Əli Orucov: "... bu qorxu da bitəcək və müxtəlif formalarda etirazlar başlayacaq"
Rusiya xüsusi xidmət orqanları Ukrayna Təhlükəsizlik Xidmətinin (SBU) "Veb" xüsusi əməliyyatı zamanı pilotsuz təyyarələr buraxılan yük maşınlarının sürücülərini dindiriblər.
Sürücülərdən biri, Çelyabinsk şəhərinin 55 yaşlı sakini bildirib ki, avtomobilin 37 yaşlı sahibi Artyom Murmansk vilayətindən olan sahibkardan sifariş alıb və o, Çelyabinskdən Murmansk vilayətinin Kola rayonuna dörd karkas ev daşımalı olduğunu söyləyib.
Sürücünün sözlərinə görə, səfər zamanı onunla telefonla əlaqə saxlayan bir şəxs ona harada və nə vaxt dayanacağı ilə bağlı göstəriş verib. Ona deyiblər ki, Murmansk vilayətindəki hərbi aerodrom yaxınlığındakı “Rosneft” yanacaqdoldurma məntəqəsində dayansın. Yük maşını dayanandan bir qədər sonra isə pilotsuz təyyarələr buraxılıb.
Eyni sahibkara məxsus başqa bir yük maşınının 61 yaşlı sürücüsü də oxşar əhvalat danışıb. O da çərçivə evlərini İrkutsk bölgəsinə çatdırmaq tapşırığı alıb. Sürücü Usolye-Sibirskoye (İrkutsk vilayəti) şəhərindəki "Teremok" kafesində dayananda avtomobildən pilotsuz təyyarələr uçmağa başlayıb.
Ryazan və İvanovo vilayətlərində pilotsuz təyyarələrin buraxıldığı yük maşını sürücüləri də eyni şeyi söyləyib.
Çelyabinskdəki "Veb" əməliyyatında istifadə edilən FPV dronlarının yığıldığı iddia edilən anbarın sahibləri saxlanılıb. Ural regional nəşri Ura.ru hüquq-mühafizə orqanlarındakı mənbələrə istinadən yazır ki, binaların kirayəçiləri də saxlanılıb.
Rusiya aerodromlarına son dron zərbələri yerli vətəndaşların dəstəyi ilə həyata keçirilib. Bu artıq rus cəmiyyətinin bu müharibədə Putinə qarşı qalxmasının bir əlaməti sayıla bilərmi?
“Bakı-Xəbər” qəzetinin sualını cavablandıran politoloq Əli Orucov bildirdi ki, Ukraynanın Rusiya içərilərində uğurla və yüksək peşəkarlıqla həyata keçirdiyi "Hörümçək toru" əməliyyatı geniş rezonans doğurdu: "Bu, döyüş sənəti və hərb tarixində görünməmiş əməliyyat idi. Əməliyyat Rusiyanın HHQ və Kosmik qüvvələrinə sarsıdıcı zərbə oldu. Kreml hələ də həmin əməliyyatın şokundan özünə gələ bilmir. Fikrimcə, əməliyyatın bu qədər məxfilik və peşəkarlıqla həyata keçirilməsində kənar dəstəklər də olub. Həm Ukraynanın Qərb müttəfiqləri, həm də Rusiyanın içində müxtəlif köməkliklər göstərilib. Kreml bunun qisasını almaq yollarını axtarır, dağıdıcı zərbələr endirəcəyi ilə hədələyir. "Hörümçək toru" əməliyyatı müharibədə Ukraynanın döyüş ruhunu artırmaqla yanaşı, Rusiyanın rahatlığını da əlindən almış oldu. Rusiyanın İstintaq Komitəsi artıq araşdırmalara başlayıb və ilkin məlumatlara görə, əməliyyata kömək etməkdə şübhəli bilinən bəzi şəxslər barəsində də istintaq hərəkətləri icra edilir. Məlum olur ki, Rusiyanın daxilində bu əməliyyata logistik dəstək verilib. Ola bilsin, Rusiyada müharibədən bezən, yorğun düşən və vaxtilə iki qardaş olan slavyan xalqlarının bir-birilə savaşmağını istəməyənlər şüurlu şəkildə bunda iştirak edib".
Ekspert vurğulayır ki, ola bilsin, konteynerləri əməliyyat yerinə daşıyan yük avtomobili sürücülərinin yükdən məlumatları olmayıb, bilməyərəkdən iştirakçı qismində cəlb ediliblər: "Düşünürəm ki, onlar bilə-bilə özlərini təhlükəyə atmaz və əməliyyatdan sonra da Rusiyada qalmazdılar. Digərləri kimi çoxdan Federasiyanı tərk edərdilər. Bu əməliyyatda məqsədyönlü şəkildə iştirak edən Rusiya vətəndaşları istənilən halda cəzalandırılacaqlar. Putin və onun xüsusi xidmət orqanları üçün ağır nəticələri olan bu hadisədə əli olanları ən ağır cəza gözləyir.
Doğrudur, müharibənin şiddəti və miqyası artdıqca Rusiyada narazılıqlar da artmaqdadır. Lakin cəmiyyət həddindən artıq hakimiyyətin basqıları altında qaldığından açıq etiraz etməyə cürət edilmir. Ancaq hər şeyin həddi olduğu kimi, bu qorxu da bitəcək və müxtəlif formalarda etirazlar başlayacaq".
Dəniz NƏSİRLİ
