Ermənistan itkinlərlə bağlı Azərbaycanla hələ indi razılığa gəlir - səmimi olacaqmı?
Tural İsmayılov: “Ermənistanın səmimiyyətinə inanmaq illərlə yalan danışan bir rejimə etibar etmək qədər təhlükəlidir”
“Azərbaycanla Ermənistan arasında itkin düşmüş şəxslərin axtarışı üzrə birgə fəaliyyət aparılması barədə ilkin razılıq əldə olunub”. Bu barədə Ermənistanın Milli Təhlükəsizlik Xidmətinin (MTX) direktoru Armen Abazyan bildirib.
O qeyd edib ki, itkin düşmüş şəxslərin taleyi və mümkün axtarış əməliyyatları müzakirə edilib: “Bu əməliyyatların davamlı olması üçün ilkin razılıq əldə olunub. Görüşün nəticələrini müsbət qiymətləndirirəm. Nəticələrin əldə olunmasında maraqlıyıq”.
Qeyd edək ki, bu məsələ ilə bağlı Ermənistan tərəfi bir neçə dəfə yalançı vədlər verib, ancaq heç bir iş görməyib.
Maraqlıdır, ermənilər itkin düşmüş şəxslərin axtarışı üzrə birgə fəaliyyət aparılması barədə köməklik edilməsində səmimidirlərmi? Onlara inanmaq olarmı?
“İtkinlərin axtarışı kimi humanitar məsələdə belə səmimiyyət nümayiş etdirməyən dövlətin siyasi etikasından danışmaq özü absurddur”
Siyasi şərhçi Tural İsmayılov “Bakı-Xəbər”ə şərhində bildirdi ki, Ermənistan tərəfinin bu tip bəyanatları çox vaxt beynəlxalq ictimaiyyəti aldatmağa və özlərinə “sülhsevər obrazı” yaratmağa yönəlmiş taktiki gedişlərdən başqa bir şey deyil. Onlar illərlə azərbaycanlı əsir və itkinlərin taleyinə biganə yanaşıb, əsirləri işgəncə ilə öldürüb, bəzi hallarda isə onlardan xəbər belə verməyiblər: “Ermənistanın arxivlərində itkin düşmüş şəxslərlə bağlı kifayət qədər məlumat olsa da, bu sənədlərin açıqlanmasından israrla yayınırlar. Əgər səmimi olsaydılar çoxdan minalanmış ərazilərin xəritələrini dəqiq və tam şəkildə təqdim etmişdilər. Əvəzində, minlərlə mina basdırdıqları torpaqlarda insanlar həlak olur, ailələr dağılır. BMT-nin və digər beynəlxalq qurumların çağırışlarına rəğmən Ermənistan konkret addımlar atmaqdan boyun qaçırır. Onların “əməkdaşlıq” çağırışları əslində zamana oynamaq və danışıqlarda manipulyativ mövqe əldə etmək üçün planlaşdırılır. İtkinlərin axtarışı kimi humanitar məsələdə belə səmimiyyət nümayiş etdirməyən dövlətin siyasi etikasından danışmaq özü absurddur. Ermənilər indiyədək on minlərlə azərbaycanlının kütləvi şəkildə məhv edilməsi və ya izsiz itməsi ilə nəticələnmiş hərbi cinayətlərə görə məsuliyyət daşımırlar. Xocalı faciəsinin törədiciləri hələ də Ermənistan cəmiyyətində qəhrəman kimi təqdim olunur. Bu cür şəraitdə onların “əlimizdən gələni edəcəyik” sözləri yalnız boğazdan yuxarı ifadələrdir. Əgər doğrudan da istək və iradə varsa konkret addımlar atmaqla bu sübut oluna bilər. Amma biz bu addımları deyil, yalnız diplomatik imitasiya görürük. Ermənistan üçün bu məsələ siyasi alver və beynəlxalq tribunada özünə bəraət qazandırmaq üçün istifadə olunan bir vasitədir. Azərbaycan xalqı bu cür yalançı sülh ritorikasını yaxşı tanıyır. Tarix göstərib ki, Ermənistanın “sülh” dediyi yerdə arxada mütləq qara niyyət və revanşist ruh gizlənir. Ona görə də Ermənistanın səmimiyyətinə inanmaq illərlə yalan danışan bir rejimə etibar etmək qədər təhlükəlidir. Sözlər yox, əməllər vacibdir və bu əməllər hələ də görünmür. Gələcəkdə necə olacağını isə zaman göstərəcək”.
Günel CƏLİLOVA
