Xaqani Cəfərli: "Prezident İlham Əliyevin “Azərbaycan hər an müharibəyə hazır olmalıdır” çağırışına qoşuluram"
Avropa Komissarı Ursula fon der Lyayen Rusiya və Belarusla həmsərhəd Avropa ölkələrini gəzir. O, Polşada dedi ki, Putin yırtıcıdır, onu ancaq güc tətbiqi ilə dayandırmaq olar.
Proseslər göstərir ki, Avropa ilə Rusiyanın münasibətləri müharibəyə doğru sürətlə irəliləyir. Hər iki tərəfdə ciddi hazırlıq gedir. Avqustun 25-də KTMT-nin nüvə hücumu təlimləri keçirildi (Ermənistanın iştirak etmədi). Avropa İttifaqı da hazırlaşır. Bu tərəflər arasında eskalasiya baş verərsə, bunu üçüncü dünya müharibəsi kini qiymətləndirmək olarmı?
Politoloq Xaqani Cəfərli baki-xeber.com-a məsələ ilə bağlı açıqlamasında bildirdi ki, beynəlxalq münasibətlərdəki indiki gərginlik Avropa, Yaxın Şərq və Sakit okean hövzəsində hərbi münaqişə ehtimalını kəskin artırıb: "Beynəlxalq münasibətlərdə yaranmış vəziyyəti buludlarda elektrik yüklərinin bir-birinə qarşı güclü elektrik sahəsi yaratmasına bənzətmək olar. Buludlarda yaranan bu vəziyyət ildırımın düşməsinə səbəb olduğu kimi, beynəlxalq münasibətlərdə yaranan gərginlik də hər an müharibəyə səbəb ola bilər. Prezident İlham Əliyevin bir neçə gün öncə səsləndirdiyi “Azərbaycan hər an müharibəyə hazır olmalıdır” açıqlaması da beynəlxalq münasibətlərdə yaranmış gərginliyin diqtəsidir. Beynəlxalq münasibətlər üzrə mütəxəssis olan Prezident İlham Əliyevin qayğısı da buradan qaynaqlanır. Qənaətimcə, beynəlxalq münasibətlərdəki indiki gərginlik Birinci Dünya müharibəsi ərəfəsindəki vəziyyəti xatırladır və şərti “Frans Ferdinandın öldürülməsi” böyük müharibəyə səbəb ola bilər.
Ekspert əlavə etdi ki, Kollektiv Təhlükəsizlik Müqaviləsi Təşkilatı formal xarakter daşıyır və bu təşkilat, demək olar ki, Rusiyadan ibarətdir: "Mərkəzi Asiya respublikalarının Rusiyanın yanında Avropaya qarşı döyüşməsi mümkün olan məsələ deyil. Rusiyanın isə təkbaşına Avropaya qarşı mübaribəsi mümkün deyil. Ukraynaya qarşı açıq üstünlük əldə edə bilməyən Rusiyanın birləşmiş Avropaya qarşı dayanmaq şansı yoxdur. Hətta Avropanın bir ölkəsinin, məsələn Finlandiyanın hərbi müdaxiləsi kifayətdir ki, Ukrayna Rusiya üzərində böyük üstünlük qazansın. Rusiyanın Finlandiyanın 5-ci nəsil aviasiyasının qarşısını ala biləcək gücü yoxdur.
Ukraynanın Rusiyanın hava hücumundan müdafiə sisteminə vurduğu güclü zərbə Rusiyanı müdafiəyə qarşı çox zəif hala gətirib. Finlandiyanın 5-ci nəsil F-35-ləri Sankt-Peterburqu bir neçə saatın içində məhv edə bilər. İsrailin İrana müdaxiləsi göstərdi ki, F-35-lərə qarşı dayana biləcək müdafiə sistemi yoxdur. Rusiya yalnız Çinin dəstəyi ilə böyük müharibəyə cəsarət edə bilər. Çin isə bugünə qədər sərhədlərindən uzaqda müharibə aparmayıb. Buna görə Çinin də nəyə qadir ola biləcəyi aydın deyil. Ancaq bütün bunlara baxmayaraq, böyük müharibə ehtimalı çox yüksəkdir və Prezident İlham Əliyevin “Azərbaycan hər an müharibəyə hazır olmalıdır” çağırışına qoşuluram. Hər an İsrailin İrana növbəti hərbi müdaxiləsinin, Rusiya ilə Avropa ölkələri arasında toqquşmanın şahidi ola bilərik".
Akif NƏSİRLİ
