Çinin Tiencin şəhərində keçirilən ŞƏT “Plyus” formatında Azərbaycanın səsi bir daha qlobal tribunadan eşidildi. Prezident İlham Əliyevin çıxışı həm Çinə, həm də beynəlxalq ictimaiyyətə aydın mesaj verdi: Azərbaycan regionun sabitliyi, inkişafı və tərəfdaşlıq mühitinin qurulmasında etibarlı dayaqlardan biridir.
Dövlət başçısı çıxışında xüsusi vurğuladı ki, Azərbaycanla Çin arasında münasibətlər sadəcə əməkdaşlıq deyil, strateji tərəfdaşlıq səviyyəsinə yüksəlib. Bu, iki dövlətin gələcək inkişaf yolunu müəyyən edən tarixi qərardır. Azərbaycanın Çinin irəli sürdüyü qlobal təşəbbüslərə , inkişaf, təhlükəsizlik, sivilizasiya və idarəetmə konsepsiyalarına dəstəyi göstərir ki, Bakı beynəlxalq ədalət, bərabərlik və çoxtərəfli əməkdaşlığın tərəfdarıdır.
Prezident Əliyevin nitqində diqqəti cəlb edən əsas məqam Azərbaycanın nəqliyyat-logistika sahəsində artan rolu oldu. Ölkəmizin təşəbbüsü ilə formalaşan Şərq-Qərb və Şimal-Cənub dəhlizləri artıq yeni iqtisadi və siyasi imkanlar yaradır. Orta Dəhliz üzrə yükdaşımaların cəmi iki ildə 90 faiz artması Azərbaycanın tranzit imkanlarının necə sürətlə böyüdüyünü göstərir.
Son iki ildə Azərbaycan-Çin əlaqələrinin sürətli inkişafı artıq siyasi dialoqun sərhədlərini aşaraq hərtərəfli strateji tərəfdaşlıq müstəvisinə qədəm qoyub. Dövlət başçısının xatırlatdığı kimi, ötən il Astanada strateji tərəfdaşlıq elan olunmuş, bu il isə Pekində hərtərəfli strateji tərəfdaşlıq barədə birgə Bəyanat imzalanmışdır. Bu, yalnız ikitərəfli münasibətlərin deyil, eyni zamanda regiondakı güc balansının formalaşmasında yeni reallıqlar yaradan tarixi addımdır.
Azərbaycanın Çinin “Qlobal İnkişaf”, “Qlobal Təhlükəsizlik”, “Qlobal Sivilizasiya” və “Qlobal İdarəetmə” təşəbbüslərinə dəstəyi, Bakının beynəlxalq nizamın ədalət prinsipləri əsasında möhkəmlənməsinə verdiyi önəmi göstərir. Bu mövqe Azərbaycanın balanslı, çoxtərəfli və inklüziv diplomatiya xəttinə sadiqliyini təsdiqləyir.
Prezident İ.Əliyevin nitqində xüsusi vurğulanan məqam Azərbaycanın Avrasiyanın əsas nəqliyyat-logistika mərkəzinə çevrilməsidir. Ələt Beynəlxalq Dəniz Limanının gücünün artırılması, Şərq-Qərb və Şimal-Cənub dəhlizlərinin inkişafı, eləcə də Orta Dəhliz üzrə yükdaşımaların 90 faiz artması Azərbaycanın artıq qlobal ticarət xəritəsində mühüm tranzit aktoruna çevrildiyini göstərir.
Prezidentin vurğuladığı Zəngəzur dəhlizi isə gələcəyin əsas strateji xəttlərindən biri kimi dəyərləndirilir. Bu dəhliz, təkcə Azərbaycanın deyil, bütövlükdə Avrasiyanın inteqrasiyasına, yeni iqtisadi və siyasi əməkdaşlıq platformalarının formalaşmasına xidmət edəcək. Zəngəzur xətti həm Orta Dəhliz, həm də Şimal-Cənub dəhlizinin vacib həlqəsinə çevrilərək regionda sabitlik və əməkdaşlığı daha da möhkəmləndirəcək. Azərbaycanın qlobal mesajı Tiencindəki çıxış bir daha göstərdi ki, Azərbaycan yalnız enerji və resurslarla deyil, həm də ideyaları, təşəbbüsləri və strateji baxışları ilə Avrasiyanın inkişaf xəritəsini müəyyənləşdirir. Bakı bu gün regionda sülhün qarantı, iqtisadi tərəfdaşlığın etibarlı mərkəzi, qlobal təşəbbüslərin fəal iştirakçısıdır.
Azərbaycanın Çin Xalq Respublikası Sədri tərəfindən irəli sürülmüş “Bir kəmər, bir yol” təşəbbüsünü ilk dəstəkləyən ölkələrdən biri olması və bu sahədə praktiki layihələrin həyata keçirilməsi, milli maraqların qlobal təşəbbüslərlə harmonik şəkildə uzlaşdırıldığını göstərir. Bu, yalnız iqtisadi dividendlər deyil, həm də siyasi nüfuzun möhkəmlənməsi deməkdir.
Bir sözlə, dövlət başçımızın Tiencində səsləndirilən çıxışı bir daha təsdiq edir ki, Azərbaycan yalnız regional proseslərdə deyil, həm də qlobal nizamın formalaşmasında mühüm rola malikdir. Bakı həm Çinin strateji müttəfiqi, həm də Avrasiyanın etibarlı tranzit mərkəzi kimi öz mövqeyini möhkəmləndirir. İlham Əliyevin təqdim etdiyi siyasi vizion isə Azərbaycanın sülh, əməkdaşlıq və çoxtərəfli tərəfdaşlıq yolunda ardıcıl addımlar atmağa davam edəcəyinin göstəricisidir.
Lamiyə İsazadə, “Kimsəsiz Uşaqların Sosial Müdafiəsi” İctimai Birliyinin sədri, yazıçı-publisist
