ECO-nun Xankəndi sammiti - regional əməkdaşlıqda yenilik üçün yeni şərtlər var...
Tahir Mirkişili: “Tədbir həm də regionda sülh və sabitliyə mühüm dəstək rolunu oynayır”
Məlum olduğu kimi, Qədim Azərbaycan torpağı olan Qarabağda, Xankəndidə İqtisadi Əməkdaşlıq Təşkilatının (ECO) 17-ci Zirvə görüşü keçirildi. Azərbaycan artıq üçüncü dəfə idi ki, ECO-nun Zirvə görüşünə ev sahibliyi edirdi. Məlumat üçün bildirək ki, əvvəlki iki Zirvə görüşü 2006-cı və 2012-ci illərdə paytaxt Bakıda keçirilib.
İqtisadi Əməkdaşlıq Təşkilatının (ECO) 17-ci Zirvə görüşünün Xankəndidə keçirilməsi Azərbaycanın regional və beynəlxalq nüfuzunun artdığını göstərir. Bu, həm də Qarabağın sülh və yenidənqurma mərhələsində beynəlxalq ictimaiyyətə açılması baxımından mühüm hadisədir. Prezident İlham Əliyevin də vurğuladığı kimi, Azərbaycanın nəqliyyat infrastrukturu ECO ölkələri üçün tam açıqdır. Eyni zamanda, Azərbaycan yaşıl enerji sahəsində də liderlik iddiası ilə çıxış edir.
Zirvə görüşünün Xankəndidə keçirilməsi həm siyasi, həm də iqtisadi baxımdan rəmzi məna daşıyır. Bu tədbir Azərbaycanın ECO çərçivəsində təşəbbüskar mövqeyini və regionun inkişafına verdiyi töhfəni bir daha təsdiqləyir.
“ Xankəndidə keçirilən İƏT zirvəsi təkcə Azərbaycanın deyil, bütövlükdə bölgənin siyasi, iqtisadi və strateji xəritəsinin yenidən formalaşdırılmasına mühüm təkan olacaq”
Məsələ barəsində fikir bildirən millət vəkili Tahir Mirkişili “Bakı-Xəbər”ə şərhində bildirdi ki, Azərbaycanın tarixi şəhəri olan Xankəndidə İqtisadi Əməkdaşlıq Təşkilatının (İƏT) zirvə görüşünün keçirilməsi həm rəmzi, həm də praktiki baxımdan mühüm əhəmiyyət daşıyır. Millət vəkili hesab edir ki, bu görüş regional əməkdaşlığa bir neçə istiqamətdə müsbət təsir edə bilər: “İlk olaraq regional inteqrasiyanın gücləndirilməsinə dəstək olacaq. Xankəndidə belə nüfuzlu tədbirin keçirilməsi İƏT-ə üzv ölkələrin bir-birinə olan siyasi və iqtisadi etimadını möhkəmləndirəcək. Bu görüş regional ölkələr arasında nəqliyyat, enerji, ticarət və texnologiya sahələrində birgə layihələrin sürətlənməsinə zəmin yarada bilər. Digər mühüm istiqamət Zəngəzur dəhlizi və digər nəqliyyat marşrutları ilə bağlıdır. Zirvə görüşü Zəngəzur dəhlizi, Orta Dəhliz və Şimal-Cənub dəhlizi kimi layihələrin əhəmiyyətini ön plana çıxararaq üzv ölkələr arasında logistika əlaqələrinin genişlənməsinə təkan verə bilər.
Zirvə görüşü investisiya və ticarət mühitinin yaxşılaşdırılmasına da xidmət edəcəkdir. Görüşdə iştirak edən dövlət və hökumət başçıları arasında iqtisadi əlaqələrin dərinləşdirilməsi ilə bağlı fikirlərin geniş vüsət alması bu əlaqələri möhkəmləndirə biləcək. Eyni zamanda, Xankəndidə belə tədbirin təşkili Azərbaycanın Ermənistan işğalından azad edilmiş ərazilərdə iqtisadi canlanmaya və xarici investisiyaların cəlb olunmasına müsbət təsir göstərə bilər”.
Həmsöhbətimiz onu da əlavə etdi ki, tədbir həm də regionda sülh və sabitliyə mühüm dəstək rolunu oynayır: “İƏT zirvəsinin Xankəndidə keçirilməsi Azərbaycanın ərazi bütövlüyü və suverenliyinin beynəlxalq səviyyədə tanınmasının mühüm göstəricisidir. Bu hadisə post-münaqişə dövründə əməkdaşlıq və inkişafın mümkünlüyünü nümayiş etdirərək, bölgədə sabitliyin möhkəmlənməsinə kömək edəcək. Aparılan müzakirələr yeni əməkdaşlıq platformalarının yaranması imkanlarını daha da artırıb. Xankəndidə keçirilən İƏT zirvəsi təkcə Azərbaycanın deyil, bütövlükdə bölgənin siyasi, iqtisadi və strateji xəritəsinin yenidən formalaşdırılmasına mühüm təkan olacaq. Bu, həm rəmzi olaraq regionda yeni mərhələnin başlandığını göstərir, həm də praktik baxımdan real əməkdaşlıq imkanlarını artırır”.
Günel CƏLİLOVA
