Elşən Manafov: “Bu, hakimiyyətin parlament seçkilərində uğursuzluqdan sığortalanmaq istəyi ilə əlaqədardır”
Prezidentin xüsusi tapşırıqlar üzrə nümayəndəsi Elçin Əmirbəyov İrəvanı 2020-ci il atəşkəs sazişinin şərtlərini, o cümlədən Zəngəzur dəhlizi ilə bağlı müddəaları yerinə yetirməyə çağırıb.
O, bu barədə İspaniyanın “El Mundo” qəzetinə müsahibəsində bildirib.
E.Əmirbəyov Ermənistanı öz Konstitusiyasını ölkələr arasında təklif olunan sülh sazişinin şərtlərinə uyğunlaşdırmağa çağırıb, onun imzalanmasına əsas maneənin məhz Konstitusiya ilə bağlı ziddiyyətlər olduğunu qeyd edib. Eyni zamanda, E.Əmirbəyov danışıqlar prosesində irəliləyişin olduğunu qeyd edib: “Görülən bütün işləri dəyərləndirsək, Ermənistan və Azərbaycan böyük məsafə qət ediblər. Odur ki, biz ümid edirik, Ermənistan tərəfi qalan iki məsələnin həlli üçün siyasi iradə nümayiş etdirəcək”.
Ermənistanda konstitusiya islahatının vaxtı ilə bağlı E.Əmirbəyov qeyd edib: “Ermənistan tərəfindən eşitdiyimiz odur ki, yeni konstitusiya layihəsini gələn il, yəni 2026-cı ilin iyunundakı seçkidən sonra referenduma çıxarmağı planlaşdırırlar”.
Nəzərə almaq lazımdır ki, E. Əmirbəyov rəsmi şəxsdir. Görünür, onda məlumat var ki, Ermənistan Konstitusiyanı parlament seçkilərindən sonra dəyişəcək.
Maraqlıdır, Ermənistanın bunu bu qədər uzatmasının nə mənası var? Bəlkə Paşinyan parlament seçkilərində qalib gəlmədi və hakimiyyətdən getdi, o zaman necə olacaq? O baxımdan bu, Ermənistanın sülh sazişini ən az gələn ilin yayına qədər uzatmaq cəhdi deyilmi?
“Erməni kilsəsi tarixən Rusiya ilə ciddi iş birliyində olub və buna görə də onun təmsilçilərinin...”
Sözügedən məsələni “Bakı-Xəbər”ə şərh edən politoloq Elşən Manafov buna bir neçə aspektdən yanaşdı: “Hazırda Ermənistanda həyata keçirilən həbslər bu ölkədə konstitusiya islahatlarının həyata keçirilməsinə mane ola biləcək radikal müxalif qüvvələrin hadisələrə təsir imkanlarının qarşısının alınmasına yönəldilib. İlk növbədə Paşinyan hakimiyyətinin parlament seçkilərində uğursuzluqdan sığortalanmaq istəyi ilə əlaqədardır. Bu seçkilər təkcə Ermənistanda siyasi hakimiyyətin perspektivləri ilə bağlı məsələlərə aydınlıq gətirməyəcək, eyni zamanda bölgə uğrunda beynəlxalq güclər arasında gedən geosiyasi qarşıdurmanın müqəddəratına, regionun təhlükəsizlik arxitekturasının gələcəyinə ciddi təsir göstərəcək. Paşinyanın Real Ermənistan konsepsiyasına dini, habelə revanşist, millətçi müxalifətin münasibəti xeyli fərqlidir. Tərəflər bu konsepsiyanın Ermənistanın milli təhlükəsizlik maraqlarına cavab vermədiyini bəyan edir, Azərbaycan, habelə Türkiyə ilə danışıqlarda Paşinyanı təslimçı mövqe tutmaqda ittiham edirlər. Həmçinin cəmiyyəti ona qarşı mübarizəyə yönləndirməyə çalışaraq, baş nazirin istefasına nail olmaq istəyirlər. Millətçi müxalifət revanş götürmək məqsədi ilə Paşinyanı Azərbaycanla müharibədə Ermənistanın məğlubiyyətinə görə qınayıb, Qarabağın itirilməsinə görə onu məsul bilirlər. Lakin müxalifətin bu kəsiminin ölkənin etiraz elektoratına təsir imkanları özü iqtidarda olduğu dönəmdə ölkəni korrupsiyaya sürüklədiyindən yetərincə zəifləyib. Ona görə də Paşinyana qarşı Erməni Apostol Kilsəsi ilə iş birliyinə ehtiyac duyub, onunla əməkdaşlığa gedib. Digər tərəfdən Paşinyana qarşı mübarizədə kilsə və müxalifətin ortaq korporativ maraqları var və əməkdaşlıq geosiyasi koloritdən də irəli gəlir. Erməni kilsəsi tarixən Rusiya ilə ciddi iş birliyində olub və buna görə də, onun təmsilçilərinin Paşinyana münasibətdə radikal mövqe tutması kilsənin korporativ maraqları ilə yanaşı, onun geosiyasi oyunlarda yer almasının da səbəbidir. Qərb, onun institutları və agentura şəbəkəsi ona etibar etmir və buna görə də, Ermənistanda keçirilən həbslərə Paşinyanın seçkilərdə qələbəsinə mane ola biləcək amillərin aradan qaldırılması konteksindən yanaşır. Kilsə, bir qayda olaraq, Ermənistanda ciddi siyasi və ideoloji nüfuza malik strukturlaşmış institutdur və onun uzun illərdən bəri təbliğ və müdafiə etdiyi “Böyük Ermənistan” layihəsi Paşinyanın Real Ermənistan konsepsiyasından fərqlidir. Paşinyan və Qərb gözəl anlayırlar ki, əsrlədən bəri “Böyuk Ermənistan” mifi ətrafında konsolidə edilmiş bir qövmü əvvəlcədən bəyan edilmiş hədəflərə yönəltmək çətin olmayacaq. Bu isə stabilliyin pozulması və cəmiyyətin qarşıdurma həddinə sürüklənməsi deməkdir. Proseslərin bu istiqamətdə getmə ehtimalları Paşinyanı qabaqlayıcı tədbirlər görmək zərurəti qarşısında qoyub”.
Vidadi ORDAHALLI
