İlyas Hüseynov: “Vətəndaş cəmiyyətləri arasında da sıx bağlar, möhkəm təmaslar, dostluq münasibətləri...”
Prezident İlham Əliyevin Türk Dövlətləri Təşkilatına üzv ölkələrin qeyri-hökumət təşkilatlarının həmrəylik forumunun iştirakçılarına ünvanladığı müraciətdə bir sıra mühüm fikirlər yer alıb.
Müraciətdə bildirilir: “Türk dövlətlərinin artan potensialı və qlobal müstəvidə gündən-günə güclənən mövqeyi daha iddialı məqsədlərin qarşıya qoyulmasını, birgə səylərin artırılmasını, bütün sahələrdə əməkdaşlığın dərinləşdirilməsini, çevik mexanizmlərin yaradılmasını zəruri edir. İlk dəfə keçirilən Türk Dövlətləri Təşkilatına üzv ölkələrin qeyri-hökumət təşkilatlarının həmrəylik forumu bu istiqamətdə atılmış mühüm addımdır”.
Prezident Əliyev bəyan edib ki, regionda və dünyada sülh, təhlükəsizlik, sabitlik, tərəqqi ideyalarına sadiq olan dost və qardaş xalqlarımızı ortaq etnik köklər, tarix, dil, mədəniyyət, ənənələr və dəyərlər möhkəm bir ailə kimi birləşdirir, türk dövlətlərinin vahid güc mərkəzi kimi çıxış etməsini şərtləndirir.
Prezident nəyi nəzərdə tutur?
“Müştərək layihələrin icrasını da görəcəyik”
Politoloq İlyas Hüseynov “Bakı-Xəbər”ə açıqlamasında bildirdi ki, Azərbaycan türk dünyasının inkişafına çox böyük diqqət yetirir: “Xüsusi vurğulamaq lazımdır ki, Vətən müharibəsindən, eləcə də ərazi bütövlüyümüzü və suverenliyimizi təmin etdikdən sonra türk dünyası daxilində də böyük inkişaf meylləri hiss olunur. Xüsusilə əməkdaşlığın, işbirliyinin, əlaqələrun dərinləşməsi üçün təmaslar genişlənir. Eləcə də qeyd etməliyik ki, Azərbaycan artıq Mərkəzi Asiyada gedən proseslərin ayrılmaz tərkib hissəsidir. Daşkənddə imzalanan mühüm sənədlə Azərbaycan artıq S5 platformasına qoşulub və bu platformanın daxilində olan ölkələrin sayı 6-ya çatıb. Bu, Azərbaycanla Mərkəzi Asiya arasında çox mühüm inteqrasiya perspektivlərini də ifadə edir. Eyni zamanda cənab Prezident İlham Əliyev öz andiçmə mərasimində qeyd etdi ki, biz türk dünyası ailəsinə daxilik. Bu da çox mühüm göstərici hesab oluna bilər. Eyni zamanda, artıq Türk Dövlətləri Təşkilatı çərçivəsində bir sıra görüşləri, təmasları, layihələri, konfransları, simpoziumları, dəyirmi masaları görürük. O cümlədən, Türk Dövlətləri Təşkilatı ölkələrinin QHT-lərinin formuna da ünvanladığı müraciətində cənab Prezident bir sıra mühüm məsələlərə toxunur və bildirir ki, artıq türk dövlətlərinin potensialını artırmaq üçün iddialı layihələr ortaya qoyulmalıdır. Hesab edirəm ki, bizim dövlətlər bu layihələri dəstəkləməlidirlər. Vətəndaş cəmiyyətləri arasında da sıx bağlar, möhkəm təmaslar, dostluq münasibətləri qurulmalıdır. Eyni zamanda, əvvəlki çıxışlarımda da qeyd etmişdim ki, dövlətlərin sıx əməkdaşlığı, dövlət başçılarının dostluq münasibətləri həm də ayrı-ayrı seqmentlərə təsir etməlidir, xalqlar, media, vətəndaş cəmiyyəti arasında da önəmli görüşlər keçirilməsinə ehtiyac var.
Çox şadam ki, bizim bu çıxışları həm də əməli-praktiki səviyyəyə qaldırıblar və məhz çox yüksək səviyyədə görüş təşkil olunur, onun uğurlu nəticələrini də görürük”.
İ.Hüseynovun fikrincə, qarşıdakı dövrdə həm də QHT-lərin layihələrinə dəstək göstərilməsinin şahidi olacağıq. “Biz dövlətlərimizin müxtəlif önəmli sahələrdə müştərək layihələrin icrasını da görəcəyik”-deyə İ.Hüseynov qeyd etdi.
İradə SARIYEVA
