Prezident İlham Əliyevin BMT-də çıxışı və iqtisadi diplomatiyanın yeni mərhələsi
Prezident İlham Əliyev sentyabrın 25-də Nyu-Yorkda BMT Baş Assambleyasının 80-ci sessiyasında çıxışı ilə beynəlxalq gündəmdə ölkəmizin mövqeyini bir daha qətiyyətlə ifadə etdi. Prezidentin nitqi həm regional, həm də qlobal məsələlər baxımından mühüm əhəmiyyət daşımaqla yanaşı, Azərbaycanın gələcək inkişaf yoluna da işıq saldı.
Avqustun 8-də Vaşinqtonda Prezident İlham Əliyevin, ABŞ Prezidenti və Ermənistanın baş nazirinin iştirakı ilə keçirilən görüşdə sülh müqaviləsinin mətni paraflandı. Bu, Azərbaycanın uzun illər davam edən münaqişə dövrünü arxada qoymaq və regionda dayanıqlı sülhü təmin etmək istiqamətində tarixi addımı idi.
Nyu-York səfəri isə, bu prosesin məntiqi davamı kimi, Azərbaycanın beynəlxalq platformalarda sülhsevər mövqeyini, beynəlxalq hüquqa əsaslanan siyasətini nümayiş etdirdi. Beləliklə, Vaşinqtonda diplomatik-siyasi müstəvidə əldə olunan nəticələr Nyu-Yorkda qlobal tribunadan səsləndirilən mesajlarla tamamlandı.
Yeni mərhələdə Azərbaycanın iqtisadi diplomatiyası
Azərbaycanın iqtisadi diplomatiyası ölkənin xarici siyasətinin mühüm istiqamətlərindən birini təşkil edir və son illərdə yeni məzmun qazanıb. Əgər ilk mərhələdə əsas diqqət enerji resurslarının beynəlxalq bazarlara çıxarılmasına yönəlmişdisə, bu gün artıq iqtisadi diplomatiya daha geniş sahələri əhatə edir. Ulu Öndər Heydər Əliyevin imzaladığı “Əsrin müqaviləsi” Azərbaycanın iqtisadi diplomatiyasının təməl daşı oldu və ölkəni beynəlxalq sərmayələr üçün açıq və etibarlı məkana çevirdi.
Prezident İlham Əliyevin dövründə isə bu siyasət yeni miqyas aldı – enerji layihələri ilə yanaşı, Azərbaycan Avropanın enerji təhlükəsizliyində mühüm tərəfdaşa çevrildi, regionda nəqliyyat və logistika mərkəzinin yaradılması istiqamətində böyük layihələr reallaşdırıldı.
Bu gün Azərbaycanın iqtisadi diplomatiyası artıq sadəcə enerji sahəsinə bağlı deyil. Azad olunmuş torpaqlarda aparılan bərpa-quruculuq işləri, yaşıl enerji zonalarının yaradılması, beynəlxalq sərmayələrin cəlb edilməsi və Bakıda keçiriləcək beynəlxalq investisiya forumu ölkənin yeni iqtisadi modelinin əsas elementləridir. Azərbaycan artıq özünü yalnız regional enerji mərkəzi kimi deyil, həm də qlobal iqtisadi əməkdaşlığın fəal oyunçusu kimi təqdim edir.
Prezident İlham Əliyevin Nyu-Yorkda aparıcı şirkət rəhbərləri ilə görüşləri də göstərdi ki, ölkəmiz xarici investorlar üçün açıqdır və iqtisadi diplomatiyanın hədəfi Azərbaycana yeni tərəfdaşlar, yeni texnologiyalar və dayanıqlı inkişaf imkanları gətirməkdir.
Beləliklə, Azərbaycanın iqtisadi diplomatiyası müasir mərhələdə ölkənin milli maraqlarını qorumaqla yanaşı, regional əməkdaşlığa və qlobal iqtisadi inteqrasiyaya töhfə vermək məqsədi daşıyır. Bu siyasətin əsas məzmunu sabitlik, tərəfdaşlıq və inkişafdır.
Yeni iqtisadi modelin əsasları
Azərbaycanın iqtisadi siyasətinin əsası Ümummilli Lider Heydər Əliyev tərəfindən qoyulmuş, Prezident İlham Əliyevin rəhbərliyi ilə son 20 ildə möhkəm təməllər üzərində inkişaf etmişdir. Lakin ərazilərin işğaldan azad edilməsi və ölkənin suverenliyinin tam bərpası yeni tarixi reallıq yaradıb. Bu reallıq Azərbaycanın qarşısında yeni vəzifələr qoyur:
- Azad olunmuş ərazilərin bərpası və iqtisadi inteqrasiyası
- Yaşıl enerji və dayanıqlı inkişaf strategiyası
- Qlobal bazarlarda yeni mövqelərin əldə edilməsi
- Regional nəqliyyat və logistika mərkəzinə çevrilmək
Bütün bunlar Azərbaycanın diplomatiyasında yeni – fəal iqtisadi diplomatiya mərhələsinin başlandığını göstərir.
Prezident İlham Əliyevin həm Vaşinqton, həm də Nyu-York səfərləri Azərbaycanın beynəlxalq mövqelərini daha da möhkəmləndirir. Azərbaycanın yeni iqtisadi modeli və fəal iqtisadi diplomatiyası təkcə milli inkişaf strategiyasına deyil, eyni zamanda regionun gələcək sabitliyinə və qlobal əməkdaşlığa da mühüm töhfə verəcək.
Dəniz NƏSİRLİ
