbaycan Xankəndiyə “kimliyi bəlli olmayan şəxsləri” köçürür, guya onların hansı mənzillərə yerləşdirilməsi gizli saxlanılır və bu evlər “ermənilərin mənzilləri” imiş: “Bu kimi iddialar informasiya təxribatından başqa bir şey deyil. Bu cür qıcıqlandırıcı məlumatlar sülhə qarşı çıxan qrupların marağındadır. Xankəndi və ətraf bölgələr Azərbaycan dövlətinin suveren əraziləridir. 2023-cü ilin antiterror tədbirlərindən sonra, bütün Qarabağ regionunda olduğu kimi, Xankəndidə də böyükmiqyaslı bərpa və yenidənqurma həyata keçirilir. Şəhərdə sıfırdan yeni infrastruktur qurulur, müasir yol-nəqliyyat sistemi formalaşdırılır, abadlıq işləri aparılır, çoxmərtəbəli yaşayış binaları, fərdi evlər, sosial obyektlər, məktəblər və xəstəxanalar inşa edilir.
Erməni mediası bilərəkdən bir mühüm həqiqəti gizlədir: bu ərazilərdə yeni salınan yaşayış fondları tamamilə Azərbaycan dövləti tərəfindən inşa olunur. Köçürülən vətəndaşlar isə qanuni şəkildə öz yurdlarında dövlət tərəfindən tikilən yeni mənzillərə yerləşdirilir. Burada hər hansı “erməni evinin zəbt olunması”, “deportasiya edilmiş ermənilərin mənzilində məskunlaşma” kimi ifadələr köhnəlmiş təbliğatın bir hissəsidir və reallıqla heç bir əlaqəsi yoxdur”.
Həmsöhbətimiz onu da əlavə etdi ki, Xankəndi tarixən Azərbaycan şəhəridir. Bu gün orada aparılan bərpa və məskunlaşma siyasəti Azərbaycanın suveren hüququdur. Azərbaycanlılar vaxtilə yaşadıqları, lakin zorla çıxarıldıqları yurdlarına qayıdırlar: “Bu proses tam şəffaf, qanuni və mərhələli şəkildə həyata keçirilir. Erməni tərəfi yenə də öz informasiya manipulyasiyasını davam etdirərək beynəlxalq ictimaiyyəti çaşdırmağa çalışır. Məqsəd bölgədə gedən nəhəng quruculuq prosesini kölgə altına almaqdır. Amma faktlar ortadadır ki, Azərbaycan Qarabağı bərpa edir, dirçəldir və onu təhlükəsiz, müasir yaşayış məkanına çevirir. Belə dezinformasiyalar nə reallığı dəyişə bilər, nə də Azərbaycan dövlətinin Qarabağda apardığı böyük quruculuq işlərinə kölgə sala bilər”.
Günel CƏLİLOVA
