Çingiz Qənizadə: “Məhkəmənin qapalı keçirilməsi onu göstərir ki, bu hərəkətlərin arxasında siyasi amillər durur”
Məlumdur ki, bir neçə gün əvvəl Rusiyanın Yekaterinburq şəhərində azərbaycanlıların yaşadığı 10-dan çox mənzildə keçirilən xüsusi əməliyyat zamanı bir neçə nəfər saxlanılıb. Əməliyyat zamanı iki qardaş – Ziyəddin və Hüseyn Səfərovlar öldürülüb, bir neçə nəfər isə xəstəxanaya yerləşdirilib.
İttiham tərəfi prosesin qapalı rejimdə keçirilməsi barədə vəsatət qaldırıb. Məhkəmə bu vəsatəti təmin edib və bundan sonra jurnalistlər zaldan çıxarılıb.
Məhkəmə qarşısına çıxarılanlar barəsində 22 gün müddətinə həbs qətimkan tədbiri seçilib.
Maraqlı məqam ondan ibarətdir ki, Rusiya bu məhkəməni niyə qapalı keçirdib? Rusiya nədən qorxur?
“Onlar məhkəməni ona görə qapalı keçirdib ki, rusların törətdiyi vəhşiliklər açıq məhkəmə zalında müzakirə predmeti olmasın, zərərçəkənlərin, döyülənlərin üzündə, bədənlərində olan xəsarətlər daha az görünsün”
Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə “Bakı-Xəbər”ə şərhində bildirdi ki, Rusiyanın Yekaterinburq şəhərində hüquq mühafizə orqanları tərəfindən keçirilən bu tədbir birmənalı olaraq etnik bir qrupa, digər millətin nümayəndələrinə qarşı keçirilən qanunsuz bir tədbirdir. Bu, zorakılıqla, hüquq pozuntusu ilə müşahidə edilən bir göstəridir. Nəticə də göz qabağındadır: “İki nəfər dünyasını dəyişib, çoxlu sayda yaralı və işgəncəyə məruz qalan insanlar var. Hesab edirəm ki, bu hadisə bilərəkdən Rusiya tərəfindən təşkil olunub və Azərbaycana hansısa mesaj göndərmək istəyirlər. Nəzərə almaq lazımdır ki, adıçəkilən şəhərdə zorakılığa, təzyiqə, işgəncəyə məruz qalan, vəfat edən şəxslərin bir çoxu 30 ildən çoxdur ki, orda yaşayırdı. Onlar Rusiya qanunlarına tabe olub orda yaşayırdılar. Həmçinin, Rusiya iqtisadiyyatına öz töhfələrini veriblər, vergi ödəyiblər. Sadəcə, dini, etnik, milli məsələ var ki, Rusiya bilərəkdən bunu azərbaycanlılara qarşı törədib. Bunun səbəbi yaxın zamanlarda bəlli olacaq. Zənnimcə, məlum əməliyyatın keçirilməsinə heç bir ehtiyac yox idi. 20 il öncə baş vermis hadisəyə görə şübhəli şəxslərin hüquq-mühafizə orqanlarına normal şəkildə dəvət edilməsi mümkün idi, ya da onlar evdən çıxarkən çox səliqəli şəkildə saxlanılıb, polis bölməsinə aparıla bilərdi. Ancaq gecə vaxtı evə daxil olub, körpə uşaqların, qadınların gözü önündə kişiləri vəhşicəsinə döymək, işgəncə vermək vəhşilik deməkdir. Bununla da Rusiya tərəfi dünyada itirilmiş nüfuzunu bir daha korladı”.
Həmsöhbətimiz onu da əlavə etdi ki, istintaq orqanları məhkəmənin qapalı keçirilməsi ilə bağlı vəsatət verib. Məhkəmənin qapalı keçirilməsi onu göstərir ki, bu hərəkətlərin arxasında siyasi amillər durur: “Yekaterinburq şəhərinin rəhbərliyi Moskvadan aldığl tapşırıqlar sayəsində məlum hadisələr törədilib. Məhkəmə o halda qapalı keçirilə bilər ki, dövlət sirri yayılmasın. Onlar məhkəməni ona görə qapalı keçirib ki, rusların törətdikləri vəhşiliklər açıq məhkəmə zalında müzakirə predmeti olmasın, zərərçəkənlərin döyülənlərin üzündə, bədənlərində olan xəsarətlər daha az görünsün. Nəzərə almaq lazımdır ki, Rusiyada da kifayət qədər demokratik ruhlu insanlar var. Həmin insanlar mətbuatda, televiziyada və sosial mediada məlum olayı işıqlandıra bilərlər. Çünki onlar da Rusiyanın siyasi hakimiyyətindən narazıdır. Danılmaz faktdır ki, Rusiyada Azərbaycanı sevən insanlar da az deyil. Hesab edirəm ki, Rusiya məhkəməsi məlum prosesi qapalı keçirməkdə qərar qəbul etməkdə haqlı deyil”.
Günel CƏLİLOVA
