“Bu hadisə sadəcə təsadüf deyil, əksinə, siyasi mesajların daxili və xarici auditoriyaya eyni anda ötürülməsi strategiyasının tərkib hissəsidir”
Türkiyə prezidenti Rəcəb Tayyib Ərdoğanla ABŞ prezidenti Donald Tramp arasında Ağ Evdə görüş keçirildi. Ərdoğan Amerikada Trampla görüş keçirdiyi vaxtda onun hakimiyyət ortağı Dövlət Baxçalı bəyanat verdi ki, Türkiyə-Çin-Rusiya ittifaqı məsələsini nəzərdən keçirməliyik.
Onun sözlərinə görə, dünyaya meydan oxuyan ABŞ-İsrail birliyinə qarşı durmağın ən yaxşı yolu “Trans-Xəzər İmperiyası” ittifaqı yaratmaqdır. “Biz bu ittifaqın Türkiyə, Rusiya və Çindən ibarət olmasını təklif edirik”, - deyə o vurğulayıb.
Baxçalının bu bəyanatı necə başa düşülə bilər?
“Baxçalının bu bəyanatı Qərbə bir növ xəbərdarlıq rolunu oynayır”
Politoloq Tural İsmayılov “Bakı-Xəbər”ə bildirdi ki, prezident Rəcəb Tayyib Ərdoğanın Amerikada Donald Trampla görüş keçirdiyi bir vaxtda Milliyyətçi Hərəkat Partiyasının (MHP) sədri Dövlət Baxçalının Türkiyə-Çin-Rusiya ittifaqı məsələsinin nəzərdən keçirilməsi barədə bəyanat verməsi Türkiyənin çoxşaxəli və balanslı xarici siyasətinin mürəkkəb dinamikasını əks etdirir: “Bu hadisə sadəcə təsadüf deyil, əksinə, siyasi mesajların daxili və xarici auditoriyaya eyni anda ötürülməsi strategiyasının tərkib hissəsidir.
Bu, ilk növbədə, Türkiyənin güclü dövlət siyasəti yürütdüyünü və öz milli maraqlarını müdafiə edərkən heç bir tərəfə qəti şəkildə bağlanmayacağını göstərir. Ərdoğan Vaşinqtonda Qərb müttəfiqləri ilə əlaqələri gücləndirərkən, Baxçalı strateji bir balans yaradır. Baxçalının bu bəyanatı Qərbə bir növ xəbərdarlıq rolunu oynayır. Bu mesajla Ankara, əgər Qərb Türkiyənin milli təhlükəsizlik və iqtisadi maraqlarını nəzərə almasa, alternativ strateji tərəfdaşlıq yolları axtarmağa hazır olduğunu nümayiş etdirir”.
T.İsmayılovun fikrincə, Baxçalının bu təklifi həm də Türk-Çin-Rusiya üçbucağında yaranmaqda olan yeni iqtisadi və siyasi reallıqların əksidir. “Türkiyə Qərbdən aldığı təzyiqləri azaltmaq, iqtisadi diversifikasiyanı sürətləndirmək və regional təsirini artırmaq üçün Asiya güclərinə daha çox üz tutur. Bu ittifaq təklifi həm də Qərbə Türkiyənin NATO-dan uzaqlaşa biləcəyinə dair potensial ssenarini xatırladır.
Bu jestlə MHP rəhbəri daxili auditoriyada, xüsusilə də milliyyətçi və anti-Qərb əhval-ruhiyyəli seçicilər arasında iqtidar mövqeyini gücləndirir. Bu, hakimiyyət koalisiyasının həm Qərbpərəst, həm də Avrasiyaçı baxışları ehtiva edən geniş spektrli siyasəti idarə etmək bacarığını göstərir. Unutmayaq ki, baş verənlər Türkiyənin öz maraqları naminə bütün istiqamətlərdə oynamağa hazır olduğunu sübut edən güclü və ağıllı bir siyasətdir”-deyə T.İsmayılov qeyd etdi.
İradə SARIYEVA
