Rusiyada son vaxtlar miqrantlara qarşı daha sərt siyasətə start verilməsi özünü qabarıq şəkildə büruzə verir. Bunlar fonunda Kremlin əsas təbliğatçılarından biri olan filosof Aleksandr Duqin deyir ki, miqranlar Rusiyada qalmaq üçün xristianlığı qəbul edərək rus olmalıdırlar. O, müsəlman qadınlara Rusiya ilə həmrəylik işarəsi olaraq hicablarına Z simvolu taxmağı təklif edib. Z və V hərfləri Rusiyanın Ukraynaya qarşı işğalçı müharibəsinin simvolları sayılır.
Kremlin əsas ideoloqlarından olan filosof deyib: “İslamı saxlamaq istəyirsiz? Yaxşı, bu da işə yarayar. Qəhrəman “Axmat”la birlikdə savaşın və rus islamı olacaqsız. Bizim ənənələrə hörmət edin, biz də sizə. İstənilən miqrant üçün, daha toksik saydığımız azərbaycanlılar, taciklər, özbəklər üçün çıxış yolu var – assimilyasiya. Rusiya uğrunda savaşan pravoslav tacik, azərbaycanlı özbək daha miqrant deyil, rusdur. Özü da xalisindən. Savaşmayan isə rədd olsun”. Duqin daha öncə yazırdı ki, miqrantlar rus xalqının demoqrafik problemini həll edə bilməzlər. Onun fikrincə, əməkçi miqrantlarla manipulyasiya, hətta ən dost sayılanlarla belə, durumu daha da gərginləşdirəcək, qeyri-sabitliyi artıracaq. O, əmək miqrasiyasını sıfıra salmağı, əmək resurslarını robototexnikanın inkişafı ilə doldurmağı təklif edib. Duqin Rusiyanı Avropa və Asiya arasında xüsusi sivilizasiya, ABŞ və NATO-nu isə bu ölkənin əsas düşmənləri sayır. Qeyd edək ki, Rusiyada ötən ilin martında “Krokus Siti” konsert məkanına silahlı hücumdan, 145 nəfərin ölümündən sonra miqrantlara qarşı qaydalar sərtləşdirilib, onların çalışdığı müxtəlif obyektlərdə reydlər aparılıb, alçaldıcı rəftara məruz qalıblar. İyunun sonunda Yekaterinburqda etnik azərbaycanlılara qarşı zorakı reyd isə iki nəfərin ölümü ilə nəticələnib. Bundan sonra Bakı ilə Moskvanın münasibətləri pisləşib. Xatırladaq ki, ötən ilin sonunda AZAL təyyarəsinin vurulması ilə bağlı Moskva üzr istəməmiş, cinayətkarları cəzalandırmamış və kompensasiya ödəməmişdi. Bakı isə buna adekvat münasibət göstərib. Bu münasibətlərin soyuması fonunda Kreml Azərbaycana qarşı həm informasiya müharibəsini gücləndirib, həm də azərbaycanlı miqrantlara təzyiqi artırıb. Bu arada isə Moskva və Moskva vilayətində “Amina” adlı mobil tətbiq istifadəyə verilib. Artıq vizasız ölkələrdən gələn bütün miqrantlar bu tətbiqi yükləməli, ünvanlarını qeyd etməli və geolokasiyanı aktivləşdirməlidirlər. Tətbiq bütün yerləşmə məlumatlarını Daxili İşlər Nazirliyinə ötürəcək. Əgər şəxs üç gün ərzində “yoxa çıxarsa”, onun bank hesabları, SIM-kartı bloklanacaq və deportasiya edilməsi mümkün olacaq. Ekspertlər bildirirlər ki, bu addım Rusiyada illərdir artan antimiqrant siyasətin yeni formasıdır. Bununla yanaşı, Rusiyanın Milli İşlər üzrə Federal Agentliyi miqrantlara qarşı öz ana dillərindən istifadəni kəskin şəkildə məhdudlaşdıran və onları ictimai yerlərdə namaz qılmaqdan və ya dini məqsədlər üçün heyvan qurban verməkdən çəkindirən yeni davranış qaydaları tətbiq edir. Ölkənin bəzi regionlarında Milli İşlər üzrə Federal Agentliyin yaratdığı 70 dəqiqəlik kurs çərçivəsində miqrantlara xüsusi seminarlarda ciddi qaydalar və davranış kodeksi öyrədilir. Mühazirədə təsvir olunan qaydalara rus dilini və ölkənin miqrasiya qanunvericiliyini mütləq bilmək, ruslar haqqında danışarkən öz ana dilindən istifadə etmək qadağası daxildir.
Moskva əməkçi miqrantları ölkədən çıxmağa vadar etməkdən ötrü onları Ukraynadakı müharibəyə göndərir. Rusiya vətəndaşları və Rusiya pasportu alan miqrantların çoxu Ukraynadakı döyüşlərə cəlb olunmaqdan yayınmaq üçün Rusiyadan qaçmağa çalışır. Bu halda Avropa İttifaqı ölkələrinə gedərək sığınacaq istəmək çox halda ən yaxşı seçim olur. Onlar sərhədi qanunsuz keçərək hökumət nümayəndələrinə təslim olur, humanitar vizaya müraciət edir və adətən gözləmə müddətində xüsusi düşərgələrə, bəzənsə hətta həbsxanalara göndərilirlər. Bütün bu müddətdə onlar müraciətlərinin qəbul olunacağına ümid bəsləyirlər. Bu günlərdə isə Rusiyada Liberal Demokrat Partiyasının sədri Leonid Slutski məktəbli miqrantların törətdiyi hüquqazidd əməllərin gizlədilməsinə qarşı çıxaraq, bu halların məktəb rəhbərləri tərəfindən açıq şəkildə ictimailəşdirilməsini təklif edib. Slutski hesab edir ki, azyaşlı miqrantların rus uşaqlarına qarşı təzyiqləri artır: “Rus uşaqlarına qarşı hüquqazidd hərəkətlərin sayı artır. Sosial şəbəkələrin monitorinqi də bunu göstərir. Təəssüf ki, bəzi məktəb rəhbərləri nüfuzlarını qorumaq üçün bu hadisələri gizlədir. Nəticədə bu uşaqlar cəzasız qalır və özlərini toxunulmaz hesab edirlər”. O, məktəb direktorları üçün belə hallarla bağlı konkret addımların qeyd olunduğu metodik göstərişlərin hazırlanmasını təklif edir. Leonid Slutski bu məsələ ilə bağlı ölkənin təhsil naziri Sergey Kravtsova rəsmi müraciət ünvanlayıb.
Nahid SALAYEV
