“Ermənistanı müharibəyə keçmiş prezidentlər Robert Köçəryan, Levon Ter-Petrosyan və Serj Sarkisyan sürükləyib”. Bunu Ermənistan Baş naziri Nikol Paşinyan deyib. Baş nazirin sözlərinə görə, xüsusən də Sarkisyan və Köçəryan ölkəni Qarabağda - Azərbaycan ərazisində müharibəyə sürüklədikdən sonra oradan Ermənistana qaçıblar.
Nikol Paşinyan keçmiş prezidentləri şəxsi məqsədləri naminə Qarabağda münaqişəni qızışdırmaqda ittiham edərək, onların bu yolla özlərinə böyük səvətlər topladıqlarını da bildirib: “Qalib prezidentlər”, “qalib prezidentlər”! Üçüncü Respublikanın tarixi üzərində düşünərkən mən dəhşətlə bildirmişdim ki, “qalib prezidentlər” adlandırılanların heç biri təsəvvür etdiyiniz kimi deyil, onların heç biri xalqın etimadını qazanmayıb. Qulaq asın, xalqa “qələbə” gətirmişdinizsə, 1996-cı ildən bəri seçkiləri niyə saxtalaşdırdığınızı izah edə bilərsinizmi? Xalq onlara qələbə gətirən liderləri necə seçə bilməzdi? Necə? Levon Ter-Petrosyan, Serj Sarkisyan və Robert Köçəryan davamlı olaraq məni Ermənistanı müharibəyə sürüklədiyimi iddia edirlər. Levon Ter-Petrosyan, Serj Sarkisyan və Robert Köçəryan, Ermənistanı mən müharibəyə sürüklədiyim üçün 18 yaşlı erməni əsgərinin 2018-ci ilə kimi Ermənistan Respublikasının suveren ərazisindən kənarda nə işi var idi? Üstəlik, onlar sizin nə övladlarınız, nə də nəvələriniz idi. Nə üçün nəvələrinizi və uşaqlarınızı ora göndərmədiniz? Cavab verin, Levon Ter-Petrosyan, Serj Sarkisyan və Robert Köçəryan. Cavab verin, övladlarınız o vaxt harada idilər və nə edirdilər?”. Baş nazir onların bütün seçkiləri saxtalaşdırdıqlarını qeyd edib: “Ermənistanın düşüncəli insanları anlayırdılar ki, siz qələbə gətirmədiniz, Ermənistanı heç bir çıxış yolu olmayan uçuruma sürüklədiniz. İndi isə ölürsünüz, çünki görürsünüz ki, bəli, minlərlə qurbanın bahasına o çıxış yolu tapılıb. Sözün əsl mənasında gündə üç dəfə ölürsünüz. Bir dəfə səhər, bir dəfə günorta, bir də qaranlıq çökən kimi. İndi deyin: debata gələcəksiniz, ya gəlməyəcəksiniz?”. Xatırladaq ki, bundan əvvəl də Paşinyan keşmiş prezidentləri Qarabağ məsələsinə görə debata çağırıb. Amma bu təklif qəbul olunmayıb. Ötən ilin dekabrında Paşinyanın debat təklifindən sonra eks-prezidentlər öz nümayəndələri vasitəsilə ona cavab verərək, baş nazirin debata çıxmaq təklifini rədd ediblər. onlar belə bir debatın olmayacağını bildiriblər. Paşinyan o vaxt sosial şəbəkədə bu xüsusda yazırdı: “Yaxşı ki, keçmiş prezidentlər öz nümayəndələri vasitəsilə "Dağlıq Qarabağ" üzrə danışıqlar prosesi ilə bağlı yazıma cavab verdilər, amma mən nümayəndələrin arxasında gizlənmirəm. Məncə, onların da gizlənməməsi düzgün olardı. Müzakirə edəcək bir şeyiniz yoxdursa, təqaüdünüzə və yaxud məhkəmə iclaslarına gedin və mənim hər bir ifadəmə başqa dövlətlərdən olan nümayəndələriniz, dostlarınız və tanışlarınız, bəzən də qohumlarınız və yaxınlarınız vasitəsilə sataşmayın. Əgər sataşırsınızsa, o zaman insanların əksəriyyətinin onsuz da bu dili bilmədiyi ümidi və inamı ilə “diplomatik” dil fırıldaqları yaratmaq əvəzinə, arqumentləri xalqın qarşısında üz-üzə söyləyək”.
İndi bu məsələnin yenidən gündəmə gəlməsi təsadüf hesab edilmir. 2026-cı il Ermənistanda növbəti seçkilər keçiriləcək və bu, hazırkı hakimiyyət üçün ölüm-dirim mübarizəsi sayılır. Paşinyan bu fonda debatla bağlı təklifini ikinci dəfə səsləndirib. Bu isə deməyə əsas verir ki, baş nazir rəqiblərini bəri başdan sıradan çıxarmaq istəyir. Çünki onların yenə debata gəlməyəcəklərini bilir. Hadisələrin gedişatı isə göstərir ki, növbəti il erməni siyasi arenasında ciddi dəyişikliklər olacaq. Uzun müddətdir siyasi meyitə çevrilən Sarkisyan və Köçəryanın bu dəfə daha ağır zərbə alması gözlənilir. Debatdan sabiq prezidentlərin yan qaçması gələcək parlament seçkilərində Nikol Paşinyan qalib gəlməsi üçün önəmli faktordur. Paşinyan hesab edir ki, keçmiş prezidentlər onun irəli sürdüyü arqumentlərə tutarlı cavablar verməlidir. Eləcə də Paşinyana görə, Köçəryan həm də Qarabağın vaxtilə danışıqlar prosesindən niyə kənarlaşdırıldığına izahat verməlidir. Mma indiyə kimi bunların debatda həll edilməməsi Paşinyanın lehinə işləyir.
Nahid SALAYEV
