Ceyhun Məmmədov: “Burda günah Azərbaycanda deyil, onların özündədir, Rusiya tərəf həqiqətləri görmək istəmir...”
Prezident İlham Əliyevin Səudiyyə Ərəbistanının “Əl-Ərəbiyyə” telekanalına müsahibəsindən sonra Rusiyadan Azərbaycana qarşı kütləvi informasiya kampaniyası yenidən gücləndirilib.
Bildimiz kimi, Milli Məclisin Xarici müdaxilələrə və hibrid təhdidlərə qarşı komissiyası Prezident Əliyevin “Əl-Ərəbiyyə” telekanalına müsahibəsindən sonra Rusiyadan Azərbaycana qarşı kütləvi informasiya kampaniyası ilə bağlı bəyanat yayıb.
Hər dəfə Azərbaycan Prezidentinin müəyyən çıxışlarından sonra Rusiya Azərbaycana qarşı belə qaralayıcı təbliğat kampaniyasını genişləndirir, aktivləşdirir. Artıq bu neçənci dəfədir ki, təkrar olunur. Azərbaycan Prezidentinin hansısa bir ifadəsini götürüb ya onu təhrif edirlər, ya kontekstindən çıxarırlar, ya öz bildikləri kimi təfsir edirlər və Azərbaycan əleyhinə qarayaxmalara başlayırlar.
Bunun bir neçə dəfə təkrar olunması artıq ekspertləri belə qənaətə gətirir ki, Rusiya hər dəfə Azərbaycan Prezidentinin çıxışından müəyyən nüansları qərəzlə, təhrif yolu ilə dəyişdirərək, təftiş edərək, Azərbaycana qarşı kampaniyaya başlamaqla əslində qabaqlayıcı bir gediş edir və belə bir rəy yaratmağa çalışırlar ki ,guya ilk olaraq Azərbaycan hansısa bir addımı atıb. Rusiya - Azərbaycan münasibətlərininin soyuqlaşması üçün guya Azərbaycan Prezidenti nəsə deyib, Azərbaycan nəsə bir addım atıb, Rusiya da buna cavab verməyə məcburdur. Əslində isə məsələnin mahiyyəti ondan ibarətdir ki, Prezidentin hansısa bir sözü deməsindən çox - çox əvvəl Rusiya -Azərbaycan münasibətləri gərgindir. Məsələnin kökündə Rusiyanın Azərbaycanla münasibətləri gərginləşdirmək niyyəti dayanır. O münasibətlər gərgin olduğuna görə Azərbaycan Prezidenti də tarixdən obyektiv faktları gətirib, fikir bildirib. Rusiyada isə deyirlər ki, Azərbaycan Prezidenti Rusiya ilə münasibətləri pozmaq, korlamaq üçün belə bəyanat verib. Onlar hər dəfə Azərbaycan Prezidentinin fikirlərini təhrif etməklə belə bir taktika işlədirlər və belə rəy yaradırlar ki, guya həmişə Azərbaycan deyir, Azərbaycan addım atır və bunlar da Azərbaycana cavab verir. Halbuki bu məsələnin kökündə ilk zərbəni Rusiyanın vurması dayanır. Münasibətləri ilk Rusiya korlayır. Təyyarəmizi vurub münasibətlərimizi ilk korlayan Rusiya olduğu üçün Azərbaycanın atdığı bütün addımlar səbəb deyil, nəticədir.
Azərbaycan Prezidentinin müsahibəsindən bir şey tutub onu təhrif edib rəy yaradırlar ki ,guya Azərbaycan dedi ,biz də cavab verdik. Guya Azərbaycan günahkardır, guya ilk addımı Azərbaycan atıb. Amma ilk adımı təyyarə qəzası ilə Rusiya atıb və münasibətləri gərginləşdirib, indiyə qədər yumşaldıcı bir addım belə atmır, əksinə Azərbaycanı qaralayır.
“Rusiya tarixçiləri, blogerləri, hakimiyyətin ruporları bu kimi təxribatlara son qoymalıdırlar”
Millət vəkili Ceyhun Məmmədov “Bakı-Xəbər”ə bildirdi ki, biz ilk dəfə deyil Rusiya tərəfin, Rusiya rəsmilərinin bu cür açıqlamalarının şahidi oluruq. “Yəni bu ilk dəfə baş vermir. Təəssüf ki, hələ də Rusiya mediası eyni təxribatlarını davam etdirir, yanlış məlumatlar yayır, tirajlayır. Təəssüflə qeyd edək ki, bu məsələdə Rusiyanın media quruluşları, media blogerləri bir-biri ilə ciddi-cəhdlə yarışaraq Azərbaycana hücum edirlər”.
C.Məmmədov qeyd etdi ki. Rusiya mediasında Azərbaycana qarşı təxribatlar davam etdirilir. Azərbaycan Prezidentinin söylədiyi fikirlərin tam reallığı əks etdirdiyini deyən C.Məmmədov bildirdi ki, ölkə başçısı müsahibəsində tarix boyu Rusiyanın Azərbaycan xalqının başına gətirdiyi müsibətlərin bir qisminə toxundu, hələ hamısına toxunmadı. “Cənab Prezident Rusiyanın tarix boyu xalqımızın başına gətirdiyi faciələrin hamısına toxunmadı və bir qismini bölüşdü. Xalqımızın başına gətirilən bir çox müsibətlərin əsas səbəbkarı Rusiyadır. Yəni Rusiya bu addımları tarix boyu atıb, bu gün də bunu davam etdirir. Rusiya tarixçiləri, blogerləri, hakimiyyətin ruporları bu kimi təxribatlara son qoymalıdırlar. Əgər düşünürlərsə ki, onlar bununla nəyəsə, öz hədəf və məqsədlərinə nail olacaqlar, Azərbaycandakı ictimai rəyə mənfi təsir göstərə biləcəklər, yanılırlar. Yaxşı olar ki, onlar bu cür təxribatlara, yanaşmalara son qoysunlar, münasibətlərin korlanmasına yox, münasibətlərin inkişafına, əlaqələrin möhkəmlənməsinə yönəlmiş addımlar atsınlar. Yəni bu metod, bu təbliğat əks-effekt verir, insanlarda daha çox narazılıq və Rusiyaya qarşı olan münasibətə ciddi təsir göstərir, fikri ciddi bir formada yanlış yerə istiqamətləndirir. Yəni normal münasibətlər qurulması üçün bu məsələlərə, bu təxribatlara, bu yanaşmalara son qoyulmalıdır. Burda günah Azərbaycanda deyil, onların özündədir, Rusiya tərəf həqiqətləri görmək istəmir, onlar eşitmək istədiklərini Azərbaycanın deməsini istəyirlər. Bu mümkün deyil. Ona görə də bunu nəzərə almalıdırlar”-deyə C.Məmmədov qeyd etdi.
İradə SARIYEVA
