İllər əvvəl baş vermiş “Silkway Airlines” qalmaqalının arxasındakı həqiqət üzə çıxıb. Rusiyanın hərbi kəşfiyyat bölməsi QRU-nun Azərbaycanı hədəfə almaq üçün saxta sənədlərdən istifadə edərək dezinformasiya kampaniyası apardığı ortaya çıxıb.
Məlum olub ki, iddia birbaşa Rusiyanın hərbi kəşfiyyatı tərəfindən uydurularaq bütün dünyaya servis edilib.
“Türkiye” qəzeti yazır ki, “The Insider” tərəfindən 2025-ci ildə aparılmış araşdırma, 2017-ci ildə bolqarıstanlı jurnalist Dilyana Qaytanjiyevanın imzası ilə dərc edilən “Azərbaycan Suriya terrorçularına diplomatik reyslərlə silah daşıyır” xəbərinin QRU-ya bağlı 29155 saylı bölmə tərəfindən hazırlandığını ortaya çıxarıb.
Araşdırmalara görə, jurnalistə verilən sənədlər – diplomatik qeydlər, uçuş qeydləri və silah siyahıları ya saxta, ya da bilərəkdən təhrif edilib. Sənədlər birbaşa Rusiya kəşfiyyatı tərəfindən idarə olunan saxta bir sosial media hesabı vasitəsilə jurnalistə ötürülüb.
Qeyd edilir ki, əməliyyatın məqsədi təkcə Azərbaycanın reputasiyasına xələl gətirmək deyil, həm də NATO-nun etibarını sarsıtmaq və diqqəti Rusiyanın Suriyaya müdaxiləsindən yayındırmaq olub.
“Silkway” iddiaları “WikiLeaks” vasitəsilə yayılıb, Culian Assanj tərəfindən dəstəklənib və Kremlyönlü media tərəfindən bütün dünyada yayılıb. Beləliklə, uydurma bir hekayə qlobal miqyasda həqiqət kimi təqdim edilib.
Ekspertlərin fikrincə, bu iş müasir dezinformasiyanın ən təsirli nümunələrindən birinə çevrilib. QRU fiziki hücumlar və ya açıq kiber əməliyyatlar əvəzinə bu metodu seçib.
Araşdırma həmçinin jurnalist Dilyana Qaytanjiyeva ilə QRU agentləri arasında 2016-cı ildən bəri təmas zəncirinin olduğunu üzə çıxarıb. Əməkdaşlıq 2017-ci ilin ortalarında başlayıb. Qaytanjiyeva daha sonra Kreml yönümlü media platformalarında çıxıb və Ukraynadakı bioloji laboratoriyalar haqqında saxta nəzəriyyələrin təbliğini aparıb.
Ukrayna Təhlükəsizlik Xidməti Qaytanjiyevanı 2023-cü ildə QRU agentləri siyahısına salıb. Onun adı da Kremlə işləyənlərin məlumat bazasına əlavə edilib.
TAHİR
